土衛六 Titan ê 烏影 凌土星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：Titan Shadow Transit
• 影像來源 kah 版權: Volodymyr Andrienko
• 台文翻譯：An-Li Tsai (TARA)

[漢羅] 土衛六 Titan ê 烏影 凌土星

土星環面對咱 ê 角度逐年攏會無仝，差不多每 15 冬一个週期。 今年 ê 角度看起來就親像土星環消失去矣。 這个足光足媠 ê 土星環系統，若是愈來愈狹、愈來愈暗，地球頂懸 ê 人就愈來愈無法度看著伊。 毋過，這嘛予咱一个好機會，會當觀察土星 ê 衛星 ùi 伊面頭前行過，看伊 ê 烏影是按怎閘著這粒有環、足光 ê 氣體巨行星。 這个現象，就叫做 凌土星。 是講，土星上大粒 ê 衛星 土衛六 Titan，是上好觀察 ê 對象。 佇這張 7 月 18 翕--ê 望遠鏡相片內底，Titan 是 tī 相片 ê 倒爿頂懸。 伊 ê 烏影就投影 tī 土星環 頂懸 彼粒烏烏 ê 圓點。 事實上，這馬是 Titan ê 烏影 凌土星 ê 季節，每 16 工就會出現一擺。 Titan 上尾一擺 ê 烏影 凌土星 會發生 tī 10 月 6 號。 毋過，若是用望遠鏡看，Titan 本身猶會繼續 每 16 工 ùi 土星面頭前行過，一直到 2026 年 1 月 25 為止。

[POJ] Thó͘-ōe-la̍k Titan ê O͘-iáⁿ lêng Thó͘-chheⁿ

Thó͘-chheⁿ-khoân bīn-tùi lán ê kak-tō͘ ta̍k-nî lóng ē bô-kâng, chha-put-to múi 15 tang chi̍t-ê chiu-kî. Kin-nî ê kak-tō͘ khòaⁿ-khí-lâi tō chhin-chhiūⁿ Thó͘-chheⁿ-khoân siau-sit khì-ah. Chit-ê chiok kng chiok súi ê Thó͘-chheⁿ-khoân hē-thóng, nā-sī lú-lâi-lú e̍h, lú-lâi-lú àm, Tē-kiû téng-koân ê lâng tō lú-lâi-lú bô-hoat-tō͘ khòaⁿ-tio̍h i. M̄-koh, che mā hō͘ lán chi̍t-ê hó ki-hōe, ē-tàng koan-chhat Thó͘-chheⁿ ê ōe-chheⁿ ùi i bīn-thâu-chêng kiâⁿ-kòe, khòaⁿ i ê o͘-iáⁿ sī-án-chóaⁿ cha̍h-tio̍h chit lia̍p ū khoân, chiok kng ê khì-thé kū-kiâⁿ-chheⁿ. Chit-ê hiān-siōng, tō kiò-chò lêng Thó͘-chheⁿ. Sī-kóng, Thó͘-chheⁿ siōng tōa-lia̍p ê ūi-chheⁿ Thó͘-ōe-la̍k Titan, sī siōng-hó koan-chhat ê tùi-siōng. Tī chit-tiuⁿ 7 goe̍h 18 hip--ê bōng-oán-kiàⁿ siòng-phìⁿ lāi-té, Titan sī tī siòng-phìⁿ ê tò-pêng téng-koân. I ê o͘-iáⁿ tō tâu-iáⁿ tī Thó͘-chheⁿ-khoân téng-koân hit lia̍p o͘-o͘ ê îⁿ tiám. Sū-si̍t-siōng, chit-má sī Titan ê o͘-iáⁿ lêng Thó͘-chheⁿ ê kùi-cheh, múi 16 kang tō ē chhut-hiān chi̍t-pái. Titan siōng-bóe chi̍t-pái ê o͘-iáⁿ lêng Thó͘-chheⁿ ē hoat-seng tī 10 goe̍h 6 hō. M̄-koh, nā-sī iōng bōng-oán-kiàⁿ khòaⁿ, Titan pún-sin iáu ē kè-sio̍k múi 16 kang ùi Thó͘-chheⁿ bīn-thâu-chêng kiâⁿ-kòe, it-ti̍t kàu 2026 nî 1 goe̍h 25 ûi-chí.

[KIP] Thóo-uē-la̍k Titan ê Oo-iánn lîng Thóo-tshenn

Thóo-tshenn-khuân bīn-tuì lán ê kak-tōo ta̍k-nî lóng ē bô-kâng, tsha-put-to muí 15 tang tsi̍t-ê tsiu-kî. Kin-nî ê kak-tōo khuànn-khí-lâi tō tshin-tshiūnn Thóo-tshenn-khuân siau-sit khì-ah. Tsit-ê tsiok kng tsiok suí ê Thóo-tshenn-khuân hē-thóng, nā-sī lú-lâi-lú e̍h, lú-lâi-lú àm, Tē-kiû tíng-kuân ê lâng tō lú-lâi-lú bô-huat-tōo khuànn-tio̍h i. M̄-koh, tse mā hōo lán tsi̍t-ê hó ki-huē, ē-tàng kuan-tshat Thóo-tshenn ê uē-tshenn uì i bīn-thâu-tsîng kiânn-kuè, khuànn i ê oo-iánn sī-án-tsuánn tsa̍h-tio̍h tsit lia̍p ū khuân, tsiok kng ê khì-thé kū-kiânn-tshenn. Tsit-ê hiān-siōng, tō kiò-tsò lîng Thóo-tshenn. Sī-kóng, Thóo-tshenn siōng tuā-lia̍p ê uī-tshenn Thóo-uē-la̍k Titan, sī siōng-hó kuan-tshat ê tuì-siōng. Tī tsit-tiunn 7 gue̍h 18 hip--ê bōng-uán-kiànn siòng-phìnn lāi-té, Titan sī tī siòng-phìnn ê tò-pîng tíng-kuân. I ê oo-iánn tō tâu-iánn tī Thóo-tshenn-khuân tíng-kuân hit lia̍p oo-oo ê înn tiám. Sū-si̍t-siōng, tsit-má sī Titan ê oo-iánn lîng Thóo-tshenn ê kuì-tseh, muí 16 kang tō ē tshut-hiān tsi̍t-pái. Titan siōng-bué tsi̍t-pái ê oo-iánn lîng Thóo-tshenn ē huat-sing tī 10 gue̍h 6 hō. M̄-koh, nā-sī iōng bōng-uán-kiànn khuànn, Titan pún-sin iáu ē kè-sio̍k muí 16 kang uì Thóo-tshenn bīn-thâu-tsîng kiânn-kuè, it-ti̍t kàu 2026 nî 1 gue̍h 25 uî-tsí.

[English] Titan Shadow Transit

Every 15 years or so, Saturn's rings are tilted edge-on to our line of sight. As the bright, beautiful ring system grows narrower and fainter it becomes increasingly difficult to see for denizens of planet Earth. But it does provide the opportunity to watch transits of Saturn's moons and their dark shadows across the ringed gas giant's still bright disk. Of course Saturn's largest moon Titan is the easiest to spot in transit. In this telescopic snapshot from July 18, Titan itself is at the upper left, casting a round dark shadow on Saturn's banded cloudtops above the narrow rings. In fact Titan's transit season is in full swing now with shadow transits every 16 days corresponding to the moon's orbital period. Its final shadow transit will be on October 6, though Titan's pale disk will continue to cross in front of Saturn as seen from telescopes on planet Earth every 16 days through January 25, 2026.

詞彙學習