NGC 6164：龍卵星雲

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：NGC 6164: A Dragon's Egg
• 影像來源 kah 版權：Daniel Stern
• 台文翻譯：- 台文翻譯：An-Li Tsai (TARA)

[漢羅] NGC 6164：龍卵星雲

美麗 ê 發射星雲 NGC 6164，是一粒罕得看著、足燒熱、足光 ê O 型星創--ê，這粒恆星 ê 質量差不多是太陽 ê 40 倍。 佇宇宙雲中心看著 ê 這粒恆星，伊 ê 歲壽干焦 300 到 400 萬年爾爾。 閣過三、四百萬年，這粒大質量恆星，會用超新星爆炸 ê 方式結束伊 ê 性命。 這个星雲本身差不多有 4 光年闊，而且是雙極對稱--ê。 這予伊看起來敢若是咱定定看著--ê 行星形星雲，是一款包 tī 欲死 ê 類太陽恆星 外圍 ê 氣體殼。 佇這張深空影像內底，咱有看著 NGC 6164 kah 足濟行星形星雲仝款，嘛有足闊、足暗 ê 光暈。 這个光暈，真有可能是這粒 O 型星較早期活動 ê 時陣產生了後，湠入去伊週邊 ê 星際媒介物內底。 這幅美麗 ê 望遠鏡影像，是足濟狹頻影像資料 kah 闊頻影像資料 合成 ê 結果。 紅色是發光 ê 原子水素氣體，青色是酸素氣體，闊頻影像是星場。 NGC 6164 嘛叫做「龍卵星雲」，離咱 4,200 光年遠，佇南方角尺星座 (矩尺座) 內底。

[POJ] NGC 6164: Lêng-nn̄g-seng-hûn

Bí-lē ê hoat-siā seng-hûn NGC 6164, sī chi̍t-lia̍p hán-tit khòaⁿ-tio̍h, chiok sio-joa̍h, chiok kng ê o hêng chheⁿ chhòng--ê, chit lia̍p hêng-chhiⁿ ê chit-liōng chha-put-to sī thài-iông ê 40 pōe. Tī ú-tiū hûn tiong-sim khòaⁿ--tio̍h ê chit lia̍p hêng-chhiⁿ, i ê hòe-siū kan-na 300 kàu 400 bān-nî niā-niā. Koh kòe saⁿ, sì-pah bān-nî, chit lia̍p tōa chit-liōng hêng-chheⁿ, ē iōng chhiau-sin-seng po̍k-chà ê hong-sek kiat-sok i ê sèⁿ-miā. Chit-ê seng-hûn pún-sin chha-put-to ū 4 kng nî khoah, jî-chhiáⁿ sī siang-ke̍k tùi-chheng--ê. Che hō͘ i khòaⁿ--khí-lâi káⁿ-ná sī lán tiāⁿ-tiāⁿ khòaⁿ--tio̍h--ê kiâⁿ-chheⁿ hêng seng-hûn, sī chi̍t-khoán pau tī beh-sí ê lūi thài-iông hêng-chheⁿ gōa-ûi ê khì-thé khak. Tī chit-tiuⁿ chhim-khong iáⁿ-siōng lāi-té, lán ū khòaⁿ-tio̍h NGC 6164 kah chiok chē kiâⁿ-chheⁿ hêng seng-hûn kāng-khoán, mā ū chiok khoah, chiok àm ê kng-ūn. Chit-ê kng-ūn, chin ū khó-lêng sī chit lia̍p o hêng chheⁿ khah chá-kî oa̍h-tāng ê sî-chūn sán-seng liáu-āu, thòaⁿ ji̍p-khì i chiu-piⁿ ê seng-chè mûi-kài-bu̍t lāi-té. Chit pak bí-lē ê bōng-oán-kiàⁿ iáⁿ-siōng, sī chiok chē e̍h-pîn iáⁿ-siōng chu-liāu kah khoah-pîn iáⁿ-siōng chu-liāu ha̍p-sêng ê kiat-kó. Âng-sek sī hoat-kng ê goân-chú chúi-sò͘ khì-thé, chheⁿ-sek sī sng-sò͘ khì-thé, khoah-pîn iáⁿ-siōng sī seng-tiûⁿ. NGC 6164 mā kiò-chò "Lêng-nn̄g-seng-hûn", lī lán 4,200 kng-nî hn̄g, tī lâm-hong Kak-chhioh seng-chō (Kí-chhioh-chō) lāi-té.

