孔雀座 ê 大型星系

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：Giant Galaxies in Pavo
• 影像來源 kah 版權: Adam Block
• 台文翻譯：An-Li Tsai (TARA)

[漢羅] 孔雀座 ê 大型星系

倒爿下跤 ê NGC 6872 是一个足大足大 ê 棍螺仔星系，伊 ê 直徑超過 50 萬光年。 伊上無嘛有咱銀河系 ê 5 倍遐爾大，是目前知影 ê 捲螺仔星系內底上大 ê。 這个大型星系佇南天 ê 孔雀座內底，離咱差不多有 2 億光年遠。 伊伸出去 ê 捲螺仔手骨，看起來就親像一隻大隻鳥仔 ê 翅，所以伊嘛叫做「臭頭鳥星系」。 NGC 6872 ê 捲螺仔手骨頂懸是藍色、少年 ê 恆星團 kah 恆星形成區。 伊 ê 捲螺仔手骨會變形，是因為以前 kah 附近 較細粒 ê 星系 IC 4970 產生重力交互作用。 IC 4970 就佇這个大型捲螺仔星系核心 ê 下跤。 佇這幅媠氣 ê 星系群相片內底，閣有南孔雀座星系群 ê 其他星系。 其中上大粒 ê 長株圓星系 NGC 6876，就佇 臭頭鳥星系 ê 正爿頂懸。

[POJ] Khóng-chhiok-chō ê Tōa-hêng seng-hē

Tò-pêng ē-kha ê NGC 6872 sī chi̍t-ê chiok tōa-chiok tōa ê kùn-lê-á seng-hē, i ê ti̍t-kèng chhiau-kòe 50 bān kng-nî. I siōng bô mā ū lán Gîn-hô-hē ê 5 pōe hiah-nī tōa, sī bo̍k-chêng chai-iáⁿ ê kńg-lê-á seng-hē lāi-té siōng tōa--ê. Chit-ê tōa-hêng seng-hē tī lâm-thian ê Khóng-chhiok-chō lāi-té, lī lán chha-put-to ū 2 ek kng-nî hn̄g. I sin-chhut-khì ê kńg-lê-á chhiú-kut, khòaⁿ-khí-lâi to̍h chhin-chhiūⁿ chi̍t-chiah tōa-chiah chiáu-á ê chhì, só͘-í i mā kiò-chò "chhàu-thâu-chiáu seng-hē". NGC 6872 ê kńg-lê-á chhiú-kut téng-kôan sī nâ-sek, siàu-liân ê hêng-chhiⁿ-thoân kah hêng-chhiⁿ hêng-sêng-khu. I ê kńg-lê-á chhiú-kut ē piàn-hêng, sī in-ūi í-chêng kah hū-kīn khah sè-lia̍p ê seng-hē IC 4970 sán-seng tiōng-le̍k kau-hō͘-chok-iōng. IC 4970 to̍h tī chit-ê tōa-hêng kńg-lê-á seng-hē he̍k-sim ê ē-kha. Tī chit-pak súi-khùi ê seng-hē-kûn siòng-phìⁿ lāi-té, koh ū Lâm-khóng-chhiok-chō seng-hē-kûn ê kî-tha seng-hē. Kî-tiong siōng tōa-lia̍p ê tn̂g-chu-îⁿ seng-hē NGC 6876, to̍h tī chhàu-thâu-chiáu seng-hē ê chiàⁿ-pêng téng-kôan.

[KIP] Khóng-tshiok-tsō ê Tuā-hîng sing-hē

Tò-pîng ē-kha ê NGC 6872 sī tsi̍t-ê tsiok tuā-tsiok tuā ê kùn-lê-á sing-hē, i ê ti̍t-kìng tshiau-kuè 50 bān kng-nî. I siōng bô mā ū lán Gîn-hô-hē ê 5 puē hiah-nī tuā, sī bo̍k-tsîng tsai-iánn ê kńg-lê-á sing-hē lāi-té siōng tuā--ê. Tsit-ê tuā-hîng sing-hē tī lâm-thian ê Khóng-tshiok-tsō lāi-té, lī lán tsha-put-to ū 2 ik kng-nî hn̄g. I sin-tshut-khì ê kńg-lê-á tshiú-kut, khuànn-khí-lâi to̍h tshin-tshiūnn tsi̍t-tsiah tuā-tsiah tsiáu-á ê tshì, sóo-í i mā kiò-tsò "tshàu-thâu-tsiáu sing-hē". NGC 6872 ê kńg-lê-á tshiú-kut tíng-kuân sī nâ-sik, siàu-liân ê hîng-tshinn-thuân kah hîng-tshinn hîng-sîng-khu. I ê kńg-lê-á tshiú-kut ē piàn-hîng, sī in-uī í-tsîng kah hū-kīn khah sè-lia̍p ê sing-hē IC 4970 sán-sing tiōng-li̍k kau-hōo-tsok-iōng. IC 4970 to̍h tī tsit-ê tuā-hîng kńg-lê-á sing-hē hi̍k-sim ê ē-kha. Tī tsit-pak suí-khuì ê sing-hē-kûn siòng-phìnn lāi-té, koh ū Lâm-khóng-tshiok-tsō sing-hē-kûn ê kî-tha sing-hē. Kî-tiong siōng tuā-lia̍p ê tn̂g-tsu-înn sing-hē NGC 6876, to̍h tī tshàu-thâu-tsiáu sing-hē ê tsiànn-pîng tíng-kuân.

[English] Giant Galaxies in Pavo

Over 500,000 light years across, NGC 6872 (bottom left) is a truly enormous barred spiral galaxy. At least 5 times the size of our own large Milky Way, NGC 6872 is the largest known spiral galaxy. About 200 million light-years distant toward the southern constellation Pavo, the Peacock, the appearance of this giant galaxy's stretched out spiral arms suggest the wings of a giant bird. So its popular moniker is the Condor galaxy. Lined with massive young, bluish star clusters and star-forming regions, the extended and distorted spiral arms are due to NGC 6872's past gravitational interactions with the nearby smaller galaxy IC 4970, visible here below the giant spiral galaxy's core. Other members of the southern Pavo galaxy group are scattered through this magnificent galaxy group portrait, with the dominant giant elliptical galaxy, NGC 6876, above and right of the soaring Condor galaxy.

詞彙學習