Cape San Blas 天頂 ê 火球

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：Fireball over Cape San Blas
• 影像來源 kah 版權: Jason Rice
• Piece it Back Together: Astronomy Puzzle of the Day
• 台文翻譯：An-Li Tsai (TARA)

[漢羅] Cape San Blas 天頂 ê 火球

你敢有看過天頂 ê 火球？ 佇天文學內底，火球是一款足光 ê 流星，嘛叫做火流星。 伊上無嘛有金星遐爾光，甚至比月圓時 ê 月娘閣較光。 火流星誠罕得看著，你若有看著一粒，你可能會記一世人。 用物理學 ê 角度來講，火流星是 ùi 小行星抑是彗星 ê 細粒石頭來--ê。 伊軁過地球大氣層 ê 時陣，通常會 tī 天頂留一巡尾溜，主要 ê 成份是氣體 kah 塗粉，這條尾溜會沓沓仔消失。 這粒火流星是袂挵著塗跤變做一塊大石頭，因為伊會 tī 大氣層內底分解，變做足濟細塊石頭、蒸發去。 這張相片是頂禮拜 tī 美國 Florida 州 ê Cape San Blas ê 海岸翕--ê。

[POJ] Cape San Blas thiⁿ-téng ê Hóe-kiû

Lí kám-ū khòaⁿ kòe thiⁿ-téng ê hóe-kiû? Tī thian-bûn-ha̍k lāi-té, hóe-kiû sī chi̍t-khoán chiok kng ê liû-chhiⁿ, mā kiò-chò hòe-liû-chhiⁿ. I siōng-bô mā ū Kim-chhiⁿ hiah-nī kng, sīm-chì pí goe̍h-îⁿ sî ê goe̍h-niû koh-khah kng. Hóe-kiû chiâⁿ hán-tit khòaⁿ-tio̍h, lí nā-ū khòaⁿ-tio̍h chi̍t-lia̍p, lí khó-lêng ē-kì chi̍t-sì-lâng. Iōng bu̍t-lí-ha̍k ê kak-tō͘ lâi-kóng, hóe-kiû sī ùi sió-kiâⁿ-chhiⁿ ia̍h-sī hūi-chhiⁿ ê sè-lia̍p chio̍h-thâu lâi--ê. I nǹg-kòe tē-kiû tāi-khì-chân ê sî-chūn, thong-siông ē tī thiⁿ-téng lâu chi̍t sûn bóe-liu, chú-iàu ê sêng-hūn sī khì-thé kah thô͘-hún, chit tiâu bóe-liu ē tau̍h-tau̍h-á siau-sit. Chit lia̍p hóe-kiû sī bē lòng-tio̍h thô͘-kha piàn-chò chi̍t-tè tōa chio̍h-thâu, in-ūi i ē tī tāi-khì-chân lāi-té hun-kái, piàn-chò chiok chē sè tè chio̍h-thâu, cheng-hoat khì. Chit-tiuⁿ siòng-phìⁿ sī téng-lé-pài tī Bí-kok Florida chiu ê Cape San Blas ê hái-hōaⁿ hip--ê.

[KIP] Cape San Blas thinn-tíng ê Hué-kiû

Lí kám-ū khuànn kuè thinn-tíng ê hué-kiû? Tī thian-bûn-ha̍k lāi-té, hué-kiû sī tsi̍t-khuán tsiok kng ê liû-tshinn, mā kiò-tsò huè-liû-tshinn. I siōng-bô mā ū Kim-tshinn hiah-nī kng, sīm-tsì pí gue̍h-înn sî ê gue̍h-niû koh-khah kng. Hué-kiû tsiânn hán-tit khuànn-tio̍h, lí nā-ū khuànn-tio̍h tsi̍t-lia̍p, lí khó-lîng ē-kì tsi̍t-sì-lâng. Iōng bu̍t-lí-ha̍k ê kak-tōo lâi-kóng, hué-kiû sī uì sió-kiânn-tshinn ia̍h-sī huī-tshinn ê sè-lia̍p tsio̍h-thâu lâi--ê. I nǹg-kuè tē-kiû tāi-khì-tsân ê sî-tsūn, thong-siông ē tī thinn-tíng lâu tsi̍t sûn bué-liu, tsú-iàu ê sîng-hūn sī khì-thé kah thôo-hún, tsit tiâu bué-liu ē ta̍uh-ta̍uh-á siau-sit. Tsit lia̍p hué-kiû sī bē lòng-tio̍h thôo-kha piàn-tsò tsi̍t-tè tuā tsio̍h-thâu, in-uī i ē tī tāi-khì-tsân lāi-té hun-kái, piàn-tsò tsiok tsē sè tè tsio̍h-thâu, tsing-huat khì. Tsit-tiunn siòng-phìnn sī tíng-lé-pài tī Bí-kok Florida tsiu ê Cape San Blas ê hái-huānn hip--ê.

[English] Fireball over Cape San Blas

Have you ever seen a fireball? In astronomy, a fireball is a very bright meteor -- one at least as bright as Venus and possibly brighter than even a full Moon. Fireballs are rare -- if you see one you are likely to remember it for your whole life. Physically, a fireball is a small rock that originated from an asteroid or comet that typically leaves a fading smoke trail of gas and dust as it shoots through the Earth's atmosphere. It is unlikely that any single large ground strike occurred -- much of the rock likely vaporized as it broke up into many small pieces. The featured picture was captured last week from a deadwood beach in Cape San Blas, Florida, USA.

詞彙學習