火金蛄、流星 kah 銀河

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：Fireflies, Meteors, and Milky Way
• 影像來源 kah 版權: Daniel Korona
• 台文翻譯：An-Li Tsai (TARA)

[漢羅] 火金蛄、流星 kah 銀河

這張相片是 tī 7 月 29 kah 7 月 30 翕--ê，伊是 kā 連紲感光 ê 相片疊做伙，創出這張北半球熱天暗暝 ê 景色。 遮是墨西哥中部 ê Sierra de Órganos 國家公園，光 iàⁿ-iàⁿ ê 銀河 tī 地平線頂懸畫一條線，前景有足濟火金蛄 tī 遐咧爍咧爍咧。 這張縮時攝影 ê 相片內底，倒爿頂懸 ê 光巡，就是寶瓶座 δ 流星雨 ê 流星。 寶瓶座 δ 流星雨 定定 tī 8 月 ê 暗暝出現，嘛 kah 較出名 ê 英仙座流星雨 時間相疊。 今年 8 月初 暗暝翻點了後，拄著無月娘 ê 暗暝，就是觀星人 ê 機會。 毋過，咱欲按怎分寶瓶座 δ 流星 kah 英仙座流星呢？ 英仙座流星 ê 流星光巡，會集中 tī 英仙座內底 ê 一个點，咱 kā 叫做 輻射點。 寶瓶座 δ 流星，是 ùi 較南爿 ê 寶瓶座來--ê，to̍h tī 這幅圖 ê 倒爿頂懸。 是講，tī 北半球 ê 熱天暗暝，咱閣會當看著火金蛄 ê 光。 毋過，欲按怎分火金蛄 kah 流星咧？ 你家己去掠看覓 to̍h 知。

[POJ] Hóe-kim-ko͘, Liû-chhiⁿ kah Gîn-hô

Chit-tiuⁿ siòng-phìⁿ sī tī 7 goe̍h 29 kah 7 goe̍h 30 hip--ê, i sī kā liân-sòa kám-kng ê siòng-phìⁿ tha̍h chò-hóe, chhòng chhut chit-tiuⁿ Pak-pòaⁿ-kiû joa̍h-thiⁿ àm-mê ê kéng-sek. Chia sī Be̍k-se-ko tiong-pō͘ ê Sierra de Órganos kok-ka-kong-hn̂g, kng-iàⁿ-iàⁿ ê Gîn-hô tī tē-pêng-sòaⁿ téng-koân ōe chi̍t tiâu sòaⁿ, chiân-kéng ū chiok chōe hóe-kim-ko͘ tī-hia leh sih-leh sih-leh. Chit-tiuⁿ sok-sî-liap-iáⁿ ê siòng-phìⁿ lāi-té, tò-pêng téng-koân ê kng-sûn, tio̍h-sī Pó-pân-chō δ liû-chhiⁿ-hō͘ ê liû-chhiⁿ. Pó-pân-chō δ liû-chhiⁿ-hō͘ tiāⁿ-tiāⁿ tī 8 goe̍h ê àm-mê chhut-hiān, mā kah khah chhut-miâ ê Eng-sian-chō liû-chhiⁿ-hō͘ sî-kan sio-tha̍h. Kin-nî 8 goe̍h-chhe àm-mê hoan-tiám liáu-āu, tú tio̍h-bô goe̍h-niû ê àm-mê, tio̍h-sī koan-chhiⁿ lâng ê ki-hōe. M̄-koh, lán beh án-nóa hun Pó-pân-chō δ liû-chhiⁿ kah Eng-sian-chō liû-chhiⁿ neh? Eng-sian-chō liû-chhiⁿ ê liû-chhiⁿ kng-sûn, ē chi̍p-tiong tī Eng-sian-chō lāi-té ê chi̍t-ê tiám, lán kā kiò-chò hok-siā-tiám. Pó-pân-chō δ liû-chhiⁿ, sī ùi khah lâm-pêng ê Pó-pân-chō lâi--ê, to̍h tī chit pak tô͘ ê tò-pêng téng-koân. Sī-kóng, tī Pak-pòaⁿ-kiû ê loa̍h-thiⁿ àm-mî, lán koh ē-tàng khòaⁿ-tio̍h hóe-kim-ko͘ ê kng. M̄-koh, beh án-nóa hun hóe-kim-ko͘ kah liû-chheⁿ leh? Lí ka-kī khì lia̍h khòaⁿ-māi to̍h chai.

