Ùi 英仙座 來--ê 流星雨

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：Perseids from Perseus
• 影像來源 kah 版權: Marcin Rosadziński
• 台文翻譯：An-Li Tsai (TARA)

[漢羅] Ùi 英仙座 來--ê 流星雨

這寡流星是 ùi 佗位來--ê？ 你若是 leh 問 in ùi 天頂佗一个方向來--ê？ 當然就是 英仙座。 這就是是按怎 咱 kā 這陣 今仔日暗暝出現上濟 ê 流星雨，叫做 英仙座流星雨，因為這寡流星看起來攏是 ùi 英仙座內底 ê 輻射點來--ê。 毋過，你嘛有可能 leh 問 in 是按怎產生--ê？ 英仙座流星雨 ê 沙粒屑仔，是 ùi 彗星 Swift-Tuttle 來--ê。 這粒彗星踅咱 ê 太陽咧行，地球行過伊 ê 軌道 ê 時陣，留 tī 軌道頂懸 ê 屑仔 拄仔好 kah 英仙座 tī 仝一个方向。 所以，這寡屑仔 ê 輻射點，看起來 to̍h 會 tī 英仙座內底。 這張合成影像，是 2024 年 8 月 ê 英仙座流星雨上濟 彼陣翕--ê。 這是 kā 6 暗 ê 相片疊做伙 ê 影像，內底攏總有 100 外粒流星。 這寡光爍爍 ê 流星，就出現 tī 波蘭 Bieszczady 山脈 ê 天頂。 今年 ê 英仙座流星雨，本來應該是一年當中 上精彩 ê 天文景色。 毋過 tī 誠濟地區，日落了後無偌久，月娘就 peh 起來矣，kah 伊有通比並。

[POJ] Ùi Eng-sian-chō lâi--ê Liû-chhiⁿ-hō͘

Chit-kóa liû-chhiⁿ sī ùi tó-ūi lâi--ê? Lí nā-sī leh mn̄g in ùi thiⁿ-téng tó chi̍t-ê hong-hiòng lâi--ê? Tong-jiân to̍h-sī Eng-sian-chō. Che to̍h sī sī-án-chóaⁿ lán kā chit-tīn kin-á-ji̍t àm-mî chhut-hiān siōng-chōe ê liû-chhiⁿ-hō͘, kiò-chò Eng-sian-chō liû-chhiⁿ-hō͘, in-ūi chit-kóa liû-chhiⁿ khòaⁿ--khí-lâi lóng sī ùi Eng-sian-chō lāi-té ê hok-siā-tiám lâi--ê. M̄-koh, lí mā ū khó-lêng leh mn̄g in sī-án-chóaⁿ sán-seng--ê? Eng-sian-chō liû-chhiⁿ-hō͘ ê sua-lia̍p sap-á, sī ùi hūi-chhiⁿ Swift-Tuttle lâi--ê. Chit-lia̍p hūi-chhiⁿ se̍h lán ê thài-iông leh kiâⁿ, Tē-kiû kiâⁿ-kòe i ê kúi-tō ê sî-chūn, lâu tī kúi-tō téng-kôan ê sap-á tú-á-hó kah Eng-sian-chō tī kâng chi̍t-ê hong-hiòng. Só͘-í, chit-kóa sap-á ê hok-siā-tiám, khòaⁿ--khí-lâi to̍h ē tī Eng-sian-chō lāi-té. Chit-tiuⁿ ha̍p-sêng iáⁿ-siòng, sī 2024 nî 8 go̍eh ê Eng-sian-chō liû-chhiⁿ-hō͘ siōng-chōe hit-chūn hip--ê. Che sī kā 6 àm ê siòng-phìⁿ tha̍h chò-hóe ê iáⁿ-siōng, lāi-té lóng-chóng ū 100 gōa lia̍p liû-chhiⁿ. Chit-kóa kng-sih-sih ê liû-chhiⁿ, to̍h chhut-hiān tī Pho-lân Bieszczady soaⁿ-me̍h ê thiⁿ-téng. Kin-nî ê Eng-sian-chō liû-chhiⁿ-hō͘, pún-lâi eng-kai sī chi̍t-nî tang-tiong siōng cheng-chhái ê thian-bûn kéng-sek. M̄-koh tī chiâⁿ-chōe tē-khu, ji̍t-lo̍h liáu-āu bô-jōa-kú, goe̍h-niû to̍h peh--khí-lâi--ah, kah i ū thong pí-pēng.

