A Double Sunrise from a Partial Eclipse

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：A Double Sunrise from a Partial Eclipse
• 影片來源 kah 版權: Jason Kurth; Music:House of the Rising Sun(Sebastian McQueen via SoundCloud)
• Gallery: Partial Solar Eclipse of 2025 March
• 台文翻譯：An-Li Tsai (TARA)

[漢羅] 日偏食 ê 雙重日出

日出敢有法度同齊出現兩擺？ 今年 3 月 ê 日食，台灣看袂著，毋過 tī 加拿大 魁北克省 ê Les Escoumins 日出 ê 時陣，日頭中央已經去予月球閘著矣。 這段影片是 tī St. Lawrence 河邊翕--ê，就拄仔好翕著這个足罕得看著 ê 雙重日出 kah 伊 ê 倒影。 影片拄開始無偌久，有兩粒光點 tī 遠方 ê 雲層頂懸出現。 無偌久，煞出現牛角形 ê 發光體，這其實是無去予月球閘著 ê 太陽。 紲落來，規粒去予閘著 ê 日頭 tō 出現 tī 地平線頂懸。 雖罔講規个日偏食 ê 時間 是閣較長，毋過分做兩爿 ê 日出干焦出現無兩分鐘。 是講，月球逐個月踅地球一擺，毋過伊毋是逐擺攏會閘著太陽。 因為月球踅地球 ê 軌道 kah 地球踅太陽 ê 軌道無 tī 仝一个平面，發生日食 ê 時陣，月球定定干焦閘著太陽 ê 頂懸抑是下跤。

[POJ] Ji̍t phian-si̍t ê Siang-têng Ji̍t-chhut

Ji̍t-chhut kám ū hoat-tō͘ tâng-chê chhut-hiān nn̄g-pái? Kin-nî 3 goe̍h ê ji̍t-si̍t, Tâi-ôan khoàⁿ bē-tio̍h, m̄-koh tī Ka-ná-tà Khûi-pak-khek séng ê Les Escoumins ji̍t-chhut ê sî-chūn, ji̍t-thâu tiong-ng í-keng khì hō͘ goe̍h-kiû cha̍h--tio̍h ah. Chit-tōaⁿ iáⁿ-phìⁿ sī tī St. Lawrence hô-piⁿ hip--ê, tō tú-á-hó hip-tio̍h chit-ê chiok hán-tit khoàⁿ-tio̍h ê siang-tiông ji̍t-chhut kah i ê tò-iáⁿ. Iáⁿ-phìⁿ tú khai-sí bô gōa-kú, ū nn̄g-lia̍p kng-tiám tī oán-hong ê hûn-chân téng-koân chhut-hiān. Bô gōa-kú, soah chhut-hiān gû-kak-hêng ê hoat-kng-thé, che kî-si̍t sī bô khì hō͘ goe̍h-kiû cha̍h-tio̍h ê thài-iông. Sòa-lo̍h-lâi, kui-lia̍p khì hō͘ cha̍h--tio̍h ê ji̍t-thâu tō chhut-hiān tī tē-pêng-sòaⁿ téng-koân. Sui-bóng kóng kui-ê ji̍t-phian-si̍t ê sî-kan sī koh-khah tn̂g, m̄-koh hun-chò nn̄g-pêng ê ji̍t-chhut kan-na chhut-hiān bô nn̄g hun-cheng. Sī-kóng, goe̍h-kiû ta̍k-kò-goe̍h se̍h tē-kiû chit-pái, m̄-koh i m̄-sī ta̍k-pái lóng ē cha̍h--tio̍h thài-iông. In-ūi goe̍h-kiû se̍h tē-kiû ê kúi-tō kah tē-kiû se̍h thài-iông ê kúi-tō bô tī kāng chit-ê pêng-bīn, hoat-seng ji̍t-si̍t ê sî-chūn, goe̍h-kiû tiāⁿ-tiāⁿ kan-na cha̍h-tio̍h thài-iông ê téng-koân ia̍h-sī ē-kha.

[KIP] Ji̍t phian-si̍t ê Siang-tîng Ji̍t-tshut

Ji̍t-tshut kám ū huat-tōo tâng-tsê tshut-hiān nn̄g-pái? Kin-nî 3 gue̍h ê ji̍t-si̍t, Tâi-uân khuànn bē-tio̍h, m̄-koh tī Ka-ná-tà Khuî-pak-khik síng ê Les Escoumins ji̍t-tshut ê sî-tsūn, ji̍t-thâu tiong-ng í-king khì hōo gue̍h-kiû tsa̍h--tio̍h ah. Tsit-tuānn iánn-phìnn sī tī St. Lawrence hô-pinn hip--ê, tō tú-á-hó hip-tio̍h tsit-ê tsiok hán-tit khuànn-tio̍h ê siang-tiông ji̍t-tshut kah i ê tò-iánn. Iánn-phìnn tú khai-sí bô guā-kú, ū nn̄g-lia̍p kng-tiám tī uán-hong ê hûn-tsân tíng-kuân tshut-hiān. Bô guā-kú, suah tshut-hiān gû-kak-hîng ê huat-kng-thé, tse kî-si̍t sī bô khì hōo gue̍h-kiû tsa̍h-tio̍h ê thài-iông. Suà-lo̍h-lâi, kui-lia̍p khì hōo tsa̍h--tio̍h ê ji̍t-thâu tō tshut-hiān tī tē-pîng-suànn tíng-kuân. Sui-bóng kóng kui-ê ji̍t-phian-si̍t ê sî-kan sī koh-khah tn̂g, m̄-koh hun-tsò nn̄g-pîng ê ji̍t-tshut kan-na tshut-hiān bô nn̄g hun-tsing. Sī-kóng, gue̍h-kiû ta̍k-kò-gue̍h se̍h tē-kiû tsit-pái, m̄-koh i m̄-sī ta̍k-pái lóng ē tsa̍h--tio̍h thài-iông. In-uī gue̍h-kiû se̍h tē-kiû ê kuí-tō kah tē-kiû se̍h thài-iông ê kuí-tō bô tī kāng tsit-ê pîng-bīn, huat-sing ji̍t-si̍t ê sî-tsūn, gue̍h-kiû tiānn-tiānn kan-na tsa̍h-tio̍h thài-iông ê tíng-kuân ia̍h-sī ē-kha.

[English] A Double Sunrise from a Partial Eclipse

Can the Sun appear to rise twice at the same time? This was just the case a few days ago from Les Escoumins, Quebec, Canada as our Solar System's bright central orb rose just as it was being partially eclipsed by the Moon. The featured video shows this unusual double-sunrise in real time and being reflected by the St. Lawrence River. Soon after the initial two spots of light appear over distant clouds, what appears to be bright horns become visible -- which are really just parts of the Sun not being eclipsed. Soon, the entire eclipsed Sun is visible above the horizon. In all, this broken sunrise took less than two minutes during a partial eclipse that lasted many times longer. Although the Moon circles the Earth once a month (moon-th), it does not always eclipse the Sun because its tilted orbit usually takes it above or below.

詞彙學習