[KIP] NGC 6164: Lîng-nn̄g-sing-hûn

Bí-lē ê huat-siā sing-hûn NGC 6164, sī tsi̍t-lia̍p hán-tit khuànn-tio̍h, tsiok sio-jua̍h, tsiok kng ê o hîng tshenn tshòng--ê, tsit lia̍p hîng-tshinn ê tsit-liōng tsha-put-to sī thài-iông ê 40 puē. Tī ú-tiū hûn tiong-sim khuànn--tio̍h ê tsit lia̍p hîng-tshinn, i ê huè-siū kan-na 300 kàu 400 bān-nî niā-niā. Koh kuè sann, sì-pah bān-nî, tsit lia̍p tuā tsit-liōng hîng-tshenn, ē iōng tshiau-sin-sing po̍k-tsà ê hong-sik kiat-sok i ê sènn-miā. Tsit-ê sing-hûn pún-sin tsha-put-to ū 4 kng nî khuah, jî-tshiánn sī siang-ki̍k tuì-tshing--ê. Tse hōo i khuànn--khí-lâi kánn-ná sī lán tiānn-tiānn khuànn--tio̍h--ê kiânn-tshenn hîng sing-hûn, sī tsi̍t-khuán pau tī beh-sí ê luī thài-iông hîng-tshenn guā-uî ê khì-thé khak. Tī tsit-tiunn tshim-khong iánn-siōng lāi-té, lán ū khuànn-tio̍h NGC 6164 kah tsiok tsē kiânn-tshenn hîng sing-hûn kāng-khuán, mā ū tsiok khuah, tsiok àm ê kng-ūn. Tsit-ê kng-ūn, tsin ū khó-lîng sī tsit lia̍p o hîng tshenn khah tsá-kî ua̍h-tāng ê sî-tsūn sán-sing liáu-āu, thuànn ji̍p-khì i tsiu-pinn ê sing-tsè muî-kài-bu̍t lāi-té. Tsit pak bí-lē ê bōng-uán-kiànn iánn-siōng, sī tsiok tsē e̍h-pîn iánn-siōng tsu-liāu kah khuah-pîn iánn-siōng tsu-liāu ha̍p-sîng ê kiat-kó. Âng-sik sī huat-kng ê guân-tsú tsuí-sòo khì-thé, tshenn-sik sī sng-sòo khì-thé, khuah-pîn iánn-siōng sī sing-tiûnn. NGC 6164 mā kiò-tsò "Lîng-nn̄g-sing-hûn", lī lán 4,200 kng-nî hn̄g, tī lâm-hong Kak-tshioh sing-tsō (Kí-tshioh-tsō) lāi-té.

[English] NGC 6164: A Dragon's Egg

Beautiful emission nebula NGC 6164 was created by a rare, hot, luminous O-type star, some 40 times as massive as the Sun. Seen at the center of the cosmic cloud, the star is a mere 3 to 4 million years old. In another three to four million years the massive star will end its life in a supernova explosion. Spanning around 4 light-years, the nebula itself has a bipolar symmetry. That makes it similar in appearance to more common and familiar planetary nebulae - the gaseous shrouds surrounding dying sun-like stars. Also like many planetary nebulae, NGC 6164 has been found to have an extensive, faint halo, revealed in this deep image of the region. Expanding into the surrounding interstellar medium, the material in the halo is likely from an earlier active phase of the O star. This gorgeous telescopic view is a composite of extensive narrow-band image data, highlighting glowing atomic hydrogen gas in red and oxygen in greenish hues, with broad-band data for the surrounding starfield. Also known as the Dragon's Egg nebula, NGC 6164 is 4,200 light-years away in the right-angled southern constellation of Norma.

詞彙學習