[KIP] Hué-kim-koo, Liû-tshinn kah Gîn-hô

Tsit-tiunn siòng-phìnn sī tī 7 gue̍h 29 kah 7 gue̍h 30 hip--ê, i sī kā liân-suà kám-kng ê siòng-phìnn tha̍h tsò-hué, tshòng tshut tsit-tiunn Pak-puànn-kiû jua̍h-thinn àm-mê ê kíng-sik. Tsia sī Bi̍k-se-ko tiong-pōo ê Sierra de Órganos kok-ka-kong-hn̂g, kng-iànn-iànn ê Gîn-hô tī tē-pîng-suànn tíng-kuân uē tsi̍t tiâu suànn, tsiân-kíng ū tsiok tsuē hué-kim-koo tī-hia leh sih-leh sih-leh. Tsit-tiunn sok-sî-liap-iánn ê siòng-phìnn lāi-té, tò-pîng tíng-kuân ê kng-sûn, tio̍h-sī Pó-pân-tsō δ liû-tshinn-hōo ê liû-tshinn. Pó-pân-tsō δ liû-tshinn-hōo tiānn-tiānn tī 8 gue̍h ê àm-mê tshut-hiān, mā kah khah tshut-miâ ê Ing-sian-tsō liû-tshinn-hōo sî-kan sio-tha̍h. Kin-nî 8 gue̍h-tshe àm-mê huan-tiám liáu-āu, tú tio̍h-bô gue̍h-niû ê àm-mê, tio̍h-sī kuan-tshinn lâng ê ki-huē. M̄-koh, lán beh án-nuá hun Pó-pân-tsō δ liû-tshinn kah Ing-sian-tsō liû-tshinn neh? Ing-sian-tsō liû-tshinn ê liû-tshinn kng-sûn, ē tsi̍p-tiong tī Ing-sian-tsō lāi-té ê tsi̍t-ê tiám, lán kā kiò-tsò hok-siā-tiám. Pó-pân-tsō δ liû-tshinn, sī uì khah lâm-pîng ê Pó-pân-tsō lâi--ê, to̍h tī tsit pak tôo ê tò-pîng tíng-kuân. Sī-kóng, tī Pak-puànn-kiû ê lua̍h-thinn àm-mî, lán koh ē-tàng khuànn-tio̍h hué-kim-koo ê kng. M̄-koh, beh án-nuá hun hué-kim-koo kah liû-tshenn leh? Lí ka-kī khì lia̍h khuànn-māi to̍h tsai.

[English] Fireflies, Meteors, and Milky Way

Taken on July 29 and July 30, a registered and stacked series of exposures creates this dreamlike view of a northern summer night. Multiple firefly flashes streak across the foreground as the luminous Milky Way arcs above the horizon in the Sierra de Órganos national park of central Mexico. The collection of bright streaks aligned across the sky toward the upper left in the timelapse image are Delta Aquariid meteors. Currently active, the annual Delta Aquariid meteor shower shares August nights though, overlapping with the better-known Perseid meteor shower. This year that makes post-midnight, mostly moonless skies in early August very popular with late night skygazers. How can you tell a Delta Aquariid from a Perseid meteor? The streaks of Perseid meteors can be traced back to an apparent radiant in the constellation Perseus. Delta Aquariids appear to emerge from the more southerly constellation Aquarius, beyond the top left of this frame. Of course, the bioluminescent flashes of fireflies are common too on these northern summer nights. But how can you tell a firefly from a meteor? Just try to catch one.

詞彙學習