HH 49：韋伯太空望遠鏡 翕--ê 星際噴射流

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：HH 49: Interstellar Jet from Webb
• 影像來源: NASA, ESA, CSA, STScI, JWST
• Jump Around the Universe: Random APOD Generator
• 台文翻譯：An-Li Tsai (TARA)

[漢羅] HH 49：韋伯太空望遠鏡 翕--ê 星際噴射流

這个星際噴射流 ê 尾溜是啥物？ 咱先來看這个噴射流：伊是 ùi 一个拄形成 ê 恆星系統噴出來--ê，這个系統 ê 編號是 HH 49。 噴出這个噴射流 ê 恆星系統 tī 正爿下跤，毋過咱看袂著。 James Webb 太空望遠鏡 翕 ê 這張紅外線影像，看會著複雜 ê 三角桶形結構，其中閣有另外一个編號 HH 50 ê 噴射流。 懸速度 ê 噴射流粒子 kah 邊仔 ê 星際氣體相挵，激發出來 ê 光是 tī 紅外線波段，就是影像內底 咖啡紅 ê 山陵形結構。 這張 James Webb 太空望遠鏡翕 ê 影像，予咱了解 HH 49 尾溜 彼个奇奇怪怪 ê 結構到底是啥物：伊其實是一个遙遠 ê 捲螺仔星系。 所以，中央彼个藍色 ê 部份毋是一粒恆星，是一大陣恆星。邊仔 ê 圓箍仔，其實是捲螺仔手骨。

[POJ] HH 49：Úi-pah Thài-khong Bōng-oán-kiàⁿ hip--ê Seng-chè Phùn-siā-liû

Chit-ê seng-chè phùn-siā-liû ê bóe-liu sī siáⁿ-mih? Lán seng lâi khoàⁿ chit-ê phùn-siā-liû: i sī ùi chit-ê tú hêng-sêng ê hêng-chhiⁿ hē-thóng phùn--chhut-lâi--ê, chit-ê hē-thóng ê pian-hō sī HH 49. Phùn-chhut chit-ê phùn-siā-liû ê hêng-chhiⁿ hē-thóng tī chiàⁿ-pêng ē-kha, m̄-koh lán khoàⁿ bē-tio̍h. James Webb Thài-khong Bōng-oán-kiàⁿ hip--ê chit-tiuⁿ âng-gōa-sòaⁿ iáⁿ-siōng, khoàⁿ ē-tio̍h ho̍k-cha̍p ê saⁿ-kak-tháng hêng kiat-kò͘, kî-tiong koh ū lēng-gōa chit-ê pian-hō HH 50 ê phùn-siā-liû. Koân sok-tō͘ ê phùn-siā-liû lia̍p-chú kah piⁿ-á ê seng-chè khì-thé sio-lòng, kek-hoat chhut-lâi ê kng sī tī âng-gōa-sòaⁿ pho-tōaⁿ, tō sī iáⁿ-siōng lāi-té ka-pi-âng ê soaⁿ-niā hêng kiat-kò͘. Chit-tiuⁿ James Webb Thài-khong Bōng-oán-kiàⁿ hip--ê iáⁿ-siōng, hō͘ lán liáu-kái HH 49 bóe-liu hit-ê kî-kî-koài-koài ê kiat-kò͘ tàu-té sī siáⁿ-mih: i kî-si̍t sī chit-ê iâu-oán ê kńg-lê-á seng-hē. Sóo-í, tiong-ng hit-ê nâ-sek ê pō͘-hūn m̄-sī chit-lia̍p hêng-chhiⁿ, sī chit-tōa-tīn hêng-chhiⁿ. Piⁿ-á ê îⁿ-kho͘-á, kî-si̍t sī kńg-lê-á chhiú-kut.

[KIP] HH 49：Uí-pah Thài-khong Bōng-uán-kiànn hip--ê Sing-tsè Phùn-siā-liû

Tsit-ê sing-tsè phùn-siā-liû ê bué-liu sī siánn-mih? Lán sing lâi khuànn tsit-ê phùn-siā-liû: i sī uì tsit-ê tú hîng-sîng ê hîng-tshinn hē-thóng phùn--tshut-lâi--ê, tsit-ê hē-thóng ê pian-hō sī HH 49. Phùn-tshut tsit-ê phùn-siā-liû ê hîng-tshinn hē-thóng tī tsiànn-pîng ē-kha, m̄-koh lán khuànn bē-tio̍h. James Webb Thài-khong Bōng-uán-kiànn hip--ê tsit-tiunn âng-guā-suànn iánn-siōng, khuànn ē-tio̍h ho̍k-tsa̍p ê sann-kak-tháng hîng kiat-kòo, kî-tiong koh ū līng-guā tsit-ê pian-hō HH 50 ê phùn-siā-liû. Kuân sok-tōo ê phùn-siā-liû lia̍p-tsú kah pinn-á ê sing-tsè khì-thé sio-lòng, kik-huat tshut-lâi ê kng sī tī âng-guā-suànn pho-tuānn, tō sī iánn-siōng lāi-té ka-pi-âng ê suann-niā hîng kiat-kòo. Tsit-tiunn James Webb Thài-khong Bōng-uán-kiànn hip--ê iánn-siōng, hōo lán liáu-kái HH 49 bué-liu hit-ê kî-kî-kuài-kuài ê kiat-kòo tàu-té sī siánn-mih: i kî-si̍t sī tsit-ê iâu-uán ê kńg-lê-á sing-hē. Sóo-í, tiong-ng hit-ê nâ-sik ê pōo-hūn m̄-sī tsit-lia̍p hîng-tshinn, sī tsit-tuā-tīn hîng-tshinn. Pinn-á ê înn-khoo-á, kî-si̍t sī kńg-lê-á tshiú-kut.

[English] HH 49: Interstellar Jet from Webb

What's at the tip of this interstellar jet? First let's consider the jet: it is being expelled by a star system just forming and is cataloged as Herbig-Haro 49 (HH 49). The star system expelling this jet is not visible -- it is off to the lower right. The complex conical structure featured in this infrared image by the James Webb Space Telescope also includes another jet cataloged as HH 50. The fast jet particles impact the surrounding interstellar gas and form shock waves that glow prominently in infrared light -- shown here as reddish-brown ridges. This JWST image also resolved the mystery of the unusual object at HH 49's tip: it is a spiral galaxy far in the distance. The blue center is therefore not one star but many, and the surrounding circular rings are actually spiral arms.

詞彙學習