土星 ê 春分

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：Equinox at Saturn
• 影像來源 kah 版權: Imran Sultan
• 台文翻譯：An-Li Tsai (TARA)

[漢羅] 土星 ê 春分

Tī 土星，土星環會 kā 你講，這馬是啥物季節。 Tī 地球，今仔日是春分，to̍h 是地球赤道 墜直太陽 ê 時陣。 因為土星 ê 大型土星環，是綴 土星 ê 赤道咧踅，所以土星 ê 自轉軸指向太陽 ê 時陣，土星環 ùi 太陽 ê 方向來看，是上顯目--ê。 顛倒是土星 ê 自轉軸 坦徛 ê 時陣，春分才會發生。 這个時陣，側向 ê 土星環毋但 ùi 太陽方向真歹看著，tī 地球頂懸嘛是看無啥有。 這張組合影像是 kā 土星 2020 年到 2025 年 ê 影像疊做伙。 這段時間是土星 ùi 北半球熱天 到 南半球熱天，嘛包括今年春分。 昨昏，土星拄好出現 tī 離地球上倚 ê 位置，所以伊看起來就較光。 這個月，咱規暗攏看會著這粒有環 ê 大粒行星。

[POJ] Thó͘-chhiⁿ ê Chhun-hun

Tī Thó͘-chhiⁿ, Thó͘-chhiⁿ-khoân ē kā lí kóng, chit-má sī siáⁿ-mi̍h kùi-chiat. Tī Tē-kiû, kin-á-ji̍t sī chhun-hun, to̍h sī Tē-kiû chhek-tō tūi-ti̍t Thài-iông ê sî-chūn. In-ūi Thó͘-chhiⁿ ê tōa-hêng Thó͘-chhiⁿ-khoân, sī tòe Thó͘-chhiⁿ ê chhek-tō leh se̍h, só͘-í Thó͘-chhiⁿ ê chū-choán-te̍k chí-hiòng Thài-iông ê sî-chūn, Thó͘-chhiⁿ-khoân ùi Thài-iông ê hong-hiòng lâi khòaⁿ, sī siōng hiáⁿ-ba̍k--ê. Tian-tò sī Thó͘-chhiⁿ ê chū-choán-te̍k tháⁿ-khiā ê sî-chūn, chhun-hun chiah ē hoat-seng. Chit-ê sî-chūn, chhek-hiòng ê Thó͘-chhiⁿ-khoân m̄-nā ùi Thài-iông hong-hiòng chin pháiⁿ khòaⁿ--tio̍h, tī Tē-kiû téng-kôaⁿ mā sī khòaⁿ bô siáⁿ ū. Chit-tiuⁿ cho͘-ha̍p iáⁿ-siōng sī kā Thó͘-chhiⁿ 2020 nî kàu 2025 nî ê iáⁿ-siōng tha̍h chò-hóe. Chit-tōaⁿ sî-kan sī Thó͘-chhiⁿ ùi pak-pòaⁿ-kiû joa̍h-thiⁿ kàu lâm-pòaⁿ-kiû joa̍h-thiⁿ, mā pau-koat kin-nî chhun-hun. cha-hng, Thó͘-chhiⁿ tú-hó chhut-hiān tī lî Tē-kiû siōng óa ê ūi-tì, só͘-í i khòaⁿ--khí-lâi to̍h khah kng. Chit-kò͘ goe̍h, lán kui-àm lóng khòaⁿ ē-tio̍h chit-lia̍p ū-khoân ê tōa-lia̍p kiâⁿ-chhiⁿ.

[KIP] Thóo-tshinn ê Tshun-hun

Tī Thóo-tshinn, Thóo-tshinn-khuân ē kā lí kóng, tsit-má sī siánn-mi̍h kuì-tsiat. Tī Tē-kiû, kin-á-ji̍t sī tshun-hun, to̍h sī Tē-kiû tshik-tō tuī-ti̍t Thài-iông ê sî-tsūn. In-uī Thóo-tshinn ê tuā-hîng Thóo-tshinn-khuân, sī tuè Thóo-tshinn ê tshik-tō leh se̍h, sóo-í Thóo-tshinn ê tsū-tsuán-ti̍k tsí-hiòng Thài-iông ê sî-tsūn, Thóo-tshinn-khuân uì Thài-iông ê hong-hiòng lâi khuànn, sī siōng hiánn-ba̍k--ê. Tian-tò sī Thóo-tshinn ê tsū-tsuán-ti̍k thánn-khiā ê sî-tsūn, tshun-hun tsiah ē huat-sing. Tsit-ê sî-tsūn, tshik-hiòng ê Thóo-tshinn-khuân m̄-nā uì Thài-iông hong-hiòng tsin pháinn khuànn--tio̍h, tī Tē-kiû tíng-kuânn mā sī khuànn bô siánn ū. Tsit-tiunn tsoo-ha̍p iánn-siōng sī kā Thóo-tshinn 2020 nî kàu 2025 nî ê iánn-siōng tha̍h tsò-hué. Tsit-tuānn sî-kan sī Thóo-tshinn uì pak-puànn-kiû jua̍h-thinn kàu lâm-puànn-kiû jua̍h-thinn, mā pau-kuat kin-nî tshun-hun. tsa-hng, Thóo-tshinn tú-hó tshut-hiān tī lî Tē-kiû siōng uá ê uī-tì, sóo-í i khuànn--khí-lâi to̍h khah kng. Tsit-kòo gue̍h, lán kui-àm lóng khuànn ē-tio̍h tsit-lia̍p ū-khuân ê tuā-lia̍p kiânn-tshinn.

[English] Equinox at Saturn

On Saturn, the rings tell you the season. On Earth, today marks an equinox, the time when the Earth's equator tilts directly toward the Sun. Since Saturn's grand rings orbit along the planet's equator, these rings appear most prominent -- from the direction of the Sun -- when the spin axis of Saturn points toward the Sun. Conversely, when Saturn's spin axis points to the side, an equinox occurs, and the edge-on rings are hard to see from not only the Sun -- but Earth. In the featured montage, images of Saturn between the years of 2020 and 2025 have been superposed to show the giant planet passing, with this year's equinox, from summer in the north to summer in the south. Yesterday, Saturn was coincidently about as close as it gets to planet Earth, and so this month the ringed giant's orb is relatively bright and visible throughout the night.

詞彙學習