螺旋星雲 ê 深空影像

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：A Helix Nebula Deep Field
• 影像來源 kah 版權: George Chatzifrantzis
• Portal Universe: Random APOD Generator
• 台文翻譯：An-Li Tsai (TARA)

[漢羅] 螺旋星雲 ê 深空影像

螺旋星雲有咧看你無？ 無啦，伊毋是生物，所以袂 kā 你看，毋過伊看起來確實有成一粒目睭。 螺旋星雲 會號做這个名，嘛是因為你咧看伊 ê 時陣，就親像你 ùi 螺旋軸看落去。 實際上，這馬咱已經知影伊 ê 幾何形體，實在是足複雜--ê，有放射方向 ê 雲絲結構 kah 湠出去 ê 環形結構。 螺旋星雲 (編號 NGC 7293) 是所有行星形星雲內底，上光、kah 咱上倚--ê。 行星形星雲是一粒 類太陽恆星 tī 伊生命上尾仔 ê 時陣產生 ê 氣體雲。 演化到落尾，中央賰落來 ê 恆星核 會變做一粒白矮星。 伊發出 ê 光，能量足懸--ê，懸甲會 kā 進前噴出來 ê 氣體，激出螢光。 這張相片 是用紅色、青色、藍色 三款色翕--ê，毋過主要 ê 光是 ùi 水素氣體來--ê。 相片是 tī 希臘 用私人望遠鏡，翕 12 點鐘久才翕著 ê。 螺旋星雲 內緣 ê 特寫，有看著足複雜 ê 氣體丸，in ê 起源到今猶閣咧研究。

[POJ]

[KIP] Lôo-suân-sing-hûn ê tshim khang iánn-siōng

Lôo-suân-sing-hûn ū leh khuànn lí bô? Bô-lah, i m̄-sī sing-bu̍t, sóo-í bē kā lí khuànn, m̄-koh i khuànn--khí-lâi khak-si̍t ū sîng tsi̍t-lia̍p ba̍k-tsiu. Lôo-suân-sing-hûn ē hō-tsò tsit-ê miâ, mā-sī in-uī lí leh khuànn i ê sî-tsūn, tō tshin-tshiūnn lí uì lôo-suân-tio̍k khuànn lo̍h-khì. si̍t-tsè-siōng, tsit-má lán í-king tsai-iánn i ê kí-hô hîng-thé, si̍t-tsāi sī tsiok ho̍k-tsa̍p--ê, ū hòng-siā hong-hiòng ê hûn si kiat-kòo kah thuànn tshut-khì ê khuân hîng kiat-kòo. Lôo-suân-sing-hûn(pian-hō NGC 7293)sī sóo-ū hîng-tshinn hîng tshenn hûn lāi-té, siōng kng, kah lán siāng uá--ê. hîng-tshinn hîng tshenn hûn sī tsi̍t-lia̍p luī thài-iông hîng-tshinn tī i sing-bīng siōng-bué-á ê sî-tsūn sán-sing ê khì-thé hûn. ián-huà kàu lo̍h-bué, tiong-ng tshun lo̍h-lâi ê hîng-tshinn hu̍t ē piàn-tsò tsi̍t-lia̍p pe̍h é tshenn. I huat-tshut ê kng, lîng-liōng tsiok kuân--ê, kuân kah ē kā tsìn-tsîng phùn tshut-lâi ê khì-thé, kik tshut hîng kng. tsit-tiunn siòng-phìnn sī iōng âng-sik, tshenn-sik, nâ-sik sann khuán sik hip--ê, m̄-koh tsú-iàu ê kng sī uì tsuí sòo khì-thé lâi--ê. siòng-phìnn sī tī Hi-lia̍p iōng su-jîn bōng-uán-kiànn, hip 12 tiám-tsing kú tsiah hip-tio̍h ê. Lôo-suân-sing-hûn-lāi iân ê ti̍k siá, ū khuànn-tio̍h tsiok ho̍k-tsa̍p ê khì-thé uân, in ê khí-guân kàu-tann iah-koh-teh gián-kiù.

[English] A Helix Nebula Deep Field

Is the Helix Nebula looking at you? No, not in any biological sense, but it does look quite like an eye. The Helix Nebula is so named because it also appears that you are looking down the axis of a helix. In actuality, it is now understood to have a surprisingly complex geometry, including radial filaments and extended outer loops. The Helix Nebula (aka NGC 7293) is one of brightest and closest examples of a planetary nebula, a gas cloud created at the end of the life of a Sun-like star. The remnant central stellar core, destined to become a white dwarf star, glows in light so energetic it causes the previously expelled gas to fluoresce. The featured picture, taken in red, green, and blue but highlighted by light emitted primarily by hydrogen was created from 12 hours of exposure through a personal telescope located in Greece. A close-up of the inner edge of the Helix Nebula shows complex gas knots the origin of which are still being researched.

詞彙學習