Messier 87

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：Messier 87
• 影像來源：NASA, ESA and the Hubble Heritage Team
• 台文翻譯：An-Li Tsai (TARA)

[漢羅] Messier 87

大型長株圓星系 Messier 87 (M 87)，嘛叫做 NGC 4486，就 chhāi 佇 5000 萬光年遠 ê 所在。 這粒大粒星系是 室女座星系團 中央上大粒 ê 星系，伊有幾若兆粒恆星。 咱 ê 銀河系是一个捲螺仔星系，嘛才幾若千億粒爾爾。 佇 Hubble 太空望遠鏡翕--ê 光學紅外線 影像中，咱看會著星系核心中央噴出 高能噴射流，有 5000 光年遐爾長。 實際上，這个宇宙噴射 佇 gamma 光 到 電波波段 是攏看會著。 驅動 伊--ê，是 M87 中央 ê 超大質量烏洞。 M87 中央這粒怪獸，進前捌去予 地面 ê 事件視界望遠鏡 EHT 翕著。

[POJ] Messier 87

Tōa-hêng tn̂g-tu-îⁿ seng-hē Messier 87 (M87), mā kiò-chò NGC 4486, tō chhāi tī 5000 bān kng-nî hn̄g ê só͘-chāi. Chit lia̍p tōa-lia̍p seng-hē sī Sek-lú-chō Seng-hē-thoân tiong-ng siōng tōa-lia̍p ê seng-hē, i ū kúi-nā tiāu lia̍p hêng-chhiⁿ. Lán ê Gîn-hô-hē sī chi̍t-ê kńg-lê-á seng-hē, mā chiah kúi-nā chheng ek lia̍p niā-niā. Tī Hubble Thài-khong Bōng-oán-kiàⁿ hip--ê kng-ha̍k âng-gōa-sòaⁿ iáⁿ-siōng tiong, lán khòaⁿ-ē-tio̍h seng-hē he̍k-sim tiong-ng phùn-chhut ko-lêng phùn-siā-liû, ū 5000 kng-nî hiah-nī tn̂g. Si̍t-chè-siōng, chit-ê ú-tiū phùn-siā tī gamma-kng kàu tiān-pho pho-tōaⁿ sī lóng khòaⁿ-ē-tio̍h. Khu-tōng i--ê, sī M87 tiong-ng ê chhiau-tōa chit-liōng o͘-tōng. M87 tiong-ng chit lia̍p koài-siù, chìn-chêng bat khì hō͘ tē-bīn ê Sū-kiāⁿ Sī-kài Bōng-oán-kiàⁿ EHT hip-tio̍h.

[KIP] Messier 87

Tuā-hîng tn̂g-tu-înn sing-hē Messier 87 (M87), mā kiò-tsò NGC 4486, tō tshāi tī 5000 bān kng-nî hn̄g ê sóo-tsāi. Tsit lia̍p tuā-lia̍p sing-hē sī Sik-lú-tsō Sing-hē-thuân tiong-ng siōng tuā-lia̍p ê sing-hē, i ū kuí-nā tiāu lia̍p hîng-tshinn. Lán ê Gîn-hô-hē sī tsi̍t-ê kńg-lê-á sing-hē, mā tsiah kuí-nā tshing ik lia̍p niā-niā. Tī Hubble Thài-khong Bōng-uán-kiànn hip--ê kng-ha̍k âng-guā-suànn iánn-siōng tiong, lán khuànn-ē-tio̍h sing-hē hi̍k-sim tiong-ng phùn-tshut ko-lîng phùn-siā-liû, ū 5000 kng-nî hiah-nī tn̂g. Si̍t-tsè-siōng, tsit-ê ú-tiū phùn-siā tī gamma-kng kàu tiān-pho pho-tuānn sī lóng khuànn-ē-tio̍h. Khu-tōng i--ê, sī M87 tiong-ng ê tshiau-tuā tsit-liōng oo-tōng. M87 tiong-ng tsit lia̍p kuài-siù, tsìn-tsîng bat khì hōo tē-bīn ê Sū-kiānn Sī-kài Bōng-uán-kiànn EHT hip-tio̍h.

[English] Messier 87

Enormous elliptical galaxy Messier 87 is about 50 million light-years away. Also known as NGC 4486, the giant galaxy holds trillions of stars compared to the mere billions of stars in our large spiral Milky Way. M87 reigns as the large central elliptical galaxy in the Virgo galaxy cluster. An energetic jet from the giant galaxy's core is seen to stretch outward for about 5,000 light-years in this sharp optical and near-infrared view from the Hubble Space Telescope. In fact, the cosmic blow torch is seen across the electromagnetic spectrum from gamma-rays to radio wavelengths. Its ultimate power source is M87's central, supermassive black hole. An image of this monster in the middle of M87 has been captured by planet Earth's Event Horizon Telescope.

詞彙學習