雙重爆炸超新星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：A Double Detonation Supernova
• 影像來源: ESO,P. Daset al.; Background stars (NASA/Hubble): K. Noll et al.
• 台文翻譯：An-Li Tsai (TARA)

[漢羅] 雙重爆炸超新星

敢有超新星會爆炸兩擺？ 會喔！因為頭一擺 ê 爆炸會引起第二擺 ê 爆炸。 有一个理論就是咧解釋 超新星殘骸 SNR 0509-67.5 ê 這款現象。 佇這个雙星系統內底，引力會 kā 較大、較櫳 ê 恆星物質，送予較細、密度較懸 ê 白矮星 星伴。 落尾，這粒白矮星表面 ê 溫度會衝懸，引起爆炸，產生衝擊波，這个衝擊波會同齊向內 kah 向外 捒出去，引起第二擺、完整 ê Ia 型超新星爆炸。 這張新發布 ê 超新星殘骸 SNR 0509-67.5 ê 影像，是用智利 ê VLT 望遠鏡 翕--ê。 咱會當看著兩重氣體殼，in ê 半徑 kah 內底 ê 成分，攏有符合雙重爆炸 ê 假說。 這个超新星殘骸 SNR 0509-67.5 會出名，是因為伊有兩个猶未解決 ê 謎題。 第一，是按怎無人紀錄著伊 400 年前彼擺超新星爆炸？ 第二，是按怎無 星伴 留落來？

[POJ] Siang-têng Po̍k-chà Chhiau-sin-seng

Kám-ū Chhiau-sin-seng ē po̍k-chà nn̄g pái? Ē O͘h! In-ūi thâu-chi̍t-pái ê po̍k-chà ē ín-khí tē-jī pái ê po̍k-chà. Ū chi̍t-ê lí-lūn tio̍h-sī leh kái-sek chhiau-sin-seng chân-hâi SNR 0509-67.5 ê chit-khoán hiān-siōng. Tī chit-ê siang-chhiⁿ hē-thóng lāi-té, ín-le̍k ē kā khah tōa, khah lang ê hêng-chhiⁿ bu̍t-chit, sàng hō͘ khah sè, bi̍t-tō͘ khah koân ê pe̍h-é-chhiⁿ seng-phōaⁿ. Lo̍h-bóe, chit lia̍p pe̍h-é-chhiⁿ piáu-bīn ê un-tō͘ ē chhèng-koân, ín-khí po̍k-chà, sán-seng chhiong-kek-pho,chit-ê chhiong-kek-pho ē tâng-chê hiòng lāi kah hiòng gōa sak--chhut-khì, ín-khí tē-jī pái, oân-chéng ê Ia hêng chhiau-sin-seng po̍k-chà. Chit-tiuⁿ sin poat-pò͘-ê chhiau-sin-seng chân-hâi SNR 0509-67.5 ê iáⁿ-siōng, sī iōng Tì-lī ê VLT bōng-oán-kiàⁿ hip--ê. Lán ē-tàng khòaⁿ-tio̍h nn̄g têng khì-thé-khak, in ê pòaⁿ-kèng kah lāi-té ê sêng-hun, lóng-ū hû-ha̍p siang-têng po̍k-chà ê ká-soat. Chit-ê chhiau-sin-seng chân-hâi SNR 0509-67.5 ē chhut-miâ, sī in-ūi i ū nn̄g-ê iáu-bōe kái-koat ê bē-tê. Tē-it, sī-án-chóaⁿ bô-lâng kì-lio̍k tio̍h i 400 nî-chêng hit pái chhiau-sin-seng po̍k-chà? Tē-jī, sī-án-chóaⁿ bô seng-phōaⁿ lâu--lo̍h-lâi?

[KIP] Siang-tîng Po̍k-tsà Tshiau-sin-sing

Kám-ū Tshiau-sin-sing ē po̍k-tsà nn̄g pái? Ē Ooh! In-uī thâu-tsi̍t-pái ê po̍k-tsà ē ín-khí tē-jī pái ê po̍k-tsà. Ū tsi̍t-ê lí-lūn tio̍h-sī leh kái-sik tshiau-sin-sing tsân-hâi SNR 0509-67.5 ê tsit-khuán hiān-siōng. Tī tsit-ê siang-tshinn hē-thóng lāi-té, ín-li̍k ē kā khah tuā, khah lang ê hîng-tshinn bu̍t-tsit, sàng hōo khah sè, bi̍t-tōo khah kuân ê pe̍h-é-tshinn sing-phuānn. Lo̍h-bué, tsit lia̍p pe̍h-é-tshinn piáu-bīn ê un-tōo ē tshìng-kuân, ín-khí po̍k-tsà, sán-sing tshiong-kik-pho,tsit-ê tshiong-kik-pho ē tâng-tsê hiòng lāi kah hiòng guā sak--tshut-khì, ín-khí tē-jī pái, uân-tsíng ê Ia hîng tshiau-sin-sing po̍k-tsà. Tsit-tiunn sin puat-pòo-ê tshiau-sin-sing tsân-hâi SNR 0509-67.5 ê iánn-siōng, sī iōng Tì-lī ê VLT bōng-uán-kiànn hip--ê. Lán ē-tàng khuànn-tio̍h nn̄g tîng khì-thé-khak, in ê puànn-kìng kah lāi-té ê sîng-hun, lóng-ū hû-ha̍p siang-tîng po̍k-tsà ê ká-suat. Tsit-ê tshiau-sin-sing tsân-hâi SNR 0509-67.5 ē tshut-miâ, sī in-uī i ū nn̄g-ê iáu-buē kái-kuat ê bē-tê. Tē-it, sī-án-tsuánn bô-lâng kì-lio̍k tio̍h i 400 nî-tsîng hit pái tshiau-sin-sing po̍k-tsà? Tē-jī, sī-án-tsuánn bô sing-phuānn lâu--lo̍h-lâi?

[English] A Double Detonation Supernova

Can some supernovas explode twice? Yes, when the first explosion acts like a detonator for the second. This is a leading hypothesis for the cause of supernova remnant (SNR) 0509-67.5. In this two-star system, gravity causes the larger and fluffier star to give up mass to a smaller and denser white dwarf companion. Eventually the white dwarf's near-surface temperature goes so high that it explodes, creating a shock wave that goes both out and in -- and so triggers a full Type Ia supernova near the center. Recent images of the SNR 0509-67.5 system, like the featured image from the Very Large Telescope in Chile, show two shells with radii and compositions consistent with the double detonation hypothesis. This system, SNR 0509-67.5 is also famous for two standing mysteries: why its bright supernova wasn't noted 400 years ago, and why no visible companion star remains.

詞彙學習