共月娘釣起來

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：Fishing for the Moon
• 影像來源 kah 版權: Marco Bellelli
• 台文翻譯：An-Li Tsai (TARA)

[漢羅] 共月娘釣起來

地球 ê 衛星月球，有偌大粒？ 若 kah 太陽系內底其他 ê 衛星比，伊 ê 大細排佇第五名，頭四名是：木星 ê 衛星 木衛三 Ganymede、土星 ê 衛星 土衛六 Titan、木星 ê 衛星 木衛四 Callisto kah 木衛一 Io。 月球比木星 ê 衛星 木衛二 Europa kah 海王星 ê 衛星 海衛一 Triton，閣卡大粒。 伊嘛比 矮行星 冥王星 kah 鬩神星 閣卡大粒。 月球 ê 直徑有 3475 公里，差不多是地球 ê 四分一爾爾。 毋過若是考慮 母行星 ê 大細，月球是上大粒 ê 衛星。 佇這个 恬 chih-chih ê 8 月黃昏海岸，拄 peh 起來 ê 月圓，看起來猶是細細粒，就敢若去予古早時代 掠魚 ê 網仔 掠著仝款。 這張長鏡頭相片，是 tī 義大利 Trabocchi 海岸 ê Adriatic 海 翕--ê。

[POJ] Kā Goe̍h-niû tiò--khí-lâi

Tē-kiû ê ūi-chhiⁿ goe̍h-kiû, ū lōa tōa-lia̍p? Nā kah thài-iông-hē lāi-té kî-thaⁿ ê ūi-chhiⁿ pí, i ê tōa-sè pâi tī tē gō͘ miâ, thâu sì-miâ sī: Bo̍k-chhiⁿ ê ūi-chhiⁿ Bo̍k-ūi-saⁿ Ganymede, Thó͘-chhiⁿ ê ūi-chhiⁿ Thó͘-ūi-la̍k Titan, Bo̍k-chhiⁿ ê ūi-chhiⁿ Thó͘-ūi-sì Callisto kah Thó͘-ūi-it Io. Goe̍h-kiû pí Bo̍k-chhiⁿ ê ūi-chhiⁿ Thó͘-ūi-jī Europa kah Hái-ông-chhiⁿ ê ūi-chhiⁿ Hái-ūi-it Triton, koh-khah tōa-lia̍p. I mā pí é-kiâⁿ-chhiⁿ Bêng-ông-chhiⁿ kah Gé-sîn-chhiⁿ koh-khah tōa-lia̍p. Goe̍h-kiû ê ti̍t-kèng ū 3475 kong-lí, chha-put-to sī Tē-kiû ê sù-hun-it niā-niā. M̄-koh nā-sī khó-lū bó͘-kiâⁿ-chhiⁿ ê tōa-sè, goe̍h-kiû sī siōng tōa-lia̍p ê ūi-chhiⁿ. Tī chit-ê tiām-chih-chih ê 8 go̍eh hông-hun hái-hoāⁿ, tú peh--khí-lâi ê goe̍h-îⁿ, khòaⁿ--khí-lâi iáu-sī sè-sè-lia̍p, to̍h ká-nā khì hō͘ kó͘-chá sî-tāi lia̍h-hî ê bāng-á lia̍h-tio̍h kâng-khóan. Chit-tiuⁿ tn̂g-kiàⁿ-thâu siòng-phìⁿ, sī tī I-tá-lī Trabocchi hái-hoāⁿ ê Adriatic hái hip--ê.

[KIP] Kā Gue̍h-niû tiò--khí-lâi

Tē-kiû ê uī-tshinn gue̍h-kiû, ū luā tuā-lia̍p? Nā kah thài-iông-hē lāi-té kî-thann ê uī-tshinn pí, i ê tuā-sè pâi tī tē gōo miâ, thâu sì-miâ sī: Bo̍k-tshinn ê uī-tshinn Bo̍k-uī-sann Ganymede, Thóo-tshinn ê uī-tshinn Thóo-uī-la̍k Titan, Bo̍k-tshinn ê uī-tshinn Thóo-uī-sì Callisto kah Thóo-uī-it Io. Gue̍h-kiû pí Bo̍k-tshinn ê uī-tshinn Thóo-uī-jī Europa kah Hái-ông-tshinn ê uī-tshinn Hái-uī-it Triton, koh-khah tuā-lia̍p. I mā pí é-kiânn-tshinn Bîng-ông-tshinn kah Gé-sîn-tshinn koh-khah tuā-lia̍p. Gue̍h-kiû ê ti̍t-kìng ū 3475 kong-lí, tsha-put-to sī Tē-kiû ê sù-hun-it niā-niā. M̄-koh nā-sī khó-lū bóo-kiânn-tshinn ê tuā-sè, gue̍h-kiû sī siōng tuā-lia̍p ê uī-tshinn. Tī tsit-ê tiām-tsih-tsih ê 8 gue̍h hông-hun hái-huānn, tú peh--khí-lâi ê gue̍h-înn, khuànn--khí-lâi iáu-sī sè-sè-lia̍p, to̍h ká-nā khì hōo kóo-tsá sî-tāi lia̍h-hî ê bāng-á lia̍h-tio̍h kâng-khuán. Tsit-tiunn tn̂g-kiànn-thâu siòng-phìnn, sī tī I-tá-lī Trabocchi hái-huānn ê Adriatic hái hip--ê. Tsit-tiunn tn̂g-kiànn-thâu siòng-phìnn, sī tī I-tá-lī Trabocchi hái-huānn ê Adriatic hái hip--ê.

[English] Fishing for the Moon

How big is planet Earth's Moon? Compared to other moons of the Solar System, it's number 5 on the largest to smallest ranked list, following Jupiter's moon Ganymede, Saturn's moon Titan, and Jovian moons Callisto and Io. Continuing the list, the Moon comes before Jupiter's Europa and Neptune's Triton. It's also larger than dwarf planets Pluto and Eris. With a diameter of 3,475 kilometers the Moon is about 1/4 the size of Earth though, and that does make it the largest moon when compared to the size of its parent Solar System planet. Of course in this serene, twilight sea and skyscape, August's rising Full Moon still appears small enough to be caught in the nets of an ancient fishing rig. The telephoto snapshot was taken along the Italian Costa dei Trabocchi, on the Adriatic Sea.

詞彙學習