捲螺仔星系 M61 ê 中心

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：In the Center of Spiral Galaxy M61
• 影像來源: NASA,ESA,Hubble,ESO;處理 & 版權:Robert Gendler
• APOD Turns 30!: Free public lecture in Cork, Ireland TONIGHT (Tuesday) at 7 pm
• 台文翻譯：An-Li Tsai (TARA)

[漢羅] 捲螺仔星系 M61 ê 中心

這个捲螺仔星系 ê 中心敢閣有一个捲螺仔星系？ 可能有 ê 款。 這張是正面向地球 ê 捲螺仔星系 Messier 61 (M61)，伊有光爍爍 ê 中心。 這張是用 Hubble 太空望遠鏡、ESO 歐洲南方天文台、 kah 地球頂懸一寡 細台望遠鏡 ê 影像資料鬥做伙 ê 詳細相片。 M61 tī 室女座星系團內底，離咱干焦 5500 萬光年遠，伊閣有另外一个名是 NGC 4303。 伊去予人認為是一个親像咱銀河系 ê 棍螺仔星系。 Kah 別 ê 捲螺仔星系仝款，M61 嘛有大支骨 ê 捲螺仔手骨、宇宙塗粉帶、粉紅色 ê 恆星形成區、 kah 足少年 ê 藍色星團。 伊 ê 中心是一粒活跳 ê 超大質量烏洞，烏洞 ê 邊仔是光爍爍 ê 氣體踅對星系中心去，予中心看起來就親像閣有一个捲螺仔星系 tī 遐。

[POJ] Kńg-lê-á Seng-hē M̌1 ê tiong-sim

Chit-ê kńg-lê-á seng-hē ê tiong-sim kám koh-ū chi̍t-ê kńg-lê-á seng-hē? Khó-lêng ū ê khoán. Chit-tiuⁿ sī chiàⁿ-bīn hiòng Tē-kiû-ê kńg-lê-á seng-hē Messier 61 (M61),i ū kng-sih-sih ê tiong-sim. Chit-tiuⁿ sī iōng Hubble thài-khong bōng-oán-kiàⁿ, ESO Au-chiu lâm-hong thian-bûn tâi, kah tē-kiû téng-koân chi̍t-kóa sè tâi bōng-oán-kiàⁿ ê iáⁿ-siōng chu-liāu tàu-chò-hóe ê siông-sè siòng-phìⁿ. M̌1 tī Sek-lú-chō seng-hē-thoân lāi-té, lī lán kan-na 5500 bān kng-nî hn̄g, i koh-ū lēng-gōa chi̍t-ê miâ sī NGC 4303. I khì hō͘ lâng jīn-ûi sī chi̍t-ê chhin-chhiūⁿ lán gîn-hô-hē ê kùn-lê-á seng-hē. Kah pa̍t-ê kńg-lê-á seng-hē kāng-khoán, M̌1 mā ū tōa-ki-kut ê kńg-lê-á chhiú-kut, ú-tiū thô͘-hún tòa, Hún-âng-sek ê hêng-chhiⁿ hêng-seng khu, kah chiok siàu-liân ê nâ-sek seng-thoân. I ê tiong-sim sī chi̍t-lia̍p oa̍h-thiàu ê chhiau-tōa chit-liōng o͘-tōng, o͘-tōng ê piⁿ-á sī kng-sih-sih ê khì-thé se̍h ùi seng-hē tiong-sim khì, hō͘ tiong-sim khòaⁿ--khí-lâi tō chhin-chhiūⁿ koh-ū chi̍t-ê kńg-lê-á seng-hē tī hia.

[KIP] Kńg-lê-á Sing-hē M61 ê tiong-sim

Tsit-ê kńg-lê-á sing-hē ê tiong-sim kám koh-ū tsi̍t-ê kńg-lê-á sing-hē? Khó-lîng ū ê khuán. Tsit-tiunn sī tsiànn-bīn hiòng Tē-kiû-ê kńg-lê-á sing-hē Messier 61 (M61),i ū kng-sih-sih ê tiong-sim. Tsit-tiunn sī iōng Hubble thài-khong bōng-uán-kiànn, ESO Au-tsiu lâm-hong thian-bûn tâi, kah tē-kiû tíng-kuân tsi̍t-kuá sè tâi bōng-uán-kiànn ê iánn-siōng tsu-liāu tàu-tsò-hué ê siông-sè siòng-phìnn. M61 tī Sik-lú-tsō sing-hē-thuân lāi-té, lī lán kan-na 5500 bān kng-nî hn̄g, i koh-ū līng-guā tsi̍t-ê miâ sī NGC 4303. I khì hōo lâng jīn-uî sī tsi̍t-ê tshin-tshiūnn lán gîn-hô-hē ê kùn-lê-á sing-hē. Kah pa̍t-ê kńg-lê-á sing-hē kāng-khuán, M61 mā ū tuā-ki-kut ê kńg-lê-á tshiú-kut, ú-tiū thôo-hún tuà, Hún-âng-sik ê hîng-tshinn hîng-sing khu, kah tsiok siàu-liân ê nâ-sik sing-thuân. I ê tiong-sim sī tsi̍t-lia̍p ua̍h-thiàu ê tshiau-tuā tsit-liōng oo-tōng, oo-tōng ê pinn-á sī kng-sih-sih ê khì-thé se̍h uì sing-hē tiong-sim khì, hōo tiong-sim khuànn--khí-lâi tō tshin-tshiūnn koh-ū tsi̍t-ê kńg-lê-á sing-hē tī hia.

[English] In the Center of Spiral Galaxy M61

Is there a spiral galaxy in the center of this spiral galaxy? Sort of. Image data from the Hubble Space Telescope, the European Southern Observatory, and smaller telescopes on planet Earth are combined in this detailed portrait of face-on spiral galaxy Messier 61 (M61) and its bright center. A mere 55 million light-years away in the Virgo Cluster of Galaxies, M61 is also known as NGC 4303. It's considered to be an example of a barred spiral galaxy similar to our own Milky Way. Like other spiral galaxies, M61 also features sweeping spiral arms, cosmic dust lanes, pinkish star forming regions, and young blue star clusters. Its core houses an active supermassive black hole surrounded by a bright nuclear spiral -- infalling star-forming gas that itself looks like a separate spiral galaxy.

詞彙學習