海鷗星雲

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：The Seagull Nebula
• 影像來源 kah 版權: Timothy Martin
• 台文翻譯：An-Li Tsai (TARA)

[漢羅] 海鷗星雲

這規片發光氣體塗粉雲，對 地球 ê 天文學家來講，看起來敢若是一隻鳥仔，所以伊才會提著這个外號，海鷗星雲。 這隻 宇宙鳥仔 ê 肖像 包括了銀河盤，大細有 3.5 度闊，就 tī 天狼星 方向附近。 天狼星 是 大犬座（大隻狗星座）ê alpha 星。 海鷗星雲上光是伊 ê 頭部，編號 IC 2177，這是一个實密、有真濟塗粉 ê 發射星雲 kah 反射星雲，內底有一粒足大 ê 恆星 HD 53367。 較大範圍 ê 發射區，嘛有其他編號 ê 天體，應該是超新星爆炸 連紲噴出來 ê 一重氣體殼 ê 其中一部份。 Tī 中央正爿下跤 彼个足明顯 ê 藍色弧線，是 ùi 落跑 ê 恆星大犬座 FN 噴出來 ê 弓形衝擊波。 這个複雜 ê 星際氣體 kah 塗粉雲，主要 ê 成份是發紅光 ê 水素原子。 照 海鷗星雲 ê 距離 3,800 光年來估計，伊 kah 大犬座 OB1 星協 ê 其他恆星，tī 天頂 占超過 200 光年闊 ê 範圍。

[POJ] Hái-o͘ Seng-hûn

Che kui-phìⁿ hoat-kng khì-thé thô͘-hún hûn, tùi Tē-kiû ê thian-bûn ha̍k-ka lâi-kóng, khòaⁿ--khí-lâi káⁿ-ná sī chi̍t chiah chiáu-á, só͘-í i chiah-ē the̍h-tio̍h chit-ê gōa-hō, Hái-o͘ Seng-hûn. Chit chiah ú-tiū chiáu-á ê siàu-siōng pau-koat liáu gîn-hô-pôaⁿ, tōa-sè ū 3.5 tō͘ khoah, tō tī Thian-lông-chheⁿ hong-hiòng hù-kīn. Thian-lông-chheⁿ sī Tōa-khián-chō (tōa-chiah káu seng-chō) ê alpha chheⁿ. Hái-o͘ Seng-hûn siōng kng sī i ê thâu-pō͘, pian-hō IC 2177, che-sī chi̍t-ê cha̍t-ba̍t, ū chin chē thô͘-hún ê hoat-siā seng-hûn kah hoán-siā seng-hûn, lāi-té ū chi̍t-lia̍p chiok tōa ê hêng-chheⁿ HD 53367. Khah tōa hoān-ûi ê hoat-siā khu, mā ū kî-thaⁿ pian-hō ê thian-thé, èng-kai sī chhiau-sin-seng po̍k-chà liân-sòa phùn--chhut-lâi ê chi̍t têng khì-thé-khak ê kî-tiong chi̍t-pō͘-hūn. Tī tiong-ng chiàⁿ-pêng ē-kha hit-ê chiok bêng-hián ê nâ-sek hô͘ sòaⁿ, sī ùi làu-phâu ê hêng-chheⁿ Tōa-khián-chō FN phùn--chhut-lâi ê keng-hêng chhiong-kek-pho. Chit-ê ho̍k-cha̍p ê chheⁿ chè khì-thé kah thô͘-hún hûn, chú-iàu ê sêng-hūn sī hoat âng-kng ê chúi-sò͘ goân-chú. Chiàu Hái-o͘ seng-hûn ê kī-lî 3,800 kng-nî lâi kó͘-kè, i kah Tōa-khián-chō OB1 seng-hia̍p ê kî-thaⁿ hêng-chheⁿ, tī thiⁿ-téng chiàm chhiau-kòe 200 kng-nî khoah ê hoān-ûi.

[KIP] Hái-oo Sing-hûn

Tse kui-phìnn huat-kng khì-thé thôo-hún hûn, tuì Tē-kiû ê thian-bûn ha̍k-ka lâi-kóng, khuànn--khí-lâi kánn-ná sī tsi̍t tsiah tsiáu-á, sóo-í i tsiah-ē the̍h-tio̍h tsit-ê guā-hō, Hái-oo Sing-hûn. Tsit tsiah ú-tiū tsiáu-á ê siàu-siōng pau-kuat liáu gîn-hô-puânn, tuā-sè ū 3.5 tōo khuah, tō tī Thian-lông-tshenn hong-hiòng hù-kīn. Thian-lông-tshenn sī Tuā-khián-tsō (tuā-tsiah káu sing-tsō) ê alpha tshenn. Hái-oo Sing-hûn siōng kng sī i ê thâu-pōo, pian-hō IC 2177, tse-sī tsi̍t-ê tsa̍t-ba̍t, ū tsin tsē thôo-hún ê huat-siā sing-hûn kah huán-siā sing-hûn, lāi-té ū tsi̍t-lia̍p tsiok tuā ê hîng-tshenn HD 53367. Khah tuā huān-uî ê huat-siā khu, mā ū kî-thann pian-hō ê thian-thé, ìng-kai sī tshiau-sin-sing po̍k-tsà liân-suà phùn--tshut-lâi ê tsi̍t tîng khì-thé-khak ê kî-tiong tsi̍t-pōo-hūn. Tī tiong-ng tsiànn-pîng ē-kha hit-ê tsiok bîng-hián ê nâ-sik hôo suànn, sī uì làu-phâu ê hîng-tshenn Tuā-khián-tsō FN phùn--tshut-lâi ê king-hîng tshiong-kik-pho. Tsit-ê ho̍k-tsa̍p ê tshenn tsè khì-thé kah thôo-hún hûn, tsú-iàu ê sîng-hūn sī huat âng-kng ê tsuí-sòo guân-tsú. Tsiàu Hái-oo sing-hûn ê kī-lî 3,800 kng-nî lâi kóo-kè, i kah Tuā-khián-tsō OB1 sing-hia̍p ê kî-thann hîng-tshenn, tī thinn-tíng tsiàm tshiau-kuè 200 kng-nî khuah ê huān-uî.

[English] The Seagull Nebula

An interstellar expanse of glowing gas and obscuring dust presents a bird-like visage to astronomers from planet Earth, suggesting its popular moniker, the Seagull Nebula. This broadband portrait of the cosmic bird covers a 3.5-degree wide swath across the plane of the Milky Way, in the direction of Sirius, alpha star of the constellation of the Big Dog (Canis Major). The bright head of the Seagull Nebula is cataloged as IC 2177, a compact, dusty emission and reflection nebula with embedded massive star HD 53367. The larger emission region, encompassing objects with other catalog designations, is Likely part of an extensive shell structure swept up by successive supernova explosions. The notable bluish arc below and right of center is a bow shock from runaway star FN Canis Majoris. Dominated by the reddish glow of atomic hydrogen, this complex of interstellar gas and dust clouds with other stars of the Canis Majoris OB1 association spans over 200 light-years at the Seagull Nebula's estimated 3,800 light-year distance.

詞彙學習