月球正面

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：Lunar Nearside
• 影像來源: NASA/GSFC/ Arizona State Univ. /Lunar Reconnaissance Orbiter
• 台文翻譯：An-Li Tsai (TARA)

[漢羅] 月球正面

這張美麗 ê 相片，是用月球探測軌道衛星 (LRO) ê 闊幅 kha-mé-lah kā 1300 張相片鬥做伙，成做咱熟似 ê 月球正面。 毋過，啥物是「月球正面」？是啥物原因會有「月球正面」咧？ 月球毋但家己會自轉，嘛會踅地球公轉，而且踅 ê 速度仝款，差不多攏是 28 工。 這款「潮汐鎖定」ê 現象，造成月球會永遠用仝一面面對地球，咱就 kā 當做是「月球正面」。 咱 tī 這張鬥出來 ê 懸解析度相片內底，會當看著月球正面彼寡烏烏、平平 ê 月海（實際上彼是一个去予熔岩淹過 ê 隕石坑），kah 彼寡敧敧曲曲 ê 懸山。 這寡景色，對地球頂懸 ê 天文愛好者來講，就敢若咧行灶跤仝款。 你嘛會使 tī 這張圖頂懸揣你上愛 ê 月海抑是較大窟 ê 隕石坑。 這張圖所用 ê 相片，攏是 LRO tī 2010 年 12 月 開兩禮拜 ê 時間翕--ê。

[POJ] Goe̍h-kiû chiàⁿ-bīn

Chit-tiuⁿ bí-lē ê siòng-phìⁿ, sī iōng Goe̍h-kiû Thàm-chhek kúi-tō ūi-chhiⁿ (LRO) ê khoah-pak kha-mé-lah kā 1300 tiuⁿ siòng-phìⁿ tàu chò-hóe, chiâⁿ-chò lán se̍k-sāi ê Goe̍h-kiû chiàⁿ-bīn. M̄-koh, siáⁿ-mih sī "Goe̍h-kiû chiàⁿ-bīn"? Sī siáⁿ-mih goân-in ē ū "Goe̍h-kiû chiàⁿ-bīn" leh? Goe̍h-kiû m̄-nā ka-kī ē chū-choán, mā ē se̍h Tē-kiû kong-choán, jî-chhiáⁿ se̍h ê sok-tō͘ kāng-khoán, chha-put-to lóng sī 28 kang. Chit-khoán "Tiâu-se̍k só-tēng" ê hiān-siōng, chō-sêng Goe̍h-kiû ē éng-oán iōng kāng chi̍t-bīn bīn-tùi Tē-kiû, lán tō kā tòng-chò sī "Goe̍h-kiû chiàⁿ-bīn". Lán tī chit-tiuⁿ tàu--chhut-lâi ê koân kái-sek-tō͘ siòng-phìⁿ lāi-té, ē-tàng khòaⁿ-tio̍h Goe̍h-kiû chiàⁿ-bīn hit-kóa o͘-o͘, pêⁿ-pêⁿ ê Goe̍h-hái (si̍t-chè-siōng he sī chi̍t-ē khì hō͘ iông-giâm im--kòe ê ún-se̍k-kheⁿ), kah hit-kóa khi-khi-khiau-khiau ê koân-soaⁿ. Chit kóa kéng-se̍k, tùi Tē-kiû téng-koân ê thian-bûn ài-hó-chiá lâi-kóng, tō ká-ná leh kiâⁿ chàu-kha kāng-khoán. Lí mā ē-sái tī chit-tiuⁿ tô͘ téng-koân chhōe lí siōng-ài ê Goe̍h-hái ia̍h-sī khah tōa-khut ê ún-se̍k-kheⁿ. Chit-tiuⁿ tô͘ só͘ iōng ê siòng-phìⁿ, lóng sī LRO tī 2010 nî 12 goe̍h khai nn̄g lé-pài ê sî-kan hip--ê.

[KIP] Gue̍h-kiû tsiànn-bīn

Tsit-tiunn bí-lē ê siòng-phìnn, sī iōng Gue̍h-kiû Thàm-tshik kuí-tō uī-tshinn (LRO) ê khuah-pak kha-mé-lah kā 1300 tiunn siòng-phìnn tàu tsò-hué, tsiânn-tsò lán si̍k-sāi ê Gue̍h-kiû tsiànn-bīn. M̄-koh, siánn-mih sī "Gue̍h-kiû tsiànn-bīn"? Sī siánn-mih guân-in ē ū "Gue̍h-kiû tsiànn-bīn" leh? Gue̍h-kiû m̄-nā ka-kī ē tsū-tsuán, mā ē se̍h Tē-kiû kong-tsuán, jî-tshiánn se̍h ê sok-tōo kāng-khuán, tsha-put-to lóng sī 28 kang. Tsit-khuán "Tiâu-si̍k só-tīng" ê hiān-siōng, tsō-sîng Gue̍h-kiû ē íng-uán iōng kāng tsi̍t-bīn bīn-tuì Tē-kiû, lán tō kā tòng-tsò sī "Gue̍h-kiû tsiànn-bīn". Lán tī tsit-tiunn tàu--tshut-lâi ê kuân kái-sik-tōo siòng-phìnn lāi-té, ē-tàng khuànn-tio̍h Gue̍h-kiû tsiànn-bīn hit-kuá oo-oo, pênn-pênn ê Gue̍h-hái (si̍t-tsè-siōng he sī tsi̍t-ē khì hōo iông-giâm im--kuè ê ún-si̍k-khenn), kah hit-kuá khi-khi-khiau-khiau ê kuân-suann. Tsit kuá kíng-si̍k, tuì Tē-kiû tíng-kuân ê thian-bûn ài-hó-tsiá lâi-kóng, tō ká-ná leh kiânn tsàu-kha kāng-khuán. Lí mā ē-sái tī tsit-tiunn tôo tíng-kuân tshuē lí siōng-ài ê Gue̍h-hái ia̍h-sī khah tuā-khut ê ún-si̍k-khenn. Tsit-tiunn tôo sóo iōng ê siòng-phìnn, lóng sī LRO tī 2010 nî 12 gue̍h khai nn̄g lé-pài ê sî-kan hip--ê.

[English] Lunar Nearside

About 1,300 images from the Lunar Reconnaissance Orbiter spacecraft's wide angle camera were used to compose this spectacular view of a familiar face - the lunar nearside. But why is there a lunar nearside? The Moon rotates on its axis and orbits the Earth at the same rate, about once every 28 days. Tidally locked in this configuration, the synchronous rotation always keeps one side, the nearside, facing Earth. As a result, featured in remarkable detail in the full resolution mosaic, the smooth, dark, lunar maria (actually lava-flooded impact basins), and rugged highlands, are well-known to earthbound skygazers. To find your favorite mare or large crater, just follow this link or slide your cursor over the picture. The LRO images used to construct the mosaic were recorded over a two week period in December 2010.

詞彙學習