[KIP] Uì Ing-sian-tsō lâi--ê Liû-tshinn-hōo

Tsit-kuá liû-tshinn sī uì tó-uī lâi--ê? Lí nā-sī leh mn̄g in uì thinn-tíng tó tsi̍t-ê hong-hiòng lâi--ê? Tong-jiân to̍h-sī Ing-sian-tsō. Tse to̍h sī sī-án-tsuánn lán kā tsit-tīn kin-á-ji̍t àm-mî tshut-hiān siōng-tsuē ê liû-tshinn-hōo, kiò-tsò Ing-sian-tsō liû-tshinn-hōo, in-uī tsit-kuá liû-tshinn khuànn--khí-lâi lóng sī uì Ing-sian-tsō lāi-té ê hok-siā-tiám lâi--ê. M̄-koh, lí mā ū khó-lîng leh mn̄g in sī-án-tsuánn sán-sing--ê? Ing-sian-tsō liû-tshinn-hōo ê sua-lia̍p sap-á, sī uì huī-tshinn Swift-Tuttle lâi--ê. Tsit-lia̍p huī-tshinn se̍h lán ê thài-iông leh kiânn, Tē-kiû kiânn-kuè i ê kuí-tō ê sî-tsūn, lâu tī kuí-tō tíng-kuân ê sap-á tú-á-hó kah Ing-sian-tsō tī kâng tsi̍t-ê hong-hiòng. Sóo-í, tsit-kuá sap-á ê hok-siā-tiám, khuànn--khí-lâi to̍h ē tī Ing-sian-tsō lāi-té. Tsit-tiunn ha̍p-sîng iánn-siòng, sī 2024 nî 8 gue̍h ê Ing-sian-tsō liû-tshinn-hōo siōng-tsuē hit-tsūn hip--ê. Tse sī kā 6 àm ê siòng-phìnn tha̍h tsò-hué ê iánn-siōng, lāi-té lóng-tsóng ū 100 guā lia̍p liû-tshinn. Tsit-kuá kng-sih-sih ê liû-tshinn, to̍h tshut-hiān tī Pho-lân Bieszczady suann-me̍h ê thinn-tíng. Kin-nî ê Ing-sian-tsō liû-tshinn-hōo, pún-lâi ing-kai sī tsi̍t-nî tang-tiong siōng tsing-tshái ê thian-bûn kíng-sik. M̄-koh tī tsiânn-tsuē tē-khu, ji̍t-lo̍h liáu-āu bô-juā-kú, gue̍h-niû to̍h peh--khí-lâi--ah, kah i ū thong pí-pīng.

[English] Perseids from Perseus

Where are all of these meteors coming from? In terms of direction on the sky, the pointed answer is the constellation of Perseus. That is why the meteor shower that peaks tonight is known as the Perseids -- the meteors all appear to come from a radiant toward Perseus. In terms of parent body, though, the sand-sized debris that makes up the Perseids meteors come from Comet Swift-Tuttle. The comet follows a well-defined orbit around our Sun, and the part of the orbit that approaches Earth is superposed in front of Perseus. Therefore, when Earth crosses this orbit, the radiant point of falling debris appears in Perseus. Featured here, a composite image taken over six nights and containing over 100 meteors from 2024 August Perseids meteor shower shows many bright meteors that streaked over the Bieszczady Mountains in Poland. This year's Perseids, usually one of the best meteor showers of the year, will compete with a bright moon that will rise, for many locations, soon after sunset.

詞彙學習