太陽中央 ê 火箭

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：A Rocket in the Sun
• 影像來源 kah 版權: Pascal Fouquet
• 台文翻譯：An-Li Tsai (TARA)

[漢羅] 太陽中央 ê 火箭

9 月 24 號透早，有一支火箭 ùi 太陽盤面頭前行過。 這張用望遠鏡頭翕--ê 相片，是 tī Florida 州 Orlando ê Kennedy 太空中心火箭發射場 西爿 50 英里遠 ê 所在 翕--ê。 這支火箭載三項新 ê 太空天氣任務到太空，分別是： NASA ê 星際測量繪圖 kah 加速探測器、 NASA ê Carruthers 地冕天文台、 kah 美國國家海洋大氣管理局（NOAA）ê 太空天氣追蹤任務 Langrange 1 號（SWFO-L1）。 這三項任務攏已經成功接收著信號矣。 In 上開始 ê 旅程，是欲去 L1，是地球 kah 太陽 ê 其中一个 Lagrange 點。 L1 離地球差不多有 150 萬公里遠。 會影響著太空天氣主要 ê 因素，是太陽活跳區 ê 太陽烏子，就 tī 這張太陽相片中，火箭邊仔 ê 烏點。 其實，大型太陽活跳區 AR4225 to̍h tī 火箭鼻頭 ê 正爿彼搭。

[POJ] Thài-iông tiong-ng ê Hóe-chìⁿ

9 goe̍h 24 hō thàu-chá, ū chi̍t-ki hóe-chìⁿ ùi Thài-iông-pôaⁿ-bīn thâu-chêng kiâⁿ-kòe. Chit-tiuⁿ iōng bōng-oán-kiàⁿ-thâu hip--ê siòng-phìⁿ, sī tī Florida chiu Orlando ê Kennedy Thài-khong Tiong-sim Hóe-chìⁿ Hoat-siā-tiûⁿ sai-pêng 50 eng-lí hn̄g ê só͘-chāi hip--ê. Chit-ki hóe-chìⁿ chài sam-hāng sin ê thài-khong thian-khì jīm-bū kàu thài-khong, hun-pia̍t sī: NASA ê Seng-chè Chhek-liông Hōe-tô͘ kah Ka-sok Thàm-chhek-khì, NASA ê Carruthers Tē-bián Thian-bûn-tâi, kah Bí-kok Kok-ka Hái-iûⁿ Tāi-khì Koán-lí-kio̍k (NOAA) ê Thài-khong Thiⁿ-khì Tui-chong Jīm-bū Lagrange 1 hō (SWFO-L1). Chit sam-hāng jīm-bū lóng í-keng sêng-kong chiap-siu-tio̍h sìn-hō--ah. In siōng khai-sí ê lú-thêng, sī beh khì L1, sī Tē-kiû kah Thài-iông ê kî-tiong chi̍t-ê Lagrange-tiám. L1 lî Tē-kiû chha-put-to ū 150 bān kong-lí hn̄g. Ē éng-hióng-tio̍h thài-khong thiⁿ-khì chú-iàu ê in-sò͘, sī thài-iông oa̍h-thiàu-khu ê thài-iông o͘-chú, to̍h tī chit-tiuⁿ Thài-iông siòng-phìⁿ tiong, hóe-chìⁿ piⁿ-á ê o͘-tiám. Kî-si̍t, tōa-hêng thài-iông oa̍h-thiàu-khu AR4225 to̍h tī hóe-chìⁿ phīⁿ-thâu ê chiàⁿ-pêng hit-tah.

[KIP] Thài-iông tiong-ng ê Hué-tsìnn

9 gue̍h 24 hō thàu-tsá, ū tsi̍t-ki hué-tsìnn uì Thài-iông-puânn-bīn thâu-tsîng kiânn-kuè. Tsit-tiunn iōng bōng-uán-kiànn-thâu hip--ê siòng-phìnn, sī tī Florida tsiu Orlando ê Kennedy Thài-khong Tiong-sim Hué-tsìnn Huat-siā-tiûnn sai-pîng 50 ing-lí hn̄g ê sóo-tsāi hip--ê. Tsit-ki hué-tsìnn tsài sam-hāng sin ê thài-khong thian-khì jīm-bū kàu thài-khong, hun-pia̍t sī: NASA ê Sing-tsè Tshik-liông Huē-tôo kah Ka-sok Thàm-tshik-khì, NASA ê Carruthers Tē-bián Thian-bûn-tâi, kah Bí-kok Kok-ka Hái-iûnn Tāi-khì Kuán-lí-kio̍k (NOAA) ê Thài-khong Thinn-khì Tui-tsong Jīm-bū Lagrange 1 hō (SWFO-L1). Tsit sam-hāng jīm-bū lóng í-king sîng-kong tsiap-siu-tio̍h sìn-hō--ah. In siōng khai-sí ê lú-thîng, sī beh khì L1, sī Tē-kiû kah Thài-iông ê kî-tiong tsi̍t-ê Lagrange-tiám. L1 lî Tē-kiû tsha-put-to ū 150 bān kong-lí hn̄g. Ē íng-hióng-tio̍h thài-khong thinn-khì tsú-iàu ê in-sòo, sī thài-iông ua̍h-thiàu-khu ê thài-iông oo-tsú, to̍h tī tsit-tiunn Thài-iông siòng-phìnn tiong, hué-tsìnn pinn-á ê oo-tiám. Kî-si̍t, tuā-hîng thài-iông ua̍h-thiàu-khu AR4225 to̍h tī hué-tsìnn phīnn-thâu ê tsiànn-pîng hit-tah.

[English] A Rocket in the Sun

On the morning of September 24 a rocket crosses the bright solar disk in this long range telescopic snapshot captured from Orlando, Florida. That's about 50 miles west of its Kennedy Space Center launch site. This rocket carried three new space weather missions to space. Signals have now been successfully acquired from all three - NASA's Interstellar Mapping and Acceleration Probe, NASA’s Carruthers Geocorona Observatory, and the National Oceanic and Atmospheric Administration (NOAA) Space Weather Follow-On Lagrange 1 (SWFO-L1) - as they begin their journey to L1, an Earth-Sun lagrange point. L1 is about 1.5 million kilometers in the sunward direction from planet Earth. Appropriately, major space weather influencers, aka dark sunspots in active regions across the Sun, are posing with the transiting rocket. In fact, large active region AR4225 is just right of the rocket's nose.

詞彙學習