月球頂懸 ê 地動是定定有

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：Moonquakes Surprisingly Common
• 影像來源: NASA,Apollo 11 Crew
• Explore Your Universe: Random APOD Generator
• 台文翻譯：An-Li Tsai (TARA)

[漢羅] 月球頂懸 ê 地動是定定有

是按怎月球頂懸 ê 地動遮爾濟？ 月球頂懸 ê 地動儀 是 阿波羅登月期間 留落來--ê。 分析資料了後發現，離月球表面 100 公里深 ê 範圍內，發生足濟足濟擺地動。 事實上，tī 1972 年到 1977 年之間 ê 記錄，攏總有 62 擺 發生 tī 月球 ê 地動。 真濟 月球頂懸 ê 地動 毋但強甲 會予 月球表面 ê 物件徙位，而且 月球表面 較𠕇 ê 岩石 會繼續振動幾若分鐘才會停，比地球頂懸 較軟 ê 岩石 振動 ê 時間閣較長。 月球頂懸 發生地動 ê 原因猶毋知，目前一个主要 ê 假設是講，是地球 ê 引潮力 kah 相對加熱 引起--ê。 毋管按怎，未來若是欲蹛 tī 月球頂懸，月球表面 ê 建築，就愛會堪得 定定發生 ê 地動。 這張相片 是 阿波羅 11 號 ê 太空人 Buzz Aldrin 徛 tī 拄囥好 ê 月球地動儀邊仔，越頭看 登月艙 ê 時陣翕--ê。

[POJ] Goe̍h-kiû téng-koân ê tē-tāng sī tiāⁿ-tiāⁿ ū

Sī án-chóaⁿ Goe̍h-kiû téng-koân ê tē-tāng chiah-nī chē? Goe̍h-kiû téng-koân ê tē-tāng-gî sī A-pho-lô teng-goe̍h kî-kan lâu-lo̍h-lâi--ê. Hun-sek chu-liāu liáu-āu hoat-hiān, lī Goe̍h-kiû piáu-bīn 100 kong-lí chhim ê hoân-ûi lāi, hoat-seng chiok chē chiok chē pái tē-tāng. Sū-si̍t-siōng, tī 1972 nî kàu 1977 nî chi-kan ê kì-lo̍k, lóng-chóng ū 62 pái hoat-seng tī Goe̍h-kiû ê tē-tāng. Chin chē Goe̍h-kiû téng-koân ê tē-tāng m̄-nā kiông kah ē hō͘ Goe̍h-kiû piáu-bīn ê mi̍h-kiāⁿ sóa-ūi, jî-chhiáⁿ Goe̍h-kiû piáu-bīn khah tēng ê giâm-chio̍h ē kè-sio̍k tín-tāng kúi-nā hun-cheng chiah ē thêng, pí Tē-kiû téng-koân khah-nńg ê giâm-chio̍h tín-tāng ê sî-kan koh-khah tn̂g. Goe̍h-kiû téng-koân hoat-seng tē-tāng ê goân-in iáu m̄-chai, bo̍k-chiáⁿ chit-ê chú-iàu ê ká-soat sī kóng, sī Tē-kiû ê ín-tiâu-le̍k kah siong-tùi ka-jia̍t ín-khí--ê. M̄-koáⁿ án-chóaⁿ, bī-lâi nā-sī beh tòa tī Goe̍h-kiû téng-koân, Goe̍h-kiû piáu-bīn ê kiàn-tio̍k, tō ài ē kham-tit tiāⁿ-tiāⁿ hoat-seng ê tē-tāng. Chit-tiuⁿ siòng-phìⁿ sī A-pho-lô 11 hō ê thài-khong-jîn Buzz Aldrin khiā tī tú khǹg-hó ê Goe̍h-kiû tē-tāng-gî piⁿ-á, oa̍t-thâu khoàⁿ teng-goe̍h-chhng ê sî-chūn hip--ê.

[KIP] Gue̍h-kiû tíng-kuân ê tē-tāng sī tiānn-tiānn ū

Sī án-tsuánn Gue̍h-kiû tíng-kuân ê tē-tāng tsiah-nī tsē? Gue̍h-kiû tíng-kuân ê tē-tāng-gî sī A-pho-lô ting-gue̍h kî-kan lâu-lo̍h-lâi--ê. Hun-sik tsu-liāu liáu-āu huat-hiān, lī Gue̍h-kiû piáu-bīn 100 kong-lí tshim ê huân-uî lāi, huat-sing tsiok tsē tsiok tsē pái tē-tāng. Sū-si̍t-siōng, tī 1972 nî kàu 1977 nî tsi-kan ê kì-lo̍k, lóng-tsóng ū 62 pái huat-sing tī Gue̍h-kiû ê tē-tāng. Tsin tsē Gue̍h-kiû tíng-kuân ê tē-tāng m̄-nā kiông kah ē hōo Gue̍h-kiû piáu-bīn ê mi̍h-kiānn suá-uī, jî-tshiánn Gue̍h-kiû piáu-bīn khah tīng ê giâm-tsio̍h ē kè-sio̍k tín-tāng kuí-nā hun-tsing tsiah ē thîng, pí Tē-kiû tíng-kuân khah-nńg ê giâm-tsio̍h tín-tāng ê sî-kan koh-khah tn̂g. Gue̍h-kiû tíng-kuân huat-sing tē-tāng ê guân-in iáu m̄-tsai, bo̍k-tsiánn tsit-ê tsú-iàu ê ká-suat sī kóng, sī Tē-kiû ê ín-tiâu-li̍k kah siong-tuì ka-jia̍t ín-khí--ê. M̄-kuánn án-tsuánn, bī-lâi nā-sī beh tuà tī Gue̍h-kiû tíng-kuân, Gue̍h-kiû piáu-bīn ê kiàn-tio̍k, tō ài ē kham-tit tiānn-tiānn huat-sing ê tē-tāng. Tsit-tiunn siòng-phìnn sī A-pho-lô 11 hō ê thài-khong-jîn Buzz Aldrin khiā tī tú khǹg-hó ê Gue̍h-kiû tē-tāng-gî pinn-á, ua̍t-thâu khuànn ting-gue̍h-tshng ê sî-tsūn hip--ê.

[English] Moonquakes Surprisingly Common

Why are there so many moonquakes? Analyses of seismometers left on the moon during the Apollo moon landings reveal a surprising number of moonquakes occurring within 100 kilometers of the surface. In fact, 62 moonquakes were detected in data recorded between 1972 and 1977. Many of these moonquakes are not only strong enough to move furniture in a lunar apartment, but the stiff rock of the moon continues to vibrate for many minutes, significantly longer than the softer rock earthquakes on Earth. The cause of the moonquakes remains unknown, but a leading hypothesis includes tidal gravity from -- and relative heating by -- our Earth. Regardless of the source, future moon dwellings need to be built to withstand the frequent shakings. Pictured here, Apollo 11 astronaut Buzz Aldrin stands beside a recently deployed lunar seismometer, looking back toward the lunar landing module.

詞彙學習