累積十二年 ê 天鵝座 Kappa 流星雨

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：Twelve Years of Kappa Cygnids
• 影像來源 kah 版權: Petr Horálek, Josef Kujal, Tomáš Slovinský;Acknowledgement:Mahdi Zamani
• 台文翻譯：An-Li Tsai (TARA)

[漢羅] 累積十二年 ê 天鵝座 Kappa 流星雨

這張利用縮時攝影技術合成 ê 影像，有翕著天鵝座 Kappa 流星雨 ê 流星。 這个小型流星雨 ê 輻射點 離天鵝座 Kappa 無偌遠，會佇 8 月中出現上濟，出現 ê 時間差不多 tī 英仙座流星雨前後。 英仙座流星雨 ê 流星較濟、所以伊較有名、較濟人看。 毋過，天鵝座 Kappa 流星雨上濟嘛干焦一點鐘 3 粒爾爾，較無英仙座流星雨 ê 數量遐爾濟。 為著欲翕著幾若十粒 ê 天鵝座 Kappa 流星，才有這个長期天文攝影計畫。 這个計畫，kā 2012 年到 2024 年，攏總 51 張 8 月暗暝 ê 流星相片疊做伙。 這寡相片大部分攏是 tī 2021 年 8 月翕--ê，是其中流星雨較濟 ê 7 冬內底，活動量上懸 ê 一冬。 這 12 冬來所有 ê 天鵝座 Kappa 流星，攏是 tī 希臘 Crete 島 ê Elafonisi 海岸 翕--ê。 背景是咱 ê 銀河 kah 海岸，仝款是 tī 2021 年 8 月翕--ê。

[POJ] Lúi-chek 12 nî ê Thian-gô-chō Kappa Liû-chhiⁿ-hō͘

Chit-tiuⁿ lī-iōng sok-sî liap-iáⁿ ki-su̍t ha̍p-sêng ê iáⁿ-siōng, ū hip-tio̍h Thian-gô-chō Kappa liû-chhiⁿ-hō͘ ê liû-chhiⁿ. Chit-ê sió-hêng liû-chhiⁿ-hō͘ ê hok-siā-tiám lī Thian-gô-chō Kappa bô gōa hn̄g, ē tī 8 goe̍h-tiong chhut-hiān siōng-chē, chhut-hiān ê sî-kan chha-put-to tī Eng-sian-chō liû-chhiⁿ-hō͘ chêng-āu. Eng-sian-chō liû-chhiⁿ-hō͘ ê liû-chhiⁿ khah-chè, só͘-í i khah ū-miâ, khah-chē lâng khòaⁿ. M̄-koh, Thian-gô-chō Kappa liû-chhiⁿ-hō͘ siōng-chē mā kan-na chi̍t tiám-cheng 3 lia̍p niā-niā, khah bô Eng-sian-chō liû-chhiⁿ-hō͘ ê sò͘-liōng hiah-nī chē. Ūi tio̍h-beh hip-tio̍h kúi-nā-cha̍p lia̍p ê Thian-gô-chō Kappa liû-chhiⁿ, chiah ū chit-ê tn̂g-kî thian-bûn liap-iáⁿ kè-ōe. Chit-ê kè-ōe, kā 2012 nî kàu 2024 nî, lóng-chóng 51 tiuⁿ 8 goe̍h àm-mî ê liû-chhiⁿ siòng-phìⁿ tha̍h chò-hóe. Chit kóa siòng-phìⁿ tōa-pō͘-hūn lóng sī tī 2021 nî 8 goe̍h hip--ê, sī kî-tiong liû-chhiⁿ-hō͘ khah-chē ê 7 tang lāi-té, oa̍h-tāng liōng siōng koân ê chi̍t tang. Che 12 tang lâi só͘-ū ê Thian-gô-chō Kappa liû-chhiⁿ, lóng sī tī Hi-lia̍p Crete tó ê Elafonisi hái-hōaⁿ hip--ê. Pōe-kéng sī lán ê Gîn-hô kah hái-hōaⁿ, kâng-khoán sī tī 2021 nî 8 goe̍h hip--ê.

[KIP] Luí-tsik 12 nî ê Thian-gô-tsō Kappa Liû-tshinn-hōo

Tsit-tiunn lī-iōng sok-sî liap-iánn ki-su̍t ha̍p-sîng ê iánn-siōng, ū hip-tio̍h Thian-gô-tsō Kappa liû-tshinn-hōo ê liû-tshinn. Tsit-ê sió-hîng liû-tshinn-hōo ê hok-siā-tiám lī Thian-gô-tsō Kappa bô guā hn̄g, ē tī 8 gue̍h-tiong tshut-hiān siōng-tsē, tshut-hiān ê sî-kan tsha-put-to tī Ing-sian-tsō liû-tshinn-hōo tsîng-āu. Ing-sian-tsō liû-tshinn-hōo ê liû-tshinn khah-tsè, sóo-í i khah ū-miâ, khah-tsē lâng khuànn. M̄-koh, Thian-gô-tsō Kappa liû-tshinn-hōo siōng-tsē mā kan-na tsi̍t tiám-tsing 3 lia̍p niā-niā, khah bô Ing-sian-tsō liû-tshinn-hōo ê sòo-liōng hiah-nī tsē. Uī tio̍h-beh hip-tio̍h kuí-nā-tsa̍p lia̍p ê Thian-gô-tsō Kappa liû-tshinn, tsiah ū tsit-ê tn̂g-kî thian-bûn liap-iánn kè-uē. Tsit-ê kè-uē, kā 2012 nî kàu 2024 nî, lóng-tsóng 51 tiunn 8 gue̍h àm-mî ê liû-tshinn siòng-phìnn tha̍h tsò-hué. Tsit kuá siòng-phìnn tuā-pōo-hūn lóng sī tī 2021 nî 8 gue̍h hip--ê, sī kî-tiong liû-tshinn-hōo khah-tsē ê 7 tang lāi-té, ua̍h-tāng liōng siōng kuân ê tsi̍t tang. Tse 12 tang lâi sóo-ū ê Thian-gô-tsō Kappa liû-tshinn, lóng sī tī Hi-lia̍p Crete tó ê Elafonisi hái-huānn hip--ê. Puē-kíng sī lán ê Gîn-hô kah hái-huānn, kâng-khuán sī tī 2021 nî 8 gue̍h hip--ê.

[English] Twelve Years of Kappa Cygnids

Meteors from the Kappa Cygnid meteor shower are captured in this time-lapse composite skyscape. The minor meteor shower, with a radiant not far from its eponymous star Kappa Cygni, peaks in mid-August, almost at the same time as the much better-known and better-observed Perseid meteor shower. But, seen to have a peak rate of only about 3 meteors per hour, Kappa Cygnids are vastly outnumbered by the more popular, prolific Perseid shower's meteors that emanate from the heroic constellation Perseus. To capture dozens of Kappa Cygnids, this long term astro-imaging project compiled meteors in exposures selected from over 51 August nights during the years 2012 through 2024. Most of the exposures with identified Kappa Cygnid meteors were made in August 2021, a high point of the shower's known 7-year activity cycle. All twelve years worth of Kappa Cygnids are registered against a base sea and night skyscape of the Milky Way above Elafonisi Beach, Crete, Greece, also recorded in August of 2021.

詞彙學習