英仙座內底 ê 雙星團

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：The Double Cluster in Perseus
• 影像來源 kah 版權: Ron Brecher
• 台文翻譯：An-Li Tsai (TARA)

[漢羅] 英仙座內底 ê 雙星團

這个美麗 ê 星場是 tī 北天星座 英仙座 內底，tī 天頂 ê 範圍差不多有三粒月娘遐爾大 (1.5 度)。 內底有兩个出名 ê 開放星團：英仙座 η kah 英仙座 χ。 正爿彼个星團 ê 編號是 NGC 869，倒爿彼个星團 ê 編號是 NGC 884。 In 離咱差不多 7000 光年遠，內底 ê 恆星是比太陽閣較少年、溫度嘛較懸。 這兩个星團 ê 距離互相差幾若百光年爾爾，若照 in 家己 ê 年歲來看，in 攏是 1300 萬歲，這嘛證明這兩个星團可能是 ùi 仝一个恆星形成區來--ê。 這个雙星團，用雙筒千里鏡抑是細台天文望遠鏡來看，攏是足媠 ê 景色。 你若是 tī 暗眠摸 ê 所在，直接用目睭就看會著。

[POJ] Eng-sian-chō lāi-té ê Siang Seng-thoân

Chit-ê bí-lē ê seng-tiûⁿ sī tī pak-thian seng-chō Eng-sian-chō lāi-té, tī thiⁿ-téng ê hoān-ûi chha-put-to ū saⁿ lia̍p goe̍h-niû hiah-nī tōa (1.5 tō͘). Lāi-té ū nn̄g-ê chhut-miâ ê khai-hòng seng-thoân: Eng-sian-chō η kah Eng-sian-chō χ. Chiàⁿ-pêng hit-ê seng-thoân ê pian-hō sī NGC 869, tò-pêng hit-ê seng-thoân ê pian-hō sī NGC 884. In lī lán chha-put-to 7000 kng-nî hn̄g, lāi-té ê hêng-chhiⁿ sī pí thài-iông koh-khah siàu-liân, un-tō͘ mā khah koân. Chit nn̄g-ê seng-thoân ê kī-lî hō͘-siong chha kúi-nā pah kng-nî niā-niā, nā chiàu in ka-kī ê nî-hòe lâi-khòaⁿ, in lóng sī 1300 bān-hòe, che mā chèng-bêng chit nn̄g-ê seng-thoân khó-lêng sī ùi kāng chi̍t-ê hêng-chhiⁿ hêng-sêng-khu lâi--ê. Chit-ê siang seng-thoân, iōng siang-tâng chhian-lí-kiàⁿ ia̍h-sī sè-tâi thian-bûn bōng-oán-kiàⁿ lâi-khòaⁿ, lóng sī chiok súi ê kéng-sek. Lí nā-sī tī àm-bîn-bong ê só͘-chāi, ti̍t-chiap iōng ba̍k-chiu tō khòaⁿ-ē-tio̍h.

[KIP] Ing-sian-tsō lāi-té ê Siang Sing-thuân

Tsit-ê bí-lē ê sing-tiûnn sī tī pak-thian sing-tsō Ing-sian-tsō lāi-té, tī thinn-tíng ê huān-uî tsha-put-to ū sann lia̍p gue̍h-niû hiah-nī tuā (1.5 tōo). Lāi-té ū nn̄g-ê tshut-miâ ê khai-hòng sing-thuân: Ing-sian-tsō η kah Ing-sian-tsō χ. Tsiànn-pîng hit-ê sing-thuân ê pian-hō sī NGC 869, tò-pîng hit-ê sing-thuân ê pian-hō sī NGC 884. In lī lán tsha-put-to 7000 kng-nî hn̄g, lāi-té ê hîng-tshinn sī pí thài-iông koh-khah siàu-liân, un-tōo mā khah kuân. Tsit nn̄g-ê sing-thuân ê kī-lî hōo-siong tsha kuí-nā pah kng-nî niā-niā, nā tsiàu in ka-kī ê nî-huè lâi-khuànn, in lóng sī 1300 bān-huè, tse mā tsìng-bîng tsit nn̄g-ê sing-thuân khó-lîng sī uì kāng tsi̍t-ê hîng-tshinn hîng-sîng-khu lâi--ê. Tsit-ê siang sing-thuân, iōng siang-tâng tshian-lí-kiànn ia̍h-sī sè-tâi thian-bûn bōng-uán-kiànn lâi-khuànn, lóng sī tsiok suí ê kéng-sik. Lí nā-sī tī àm-bîn-bong ê sóo-tsāi, ti̍t-tsiap iōng ba̍k-tsiu tō khuànn-ē-tio̍h.

[English] The Double Cluster in Perseus

This stunning starfield spans about three full moons (1.5 degrees) across the heroic northern constellation of Perseus. It holds the famous pair of open star clusters, h and Chi Persei. Also cataloged as NGC 869 (right) and NGC 884, both clusters are about 7, 000 light-years away and contain stars much younger and hotter than the Sun. Separated by only a few hundred light-years, the clusters are both 13 million years young based on the ages of their individual stars, evidence that both clusters were likely a product of the same star-forming region. Always a rewarding sight in binoculars or small telescopes, the Double Cluster is even visible to the unaided eye from dark locations.

詞彙學習