月球頂懸 ê Hyginus 溪谷

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：Rima Hyginus
• 影像來源 kah 版權：Vincenzo Mirabella
• 台文翻譯：An-Li Tsai (TARA)

[漢羅] 月球頂懸 ê Hyginus 溪谷

Hyginus 溪谷是 月球正面 中心附近 足壯觀 ê 裂縫，攏總有 220 公里長。 這張月球特寫相片內底 ê 裂縫，是會當用望遠鏡揣著--ê，ùi 倒爿頂懸一直到正爿下底。 這張相片 ê 色水有加強過，予月球塗肉 ê 礦物成份表現 kah 較明顯淡薄。 這條裂縫中央有一个直徑 10 公里 ê Hyginus 坑，坑仔邊較低，應該是火山口。 佇月球表面較大粒 ê 坑內底，這个坑毋是去予太空石頭挵著 ê 坑。 Hyginus 溪谷 ê 表面嘛有足濟塌落去 ê 細粒坑，科學家認為 Hyginus 溪谷可能佮月球內部 流出來 ê 岩漿 佮 月球表面 斷層 塌落去有關。 這區真趣味，嘛是進前 阿波羅 19 號登月任務 其中一个候選 ê 降落地點，毋過落尾無揀遮。

[POJ] Goe̍h-kiû téng-koân ê Hyginus Khe-kok

Hyginus Khe-kok sī Goe̍h-kiû chiàⁿ-bīn tiong-sim hù-kīn chiok chòng-koan ê li̍h-phāng, lóng-chóng ū 220 kong-lí tn̂g. Chit-tiuⁿ Goe̍h-kiû te̍k-siá siòng-phìⁿ lāi-té ê li̍h-phāng, sī ē-tàng iōng bōng-oán-kiàⁿ chhōe-tio̍h--ê, ùi tò-pêng téng-koân it-ti̍t kàu chiàⁿ-pêng ē-té. Chit-tiuⁿ siòng-phìⁿ ê sek-chúi ū ka-kiông kòe, hō͘ Goe̍h-kiû thô͘-bah ê khòng-bu̍t sêng-hūn piáu-hiān kah khah bêng-hián tām-po̍h. Chit tiâu li̍h-phāng tiong-ng ū chi̍t-ê ti̍t-kèng 10 kong-lí ê Hyginus kheⁿ, kheⁿ-á-piⁿ khah kē, eng-kai sī hóe-soaⁿ-kháu. Tī Goe̍h-kiû piáu-bīn khah tōa-lia̍p ê kheⁿ lāi-té, chit-é kheⁿ m̄-sī khì hō͘ thài-khong chio̍h-thâu lòng--tio̍h ê kheⁿ. Hyginus Khe-kok ê piáu-bīn mā ū chiok chē lap--lo̍h-khì ê sè-lia̍p kheⁿ, kho-ha̍k-ka jīn-ûi Hyginus Khe-kok khó-lêng kah Goe̍h-kiû lōe-pō͘ lâu--chhut-lâi ê giâm-chiuⁿ kah Goe̍h-kiû piáu-bīn tn̄g-chân lap--lo̍h-khì iú-koan. Chit khu chin chhù-bī, mā-sī chìn-chêng A-pho-lô 19 hō teng-goe̍h jīm-bū kî-tiong chi̍t-ê hāu-soán ê kàng-lo̍h tē-tiám, m̄-koh lo̍h-bóe bô kéng chia.

[KIP] Gue̍h-kiû tíng-kuân ê Hyginus Khe-kok

Hyginus Khe-kok sī Gue̍h-kiû tsiànn-bīn tiong-sim hù-kīn tsiok tsòng-kuan ê li̍h-phāng, lóng-tsóng ū 220 kong-lí tn̂g. Tsit-tiunn Gue̍h-kiû ti̍k-siá siòng-phìnn lāi-té ê li̍h-phāng, sī ē-tàng iōng bōng-uán-kiànn tshuē-tio̍h--ê, uì tò-pîng tíng-kuân it-ti̍t kàu tsiànn-pîng ē-té. Tsit-tiunn siòng-phìnn ê sik-tsuí ū ka-kiông kuè, hōo Gue̍h-kiû thôo-bah ê khòng-bu̍t sîng-hūn piáu-hiān kah khah bîng-hián tām-po̍h. Tsit tiâu li̍h-phāng tiong-ng ū tsi̍t-ê ti̍t-kìng 10 kong-lí ê Hyginus khenn, khenn-á-pinn khah kē, ing-kai sī hué-suann-kháu. Tī Gue̍h-kiû piáu-bīn khah tuā-lia̍p ê khenn lāi-té, tsit-é khenn m̄-sī khì hōo thài-khong tsio̍h-thâu lòng--tio̍h ê khenn. Hyginus Khe-kok ê piáu-bīn mā ū tsiok tsē lap--lo̍h-khì ê sè-lia̍p khenn, kho-ha̍k-ka jīn-uî Hyginus Khe-kok khó-lîng kah Gue̍h-kiû luē-pōo lâu--tshut-lâi ê giâm-tsiunn kah Gue̍h-kiû piáu-bīn tn̄g-tsân lap--lo̍h-khì iú-kuan. Tsit khu tsin tshù-bī, mā-sī tsìn-tsîng A-pho-lô 19 hō ting-gue̍h jīm-bū kî-tiong tsi̍t-ê hāu-suán ê kàng-lo̍h tē-tiám, m̄-koh lo̍h-bué bô kíng tsia.

[English] Rima Hyginus

Rima Hyginus is a spectacular fissure, some 220 kilometers long, found near the center of the lunar near side. Easy to spot in telescopic views of the Moon, it stretches top left to bottom right across this lunar closeup. The image was made with exaggerated colors that reflect the mineral composition of the lunar soil. Hyginus crater lies near the center of the narrow lunar surface groove. About 10 kilometers in diameter, the low-walled crater is a volcanic caldera, one of the larger non-impact craters on the lunar surface. Dotted with small pits formed by surface collapse, Hyginus rima itself was likely created by stresses due to internal magma upwelling and collapse along a long surface fault. The intriguing region was a candidate landing site for the canceled Apollo 19 mission.

詞彙學習