流星 kah 星團

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：The Meteor and the Star Cluster
• 影像來源 kah 版權: Yousif Alqasimi & Essa Al Jasmi
• Jigsaw Universe: Astronomy Puzzle of the Day
• 台文翻譯：An-Li Tsai (TARA)

[漢羅] 流星 kah 星團

有當時仔，連天公伯嘛會予你驚喜！ 你若是欲 tī 昴宿星團 (M45) 內底看著較濟粒恆星 kah 較暗 ê 星雲，翕相 ê 時陣著愛感光較久咧。 這寡感光相片定定會出現一寡咱無愛 ê 物件，會使 kā 刣掉。 這寡物件包括歹去 ê 畫素、宇宙線、傷光 ê 雲、月娘、飛龍機 ê 軌跡、鏡頭反光、較暗 ê 衛星 ê 軌跡，甚至嘛有 蟲 ê 軌跡。 毋過有當時仔，嘛是會拄著真正趣味 ê 物件。 這張是幾若禮拜前，佇 沙烏地阿拉伯 ê al-Ula 拄著 ê 情形。 彼當陣，攝影師 當咧對 昴宿星團 做一點鐘 ê 長時間感光，結果有一粒 光 iàⁿ-iàⁿ ê 流星飛過。 相片除了有翕著 較有名、較光 ê 藍色恆星，嘛有翕著較無名、較無光 ê 藍色恆星，kah 踅 tī 星團邊仔、反射藍光 ê 塗粉。 而且，閣有翕著 一粒 飛足緊 ê 岩石屑仔。 伊 tī 天頂產生足特別 ê 青光，這可能是金屬蒸發產生--ê。

[POJ] Liû-chhiⁿ kah Seng-thoân

Ū tang-sî-á, liân thiⁿ-kong-peh mā ē hō͘ lí kiaⁿ-hí! Lí nā-sī beh tī Báu-siù Seng (M45) lāi-té khòaⁿ-tio̍h khah chōe-lia̍p hêng-chhiⁿ kah khah àm ê seng-hûn, hip-siòng ê sî-chūn to̍h-ài kám-kng khah kú--leh. Chit-kóa kám-kng siòng-phìⁿ tiāⁿ-tiāⁿ ē chhut-hiān chi̍t-kóa lán bô-ài ê mi̍h-kiāⁿ, ē-sái kā thâi-tiāu. Chit-kóa mi̍h-kiāⁿ pau-koat pháiⁿ--khì ê ōe-sò͘, ú-tiū-sòaⁿ, siuⁿ kng ê hûn, goe̍h-niû, poe-lêng-ki ê kúi-jiah, kiàⁿ-thâu hoán-kng, khah àm ê ūi-chhiⁿ ê kúi-jiah, sīm-chì mā ū thâng ê kúi-jiah. M̄-koh ū tang-sî-á, mā-sī ē tú-tio̍h chin-chiàⁿ chhù-bī ê mi̍h-kiāⁿ. Chit-tiuⁿ sī kúi-ā-lé-pài chêng, tī Sa-ū-tē A-la-pek ê al-Ula tú-tio̍h ê chêng-hêng. Hit-tang-chūn, liap-iáⁿ-su tng-leh tùi Báu-siù-seng-thoân chò chi̍t-tiám-cheng ê tn̂g-sî-kan kám-kng, kiat-kó ū chi̍t-lia̍p kng-iàⁿ-iàⁿ ê liû-chhiⁿ poe-kòe. Siòng-phìⁿ tû-liáu ū hip-tio̍h khah ū-miâ, khah kng ê nâ-sek hêng-chhiⁿ, mā ū hip-tio̍h khah bô-miâ, khah bô kng ê nâ-sek hêng-chhiⁿ, kah se̍h tī seng-thoân piⁿ-á, hoán-siā nâ-kng ê thô͘-hún. Jî-chhiáⁿ, koh ū hip-tio̍h chi̍t-lia̍p poe chiok kín ê giâm-chio̍h-sap-á. I tī thiⁿ-téng sán-seng chiok te̍k-pia̍t ê chhiⁿ-kng, che khó-lêng sī kim-sio̍k cheng-hoat sán-seng--ê.

[KIP] Liû-tshinn kah Sing-thuân

Ū tang-sî-á, liân thinn-kong-peh mā ē hōo lí kiann-hí! Lí nā-sī beh tī Báu-siù Sing (M45) lāi-té khuànn-tio̍h khah tsuē-lia̍p hîng-tshinn kah khah àm ê sing-hûn, hip-siòng ê sî-tsūn to̍h-ài kám-kng khah kú--leh. Tsit-kuá kám-kng siòng-phìnn tiānn-tiānn ē tshut-hiān tsi̍t-kuá lán bô-ài ê mi̍h-kiānn, ē-sái kā thâi-tiāu. Tsit-kuá mi̍h-kiānn pau-kuat pháinn--khì ê uē-sòo, ú-tiū-suànn, siunn kng ê hûn, gue̍h-niû, pue-lîng-ki ê kuí-jiah, kiànn-thâu huán-kng, khah àm ê uī-tshinn ê kuí-jiah, sīm-tsì mā ū thâng ê kuí-jiah. M̄-koh ū tang-sî-á, mā-sī ē tú-tio̍h tsin-tsiànn tshù-bī ê mi̍h-kiānn. Tsit-tiunn sī kuí-ā-lé-pài tsîng, tī Sa-ū-tē A-la-pik ê al-Ula tú-tio̍h ê tsîng-hîng. Hit-tang-tsūn, liap-iánn-su tng-leh tuì Báu-siù-sing-thuân tsò tsi̍t-tiám-tsing ê tn̂g-sî-kan kám-kng, kiat-kó ū tsi̍t-lia̍p kng-iànn-iànn ê liû-tshinn pue-kuè. Siòng-phìnn tû-liáu ū hip-tio̍h khah ū-miâ, khah kng ê nâ-sik hîng-tshinn, mā ū hip-tio̍h khah bô-miâ, khah bô kng ê nâ-sik hîng-tshinn, kah se̍h tī sing-thuân pinn-á, huán-siā nâ-kng ê thôo-hún. Jî-tshiánn, koh ū hip-tio̍h tsi̍t-lia̍p pue tsiok kín ê giâm-tsio̍h-sap-á. I tī thinn-tíng sán-sing tsiok ti̍k-pia̍t ê tshinn-kng, tse khó-lîng sī kim-sio̍k tsing-huat sán-sing--ê.

[English] The Meteor and the Star Cluster

Sometimes even the sky surprises you. To see more stars and faint nebulosity in the Pleiades star cluster (M45), long exposures are made. Many times, less interesting items appear on the exposures that were not intended -- but later edited out. These include stuck pixels, cosmic ray hits, frames with bright clouds or Earth's Moon, airplane trails, lens flares, faint satellite trails, and even insect trails. Sometimes, though, something really interesting is caught by chance. That was just the case a few weeks ago in al-Ula, Saudi Arabia when a bright meteor streaked across during an hour-long exposure of the Pleiades. Along with the famous bright blue stars, less famous and less bright blue stars, and blue-reflecting dust surrounding the star cluster, the fast rock fragment created a distinctive green glow, likely due to vaporized metals.

詞彙學習