土星 ê 耳仔 無去矣！

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：Saturn's Rings Appear to Disappear
• 影像來源 kah 版權：Natan Fontes
• Make Saturn's Rings Musical: Play them like a harp!
• 台文翻譯：An-Li Tsai (TARA)

[漢羅] 土星 ê 耳仔 無去矣！

土星環去佗位矣？ 頭一个看著土星環的人，是 1610 年 ê 加利略。 伊用新發明 ê 望遠鏡 leh 看，毋知彼是啥物碗糕，就共號做「耳仔」。 到 1612 年，土星 ê 耳仔規个消失去，逐家捎攏無。 今仔日咱是已經知影發生啥物代誌：對地球的角度來看，是土星環變甲傷薄，咱煞看袂著。 仝款 ê 代誌差不多 15 冬就會搬一擺，因為土星 kah 地球仝款，攏有因為自轉趨一个角度造成四季 ê 變化。 這表示講，土星踅太陽行的時陣，伊 ê 赤道 kah 環有時仔會規个向太陽 kah 內太陽系這爿，予咱看甲足清楚--ê。 毋過 uì 其他 ê 軌道位置來看，就差不多攏看無。 這張 tī 巴西 Brasilia 翕 ê 相片，就看會著這个現代版 ê 變化過程： 頂面彼張看會著環--ê，是 2020 年翕的。 下跤彼張看袂著環--ê，是 2025 年初翕--ê。

[POJ] Thó͘-chheⁿ ê hīⁿ-á bô-khì-ah!

Thó͘-chheⁿ-khoân khì tó-ūi ah? Thâu-chi̍t-ê khòaⁿ-tio̍h Thó͘-chheⁿ-khoân ê lâng, sī 1610 nî ê Ka-lī-lio̍k. I iōng sin hoat-bêng ê bōng-oán-kiàⁿ leh khòaⁿ, m̄-chai he sī siáⁿ-mih óaⁿ-ko, tō kā hō-chò "hīⁿ-á". Kàu 1612 nî, Thó͘-chheⁿ ê hīⁿ-á kui-ê siau-sit khì, ta̍k-ke sa lóng bô. Kin-á-ji̍t lán sī í-keng chai-iáⁿ hoat-seng siáⁿ-mih tāi-chì: Tùi tē-kiû ê kak-tō͘ lâi-khòaⁿ, sī Thó͘-chheⁿ khoân piàn-kah siuⁿ po̍h, lán soah khòaⁿ bē-tio̍h. Kāng-khoán ê tāi-chì chha-put-to 15 tang to̍h ē poaⁿ chi̍t-pái, in-ūi Thó͘-chheⁿ kah tē-kiû kāng-khoán, lóng-ū in-ūi chū-choán chhu chi̍t-ê kak-tō͘ chō-sêng sù-kùi ê piàn-hòa. Che piáu-sī kóng, Thó͘-chheⁿ se̍h Thài-iông kiâⁿ ê sî-chūn, i ê chhek-tō kah khoân ū-sî-á ē kui-ê hiòng Thài-iông kah lāi Thài-iông-hē chit-pêng, hō͘ lán khòaⁿ kah chok chheng-chhó--ê. M̄-koh ùi kî-thaⁿ ê kúi-tō ūi-tì lâi-khòaⁿ, tō chha-put-to lóng khòaⁿ-bô. Chit-tiuⁿ tī Pa-se Brasilia hip--ê siòng-phìⁿ, tō khòaⁿ-ē-tio̍h chit-ê hiān-tāi pán ê piàn-hòa kòe-têng: Téng-bīn hit tiuⁿ khòaⁿ-ē-tio̍h khoân--ê, sī 2020 nî hip--ê. Ē-kha hit tiuⁿ khòaⁿ bē-tio̍h khoân--ê, sī 2025 nî-chhe hip--ê.

[KIP] Thóo-tshenn ê hīnn-á bô-khì-ah!

Thóo-tshenn-khuân khì tó-uī ah? Thâu-tsi̍t-ê khuànn-tio̍h Thóo-tshenn-khuân ê lâng, sī 1610 nî ê Ka-lī-lio̍k. I iōng sin huat-bîng ê bōng-uán-kiànn leh khuànn, m̄-tsai he sī siánn-mih uánn-ko, tō kā hō-tsò "hīnn-á". Kàu 1612 nî, Thóo-tshenn ê hīnn-á kui-ê siau-sit khì, ta̍k-ke sa lóng bô. Kin-á-ji̍t lán sī í-king tsai-iánn huat-sing siánn-mih tāi-tsì: Tuì tē-kiû ê kak-tōo lâi-khuànn, sī Thóo-tshenn khuân piàn-kah siunn po̍h, lán suah khuànn bē-tio̍h. Kāng-khuán ê tāi-tsì tsha-put-to 15 tang to̍h ē puann tsi̍t-pái, in-uī Thóo-tshenn kah tē-kiû kāng-khuán, lóng-ū in-uī tsū-tsuán tshu tsi̍t-ê kak-tōo tsō-sîng sù-kuì ê piàn-huà. Tse piáu-sī kóng, Thóo-tshenn se̍h Thài-iông kiânn ê sî-tsūn, i ê tshik-tō kah khuân ū-sî-á ē kui-ê hiòng Thài-iông kah lāi Thài-iông-hē tsit-pîng, hōo lán khuànn kah tsok tshing-tshó--ê. M̄-koh uì kî-thann ê kuí-tō uī-tì lâi-khuànn, tō tsha-put-to lóng khuànn-bô. Tsit-tiunn tī Pa-se Brasilia hip--ê siòng-phìnn, tō khuànn-ē-tio̍h tsit-ê hiān-tāi pán ê piàn-huà kuè-tîng: Tíng-bīn hit tiunn khuànn-ē-tio̍h khuân--ê, sī 2020 nî hip--ê. Ē-kha hit tiunn khuànn bē-tio̍h khuân--ê, sī 2025 nî-tshe hip--ê.

[English] Saturn's Rings Appear to Disappear

Where are Saturn's ears? Galileo is credited, in 1610, as the first person to see Saturn's rings. Testing out Lipperhey's recently co-invented telescope, Galileo did not know what they were and so called them "ears". The mystery deepened in 1612, when Saturn's ears mysteriously disappeared. Today we know exactly what happened: from the perspective of the Earth, Saturn's rings had become too thin to see. The same drama plays out every 15 years because Saturn, like Earth, undergoes tilt-driven seasons. This means that as Saturn goes around the Sun, its equator and rings can tilt noticeably toward the Sun and inner Solar System, making them easily visible, but from other orbital locations will appear almost not at all. The featured picture from Brasilia, Brazil shows a modern version of this sequence: the top ring-dominated image was taken in 2020, while the bottom ring-obscure image taken earlier in 2025.

詞彙學習