畫一幅木星圖

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：Painting with Jupiter
• 影像來源：NASA, JPL-Caltech, SwRI, MSSS; 資料處理：Rick Lundh
• 台文翻譯：An-Li Tsai (TARA)

[漢羅] 畫一幅木星圖

Tī 這幅用數位方式畫 ê 畫內底，木星 ê 大氣條紋 kah 捲螺仔旋，去予人 kā 用來創作這幅 行星 ê 後印象派藝術作品。 這張足有創意 ê 影像，是公民科學家 Rick Lundh 畫--ê，伊利用 Juno 太空船 JunoCam 儀器收集 ê 資料來畫。 為著欲 tī 數位畫布頂懸畫圖，伊揀一張有足顯目光線對比 ê JunoCam 影像來處理，用油畫軟體 ê 濾鏡效果來畫。 這寡影像資料，是 Juno 太空船 tī 第 10 擺 飛到木星 ê 近木點 彼陣翕--ê。 彼工是 2017 年 12 月 16，是 Juno 太空船 飛到 這粒太陽系上大粒 ê 氣體巨行星 上倚 ê 時陣。 這台太空船就飛 tī 木星北方雲層頂懸差不多 13,000 公里懸 ê 所在。 這馬是 Juno 號 延長任務 ê 時期，伊自 2016 年 7 月飛入去木星軌道開始，就一直咧探索木星 kah 伊 ê 衛星。

[POJ] Ōe chi̍t pak Bo̍k-chheⁿ tô͘

Tī chit pak iōng sò͘-ūi hong-sek ōe ê ōe lāi-té, Bo̍k-chheⁿ ê tāi-khì tiâu-bûn kah kńg-lê-á-chn̄g, khì hō͘ lâng kā iōng-lâi chhòng-chok chit pak kiâⁿ-chheⁿ ê āu-ìn-siōng phài gē-su̍t chok-phín. Chit-tiuⁿ chiok ū chhòng-ì ê iáⁿ-siōng, sī kong-bîn kho-ha̍k-ka Rick Lundh ōe--ê, i lī-iōng Juno thài-khong-chûn JunoCam gî-khì siu-chi̍p ê chu-liāu lâi ōe. Ūi tio̍h beh tī sò͘-ūi ōe pò͘ téng-koân ōe-tô͘, i kéng chi̍t-tiuⁿ ū chiok hiáⁿ-ba̍k kng-sòaⁿ tùi-pí ê JunoCam iáⁿ-siōng lâi chhú-lí, iōng iû-ōe nńg-thé ê lī-kiàⁿ hāu-kó lâi ōe. Chit kóa iáⁿ-siōng chu-liāu, sī Juno thài-khong-chûn tī tē 10 pái poe-kàu Bo̍k-chheⁿ ê kīn-bo̍k-tiám hit-chūn hip--ê. Hit-kang sī 2017 nî 12 goe̍h 16, sī Juno thài-khong-chûn poe-kàu chit lia̍p thài-iông-hē siōng tōa-lia̍p ê khì-thé kū-kiâⁿ-chheⁿ siōng óa ê sî-chūn. Chit tâi thài-khong-chûn tō poe tī Bo̍k-chheⁿ pak-hong hûn-chân téng-koân chha-put-to 13,000 kong-lí koân ê só͘-chāi. Chit-má sī Juno hō iân-tn̂g jīm-bū ê sî-kî,i chū 2016 nî 7 goe̍h poe ji̍p-khì Bo̍k-chheⁿ kúi-tō khai-sí, tō it-ti̍t leh thàm-soh Bo̍k-chheⁿ kah i ê ūi-chheⁿ.

[KIP] Uē tsi̍t pak Bo̍k-tshenn tôo

Tī tsit pak iōng sòo-uī hong-sik uē ê uē lāi-té, Bo̍k-tshenn ê tāi-khì tiâu-bûn kah kńg-lê-á-tsn̄g, khì hōo lâng kā iōng-lâi tshòng-tsok tsit pak kiânn-tshenn ê āu-ìn-siōng phài gē-su̍t tsok-phín. Tsit-tiunn tsiok ū tshòng-ì ê iánn-siōng, sī kong-bîn kho-ha̍k-ka Rick Lundh uē--ê, i lī-iōng Juno thài-khong-tsûn JunoCam gî-khì siu-tsi̍p ê tsu-liāu lâi uē. Uī tio̍h beh tī sòo-uī uē pòo tíng-kuân uē-tôo, i kíng tsi̍t-tiunn ū tsiok hiánn-ba̍k kng-suànn tuì-pí ê JunoCam iánn-siōng lâi tshú-lí, iōng iû-uē nńg-thé ê lī-kiànn hāu-kó lâi uē. Tsit kuá iánn-siōng tsu-liāu, sī Juno thài-khong-tsûn tī tē 10 pái pue-kàu Bo̍k-tshenn ê kīn-bo̍k-tiám hit-tsūn hip--ê. Hit-kang sī 2017 nî 12 gue̍h 16, sī Juno thài-khong-tsûn pue-kàu tsit lia̍p thài-iông-hē siōng tuā-lia̍p ê khì-thé kū-kiânn-tshenn siōng uá ê sî-tsūn. Tsit tâi thài-khong-tsûn tō pue tī Bo̍k-tshenn pak-hong hûn-tsân tíng-kuân tsha-put-to 13,000 kong-lí kuân ê sóo-tsāi. Tsit-má sī Juno hō iân-tn̂g jīm-bū ê sî-kî,i tsū 2016 nî 7 gue̍h pue ji̍p-khì Bo̍k-tshenn kuí-tō khai-sí, tō it-ti̍t leh thàm-soh Bo̍k-tshenn kah i ê uī-tshenn.

[English] Painting with Jupiter

In digital brush strokes, Jupiter's signature atmospheric bands and vortices were used to form this interplanetary post-impressionist work of art. The creative image from citizen scientist Rick Lundh uses data from the Juno spacecraft's JunoCam. To paint on the digital canvas, a JunoCam image with contrasting light and dark tones was chosen for processing and an oil-painting software filter applied. The image data was captured during perijove 10. That was Juno's December 16, 2017 close encounter with the solar system's ruling gas giant. At the time the spacecraft was cruising about 13,000 kilometers above northern Jovian cloud tops. Now in an extended mission, Juno has explored Jupiter and its moons since entering orbit around Jupiter in July of 2016.

詞彙學習