一英里望遠鏡陣列 kah 天星軌跡

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：Star Trails over One-Mile Radio Telescope
• 影像來源 kah 版權: Joao Yordanov Serralheiro
• 台文翻譯：An-Li Tsai (TARA)

[漢羅] 一英里望遠鏡陣列 kah 天星軌跡

這幅夜空景色是 tī 英國劍橋 Mullard 電波天文台 翕--ê。 相片內底 指向天頂 ê 是 一英里望遠鏡陣列 ê 盤仔形天線望遠鏡，逐台 ê 直徑是 60 英尺。 為著欲翕著這个壯觀 ê 景色，攝影師 tī 90 分鐘內，連紲翕 感光 30 秒 ê 相片。 Kā 這寡相片疊做伙了後，背景就會出現足媠 ê 天星軌跡，這嘛反映地球逐工 ê 自轉。 地球自轉軸指向天頂 ê 方位 就是 北天極，北極星 tī 北天極 附近。 伊 tī 這幅圖內底是 tī 仝心圓上倚中心彼搭，形成上短 ê 天星軌跡。 是講，這个有歷史意義 ê 一英里望遠鏡陣列，嘛是靠地球 ê 自轉來運作--ê。 伊是頭一台利用地球自轉 孔徑合成 ê 技術，tī 電波波段 探索宇宙。 這个技術利用地球 ê 自轉，來改變望遠鏡陣列 kah 電波源 ê 相對方向，創出比人 ê 目睭閣較清楚 ê 電波天文圖。

[POJ] Chit-eng-lí Bōng-oán-kiàⁿ Tīn-lia̍t kah Thiⁿ-chhiⁿ Kúi-jiah

Chit-pak iā-khong kéng-sek sī tī Eng-kok Cambridge Mullard Tiān-pho Thian-bûn-tâi hip--ê. Siòng-phìⁿ lāi-té chí-hiòng thiⁿ-téng ê sī Chit-eng-lí Bbōng-oán-kiàⁿ Tīn-lia̍t ê pôaⁿ-á-hêng thian-sòaⁿ bōng-oán-kiàⁿ, ta̍k-tâi ê ti̍t-kèng sī 60 eng-chhioh. Uī-tio̍h beh hip-tio̍h chit-ê chòng-koan ê kéng-sek, liap-iáⁿ-su tī 90 hun-cheng lāi, liân-sio̍k hip kám-kng 30 bió ê siòng-phìⁿ. Kā chit-kóa siòng-phìⁿ tha̍h chò-hóe liáu-āu, pōe-kéng to̍h ē chhut-hiān chiok súi ê thiⁿ-chhiⁿ kúi-jiah, che mā hoán-èng Tē-kiû ta̍k-kang ê chū-choán. Tē-kiû chū-choán-te̍k chí-hiòng thiⁿ-téng ê hong-ūi to̍h-sī Pak-thian-ke̍k, Pak-ke̍k-chhiⁿ tī Pak-thian-ke̍k hū-kīn. I tī chit-pak tô͘ lāi-té sī tī kāng-sim-îⁿ siōng óa tiong-sim hit tah, hêng-sêng siōng té ê thiⁿ-chhiⁿ kúi-jiah. Sī-kóng, chit-ê ū le̍k-sú ì-gī ê Chit-eng-lí Bōng-oán-kiàⁿ Tīn-lia̍t, mā-sī khò Tē-kiû ê chū-choán lâi ūn-chok--ê. I sī thâu chi̍t-tâi lī-iōng Tē-kiû chū-choán khóng-kèng ha̍p-sêng ê ki-su̍t, tī tiān-pho pho-tōaⁿ thàm-soh ú-tiū. Chit-ê ki-su̍t lī-iōng Tē-kiû ê chū-choán, lâi kái-piàn bōng-oán-kiàⁿ tīn-lia̍t kah tiān-pho-goân ê siong-tùi hong-hiòng, chhòng-chhut pí lâng ê ba̍k-chiu koh-khah chheng-chhó͘ ê tiān-pho thian-bûn-tô͘.

[KIP] Tsit-ing-lí Bōng-uán-kiànn Tīn-lia̍t kah Thinn-tshinn Kuí-jiah

Tsit-pak iā-khong kíng-sik sī tī Ing-kok Cambridge Mullard Tiān-pho Thian-bûn-tâi hip--ê. Siòng-phìnn lāi-té tsí-hiòng thinn-tíng ê sī Tsit-ing-lí Bbōng-uán-kiànn Tīn-lia̍t ê puânn-á-hîng thian-suànn bōng-uán-kiànn, ta̍k-tâi ê ti̍t-kìng sī 60 ing-tshioh. Uī-tio̍h beh hip-tio̍h tsit-ê tsòng-kuan ê kíng-sik, liap-iánn-su tī 90 hun-tsing lāi, liân-sio̍k hip kám-kng 30 bió ê siòng-phìnn. Kā tsit-kuá siòng-phìnn tha̍h tsò-hué liáu-āu, puē-kíng to̍h ē tshut-hiān tsiok suí ê thinn-tshinn kuí-jiah, tse mā huán-ìng Tē-kiû ta̍k-kang ê tsū-tsuán. Tē-kiû tsū-tsuán-ti̍k tsí-hiòng thinn-tíng ê hong-uī to̍h-sī Pak-thian-ki̍k, Pak-ki̍k-tshinn tī Pak-thian-ki̍k hū-kīn. I tī tsit-pak tôo lāi-té sī tī kāng-sim-înn siōng uá tiong-sim hit tah, hîng-sîng siōng té ê thinn-tshinn kuí-jiah. Sī-kóng, tsit-ê ū li̍k-sú ì-gī ê Tsit-ing-lí Bōng-uán-kiànn Tīn-lia̍t, mā-sī khò Tē-kiû ê tsū-tsuán lâi ūn-tsok--ê. I sī thâu tsi̍t-tâi lī-iōng Tē-kiû tsū-tsuán khóng-kìng ha̍p-sîng ê ki-su̍t, tī tiān-pho pho-tuānn thàm-soh ú-tiū. Tsit-ê ki-su̍t lī-iōng Tē-kiû ê tsū-tsuán, lâi kái-piàn bōng-uán-kiànn tīn-lia̍t kah tiān-pho-guân ê siong-tuì hong-hiòng, tshòng-tshut pí lâng ê ba̍k-tsiu koh-khah tshing-tshóo ê tiān-pho thian-bûn-tôo.

[English] Star Trails over One-Mile Radio Telescope

The steerable 60 foot diameter dish antenna of the One-Mile Telescope at Mullard Radio Astronomy Observatory, Cambridge, UK, is pointing skyward in this evocative night-skyscape. To capture the dramatic scene, consecutive 30 second exposures were recorded over a period of 90 minutes. Combined, the exposures reveal a background of gracefully arcing star trails that reflect planet Earth's daily rotation on its axis. The North Celestial Pole, the extension of Earth's axis of rotation into space, points near Polaris, the North Star. That's the bright star that creates the short trail near the center of the concentric arcs. But the historic One-Mile Telescope array also relied on planet Earth's rotation to operate. Exploring the universe at radio wavelengths, it was the first radio telescope to use Earth-rotation aperture synthesis. That technique uses the rotation of the Earth to change the relative orientation of the telescope array and celestial radio sources to create radio maps of the sky at a resolution better than that of the human eye.

詞彙學習