球形星團 杜鵑座 47

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：Globular Star Cluster 47 Tuc
• 影像來源 kah 版權：Carlos Taylor
• 台文翻譯：An-Li Tsai (TARA)

[漢羅] 球形星團 杜鵑座 47

杜鵑座 47，嘛叫做 NGC 104，是南天 ê 寶石。 伊毋是一粒恆星，是一個實密 ê 恆星團，tī 咱銀河系 ê 銀暈內底 kah 其他 200 个球形星團做伙 leh 賴賴趖。 Ùi 地球來看，第一光 ê 球形星團是 半人馬座 ω，第二光 ê to̍h 是杜鵑座 47 矣。 伊離咱有 1 萬 3000 光年遠，to̍h tī 小麥哲倫星雲附近 ê 杜鵑座方向，咱會當直接用目睭看著。 這个實密 ê 星團是佇 120 光年闊 ê 空間內底 櫼幾若十萬粒恆星。 星團外圍 ê 紅巨星實在是足好揣--ê，就 tī 這幅清楚 ê 望遠鏡相片內底，是一粒看起來較黃 ê 天星。 球形星團 杜鵑座 47 ê 恆星櫼櫼做一球，內底有一粒恆星，是目前踅烏洞 ê 恆星內底，離烏洞上倚--ê。

[POJ] Kiû-hêng seng-thoân Tō͘-koan-chō 47

Tō͘-koan-chō 47, mā kiò-chò NGC 104, sī lâm-thian ê pó-chio̍h. I m̄-sī chi̍t-lia̍p hêng-chhiⁿ, sī chi̍t-ê cha̍t-ba̍t ê hêng-chhiⁿ-thoân, tī lán Gîn-hô-hē ê Gîn-n̄g lāi-té kah kî-tha 200 ê kiû-hêng seng-thoân chò-hóe leh lōa-lōa-sô. Ùi Tē-kiû lâi khòaⁿ, tē it kng ê kiû-hêng seng-thoân sī Poàn-jîn-má-chō ω, tē jī kng ê to̍h sī Tō͘-koan-chō 47--ah. I lī lán ū 1 bān 3000 kng-nî hn̄g, to̍h tī Sió Be̍h-tiat-lûn seng-hûn hū-kīn ê Tō͘-koan-chō hong-hiòng, lán ē-tàng ti̍t-chiap iōng ba̍k-chiu khòaⁿ--tio̍h. Chit-ê cha̍t-ba̍t ê seng-thoân sī tī 120 kng-nî khoah ê khong-kan lāi-té chiⁿ kúi-ā-cha̍p-bān lia̍p hêng-chhiⁿ. Seng-thoân gōa-ûi ê âng-kū-chhiⁿ si̍t-chāi sī chiok-hó chhōe--ê, to̍h tī chit-pak chheng-chhó͘ ê bōng-oán-kiàⁿ siòng-phìⁿ lāi-té, sī chi̍t-lia̍p khòaⁿ--khí-lâi khah n̂g ê thiⁿ-chhiⁿ. Kiû-hêng seng-thoân Tō͘-koan-chō 47 ê hêng-chhiⁿ chiⁿ-chiⁿ chò chi̍t-kiû, lāi-té ū chi̍t-lia̍p hêng-chhiⁿ, sī bo̍k-chêng se̍h o͘-tōng ê hêng-chhiⁿ lāi-té, lī o͘-tōng siōng óa--ê.

[KIP] Kiû-hîng sing-thuân Tōo-kuan-tsō 47

Tōo-kuan-tsō 47, mā kiò-tsò NGC 104, sī lâm-thian ê pó-tsio̍h. I m̄-sī tsi̍t-lia̍p hîng-tshinn, sī tsi̍t-ê tsa̍t-ba̍t ê hîng-tshinn-thuân, tī lán Gîn-hô-hē ê Gîn-n̄g lāi-té kah kî-tha 200 ê kiû-hîng sing-thuân tsò-hué leh luā-luā-sô. Uì Tē-kiû lâi khuànn, tē it kng ê kiû-hîng sing-thuân sī Puàn-jîn-má-tsō ω, tē jī kng ê to̍h sī Tōo-kuan-tsō 47--ah. I lī lán ū 1 bān 3000 kng-nî hn̄g, to̍h tī Sió Be̍h-tiat-lûn sing-hûn hū-kīn ê Tōo-kuan-tsō hong-hiòng, lán ē-tàng ti̍t-tsiap iōng ba̍k-tsiu khuànn--tio̍h. Tsit-ê tsa̍t-ba̍t ê sing-thuân sī tī 120 kng-nî khuah ê khong-kan lāi-té tsinn kuí-ā-tsa̍p-bān lia̍p hîng-tshinn. Sing-thuân guā-uî ê âng-kū-tshinn si̍t-tsāi sī tsiok-hó tshuē--ê, to̍h tī tsit-pak tshing-tshóo ê bōng-uán-kiànn siòng-phìnn lāi-té, sī tsi̍t-lia̍p khuànn--khí-lâi khah n̂g ê thinn-tshinn. Kiû-hîng sing-thuân Tōo-kuan-tsō 47 ê hîng-tshinn tsinn-tsinn tsò tsi̍t-kiû, lāi-té ū tsi̍t-lia̍p hîng-tshinn, sī bo̍k-tsîng se̍h oo-tōng ê hîng-tshinn lāi-té, lī oo-tōng siōng uá--ê.

[English] Globular Star Cluster 47 Tuc

Also known as NGC 104, 47 Tucanae is a jewel of the southern sky. Not a star but a dense cluster of stars, it roams the halo of our Milky Way Galaxy along with some 200 other globular star clusters. The second brightest globular cluster (after Omega Centauri) as seen from planet Earth, 47 Tuc lies about 13,000 light-years away. It can be spotted with the naked eye close on the sky to the Small Magellanic Cloud in the constellation of the Toucan. The dense cluster is made up of hundreds of thousands of stars in a volume only about 120 light-years across. Red giant stars on the outskirts of the cluster are easy to pick out as yellowish stars in this sharp telescopic portrait. Tightly packed globular star cluster 47 Tuc is also home to a star with the closest known orbit around a black hole.

詞彙學習