月娘來揣七姊妹

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：Moon Visits Sister Stars
• 影像來源: Cayetana Saiz
• Jigsaw Challenge: Astronomy Puzzle of the Day
• 台文翻譯：An-Li Tsai (TARA)

[漢羅] 月娘來揣七姊妹

有當時仔，月娘會來揣昴宿星團。 昴宿星團嘛叫做七姊妹星團、七姑星、抑是七孤星。 月娘揣昴宿星團 ê 意思是，月娘 tī 天頂行到 昴宿星團 頭前。 實際上，星團是 tī 足遠 ê 後壁。 這个現象 ê 專有名詞叫做「掩星」。 月娘 ê 月掩星 現象，包括閘著太陽系內底 ê 行星 kah 一寡有名 ê 恆星。。 月娘 ê 軌道面有趨一个角度，閣有 進動 ê 現象，所以毋是逐年攏會閘著。 對 2023 年開始到 2029 年，逐個月攏會發生一擺 月掩昴宿 ê 現象。 毋過 2029 年，就愛等到 2042 年矣。 這張相片是 2025 年 4 月 1 號 tī 西班牙 ê Cantabria 翕--ê。 這是一張合成相片，是 kā 用仝一台相機、tī 仝一个所在翕--ê 昴宿星團 ê 相片，用數位方式疊做伙，咱才看會著 昴宿星團 ê 藍光。

[POJ] Goe̍h-niû lâi chhōe Chhit-chí-mōe

Ū tang-sî-á, goe̍h-niû ē lâi chhōe Báu-siù Seng-thoân. Báu-siù Seng-thoân mā kiò-chò Chhit-chí-mōe Seng-thoân, Chhit-ko͘-chhiⁿ, ia̍h-sī Chhit-ko͘-chhiⁿ. Goe̍h-niû chhōe Báu-siù Seng-thoân ê ì-sù sī, goe̍h-niû tī thiⁿ-téng kiâⁿ-kàu Báu-siù Seng-thoân thâu-chêng. Si̍t-chè-siōng, seng-thoân sī tī chiok hn̄g ê āu-piah. Chit-ê hiān-siōng ê choan-iú miâ-sû kiò-chò "Iám-chhiⁿ". Goe̍h-niû ê Goe̍h-iám-chhiⁿ hiān-siōng, pau-koat chah-tio̍h Thài-iông-hē lāi-té ê kiâⁿ-chhiⁿ kah chi̍t-kóa ū-miâ ê hêng-chhiⁿ. Goe̍h-niû ê kúi-tō-bīn ū chhu chi̍t-ê kak-tō͘, koh ū chìn-tōng ê hiān-siōng, só͘-í m̄-sī ta̍k-nî lóng ē chah-tio̍h. Tùi 2023 nî khai-sí kàu 2029 nî, ta̍k-kò-goe̍h lóng ē hoat-seng chi̍t-pái Goe̍h iám Báu-siù ê hiān-siōng. M̄-koh 2029 nî liáu-āu, to̍h ài tán-kàu 2042 nî--ah. Chit-tiuⁿ siòng-phìⁿ sī 2025 nî 4 goe̍h 1 hō tī Se-pan-gâ ê Cantabria hip--ê. Che sī chi̍t-tiuⁿ ha̍p-sêng siòng-phìⁿ, sī kā iōng kâng chi̍t-tâi siòng-ki, tī kâng chi̍t-ê só͘-chāi hip--ê Báu-siù Seng-thoân ê siòng-phìⁿ, iōng sò͘-ūi hong-sek tha̍h chò-hóe, lán chiah khòaⁿ-ē-tio̍h Báu-siù Seng-thoân ê nâ-kng.

[KIP] Gue̍h-niû lâi tshuē Tshit-tsí-muē

Ū tang-sî-á, gue̍h-niû ē lâi tshuē Báu-siù Sing-thuân. Báu-siù Sing-thuân mā kiò-tsò Tshit-tsí-muē Sing-thuân, Tshit-koo-tshinn, ia̍h-sī Tshit-koo-tshinn. Gue̍h-niû tshuē Báu-siù Sing-thuân ê ì-sù sī, gue̍h-niû tī thinn-tíng kiânn-kàu Báu-siù Sing-thuân thâu-tsîng. Si̍t-tsè-siōng, sing-thuân sī tī tsiok hn̄g ê āu-piah. Tsit-ê hiān-siōng ê tsuan-iú miâ-sû kiò-tsò "Iám-tshinn". Gue̍h-niû ê Gue̍h-iám-tshinn hiān-siōng, pau-kuat tsah-tio̍h Thài-iông-hē lāi-té ê kiânn-tshinn kah tsi̍t-kuá ū-miâ ê hîng-tshinn. Gue̍h-niû ê kuí-tō-bīn ū tshu tsi̍t-ê kak-tōo, koh ū tsìn-tōng ê hiān-siōng, sóo-í m̄-sī ta̍k-nî lóng ē tsah-tio̍h. Tuì 2023 nî khai-sí kàu 2029 nî, ta̍k-kò-gue̍h lóng ē huat-sing tsi̍t-pái Gue̍h iám Báu-siù ê hiān-siōng. M̄-koh 2029 nî liáu-āu, to̍h ài tán-kàu 2042 nî--ah. Tsit-tiunn siòng-phìnn sī 2025 nî 4 gue̍h 1 hō tī Se-pan-gâ ê Cantabria hip--ê. Tse sī tsi̍t-tiunn ha̍p-sîng siòng-phìnn, sī kā iōng kâng tsi̍t-tâi siòng-ki, tī kâng tsi̍t-ê sóo-tsāi hip--ê Báu-siù Sing-thuân ê siòng-phìnn, iōng sòo-uī hong-sik tha̍h tsò-hué, lán tsiah khuànn-ē-tio̍h Báu-siù Sing-thuân ê nâ-kng.

[English] Moon Visits Sister Stars

Sometimes, the Moon visits the Pleiades. Technically, this means that the orbit of our Moon takes it directly in front of the famous Pleiades star cluster, which is far in the distance. The technical term for the event is an occultation, and the Moon is famous for its rare occultations of all planets and several well-known bright stars. The Moon's tilted and precessing orbit makes its occultations of the Seven Sisters star cluster bunchy, with the current epoch starting in 2023 continuing monthly until 2029. After that, though, the next occultation won't occur until 2042. Taken from Cantabria, Spain on April 1, the featured image is a composite where previous exposures of the Pleiades from the same camera and location were digitally added to the last image to bring up the star cluster's iconic blue glow.

詞彙學習