NGC 1309：一个有路用 ê 捲螺仔星系

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：NGC 1309: A Useful Spiral Galaxy
• 影像來源: NASA,ESA,Hubble; 處理:L. Galbany, S. Jha, K. Noll, A. Riess
• 台文翻譯：An-Li Tsai (TARA)

[漢羅] NGC 1309：一个有路用 ê 捲螺仔星系

這个星系，毋但媠，嘛足有路用--ê！ NGC 1309，是一粒足媠 ê 捲螺仔星系，離咱有 1 億光年遐爾遠，tī 波江座 ê 邊仔。 伊 tī 天頂差不多有 6 萬光年遐爾大，大細差不多是咱銀河系 ê 三分二。 藍色、少年 ê 恆星團 kah 塗粉帶 ê 分佈，成做 NGC 1309 ê 捲螺仔手骨，踅中心較老、較黃 ê 恆星咧行。 NGC 1309 毋但是一个足媠 ê 正面捲螺仔星系爾爾，科學家最近觀測伊內底 ê 兩粒超新星 kah 幾若粒造父變星，這會當提來校正宇宙 ê 脹大速度。 你若是欣賞了這粒媠閣大範 ê 星系了後，嘛會當 tī 這張 Hubble 太空望遠鏡 翕--ê 相片內底，繼續欣賞其他較遠 ê 背景星系。

[POJ] NGC 1309: Chi̍t-ê Ū-lō͘-ēng ê Kńg-lê-á Seng-hē

Chit-ê seng-hē, m̄-nā súi, mā chiok ū lō͘-ēng--ê! NGC 1309, sī chi̍t-lia̍p chiok súi ê kńg-lê-á seng-hē, lī lán ū 1 ek kng-nî hiah-nī hn̄g, tī Pho-kang-chō ê piⁿ-á. I tī thiⁿ-téng chha-put-to ū 6 bān kng-nî hiah-nī tōa, tōa-sè chha-put-to sī lán Gîn-hô-hē ê saⁿ-hun-jī. Nâ-sek, siàu-liân ê hêng-chhiⁿ-thoân kah thô͘-hún-tòa ê pun-pò͘, chiâⁿ-chò NGC 1309 ê kńg-lê-á chhiú-kut, se̍h tiong-sim khah lāu, khah n̂g ê hêng-chhiⁿ leh kiâⁿ. NGC 1309 m̄-sī kan-na chi̍t-ê chiok súi ê chiàⁿ-bīn kńg-lê-á seng-hē tiāⁿ-tiāⁿ, kho-ha̍k-ka chòe-kīn koan-chhek i lāi-té ê nn̄g-lia̍p chhiau-sin-chhiⁿ kah kúi-ā-lia̍p Chō-hū piàn-chhiⁿ, che ē-tàng the̍h lâi kàu-chèng ú-tiū ê tiùⁿ-tōa sok-tō͘. Lí nā-sī him-sióng liáu chit-lia̍p súi koh tōa-hoān ê seng-hē liáu-āu, mā ē-tàng tī chit-tiuⁿ Hubble Thài-khong bōng-oán-kiàⁿ hip--ê siòng-phìⁿ lāi-té, kè-sio̍k him-sióng kî-tha khah hn̄g ê pōe-kéng seng-hē.

[KIP] NGC 1309: Tsi̍t-ê Ū-lōo-īng ê Kńg-lê-á Sing-hē

Tsit-ê sing-hē, m̄-nā suí, mā tsiok ū lōo-īng--ê! NGC 1309, sī tsi̍t-lia̍p tsiok suí ê kńg-lê-á sing-hē, lī lán ū 1 ik kng-nî hiah-nī hn̄g, tī Pho-kang-tsō ê pinn-á. I tī thinn-tíng tsha-put-to ū 6 bān kng-nî hiah-nī tuā, tuā-sè tsha-put-to sī lán Gîn-hô-hē ê sann-hun-jī. Nâ-sik, siàu-liân ê hîng-tshinn-thuân kah thôo-hún-tuà ê pun-pòo, tsiânn-tsò NGC 1309 ê kńg-lê-á tshiú-kut, se̍h tiong-sim khah lāu, khah n̂g ê hîng-tshinn leh kiânn. NGC 1309 m̄-sī kan-na tsi̍t-ê tsiok suí ê tsiànn-bīn kńg-lê-á sing-hē tiānn-tiānn, kho-ha̍k-ka tsuè-kīn kuan-tshik i lāi-té ê nn̄g-lia̍p tshiau-sin-tshinn kah kuí-ā-lia̍p Tsō-hū piàn-tshinn, tse ē-tàng the̍h lâi kàu-tsìng ú-tiū ê tiùnn-tuā sok-tōo. Lí nā-sī him-sióng liáu tsit-lia̍p suí koh tuā-huān ê sing-hē liáu-āu, mā ē-tàng tī tsit-tiunn Hubble Thài-khong bōng-uán-kiànn hip--ê siòng-phìnn lāi-té, kè-sio̍k him-sióng kî-tha khah hn̄g ê puē-kíng sing-hē.

[English] NGC 1309: A Useful Spiral Galaxy

This galaxy is not only pretty -- it's useful. A gorgeous spiral some 100 million light-years distant, NGC 1309 lies on the banks of the constellation of the River (Eridanus). NGC 1309 spans about 60,000 light-years, making it about two-thirds the size of our larger Milky Way galaxy. Bluish clusters of young stars and dust lanes are seen to trace out NGC 1309's spiral arms as they wind around an older yellowish star population at its core. Not just another pretty face-on spiral galaxy, observations of NGC 1309's two recent supernovas and multiple Cepheid variable stars contribute to the calibration of the expansion of the Universe. Still, after you get over this beautiful galaxy's grand design, check out the array of more distant background galaxies also recorded in this sharp image from the Hubble Space Telescope.

詞彙學習