宇宙玫瑰：麒麟座 ê NGC 2237

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：A Cosmic Rose: NGC 2237 in Monoceros
• 影像來源 kah 版權：Harry Karamitsos
• 台文翻譯：An-Li Tsai (TARA)

[漢羅] 宇宙玫瑰：麒麟座 ê NGC 2237

玫瑰星雲 NGC 2237 毋是宇宙中唯一个會 聯想 著 花 ê 氣體塗粉雲，毋過伊是上有名 ê 彼个。 這蕊宇宙玫瑰 就佇 麒麟座大 分子雲 邊仔 5000 光年遠 ê 所在，伊 ê 花葉 實際上是恆星 ê 搖笱。 玫瑰星雲美麗對稱 ê 外觀 是 NGC 2244 星團 內底 ê 恆星風 佮 輻射 雕出來--ê。 這个 能量足懸 ê 星團 內底，有足濟 高溫 少年 ê O 型星，年歲才 幾若百萬歲爾爾。 玫瑰星雲中央雲空 ê 直徑差不多是 50 光年 闊。 咱會當佇 麒麟座，嘛會使叫做 獨角獸座 抑是 釘仔馬座 方向，用 細台天文望遠鏡 揣著 這个星雲。 這幅色水足自然 ê 望遠鏡影像，是用 闊頻濾鏡翕--ê。 是講，玫瑰嘛無一定攏是紅--ê。

[POJ] Ú-tiū Mûi-kùi: Kî-lîn-chō ê NGC 2237

Mûi-kùi Seng-hûn NGC 2237 m̄-sī ú-tiū tiong ûi-it ē liân-sióng tio̍h hoe ê khì-thé thô͘-hún hûn, m̄-koh i sī siōng ū-miâ ê hit-ê. Chit lúi ú-tiū mûi-kùi tō tī Kî-lîn-chō tōa hun-chú-hûn piⁿ-á 5000 kng-nî hn̄g ê só͘-chāi, i ê hoe-hio̍h si̍t-chè-siōng sī hêng-chhiⁿ ê iô-kô. Mûi-kùi Seng-hûn bí-lē tùi-chheng ê gōa-koan sī NGC 2244 seng-thoân lāi-té ê hêng-chhiⁿ-hong kah hok-siā tiau chhut-lâi--ê. Chit-ê lêng-liōng chiok koân ê seng-thoân lāi-té, ū chiok chē ko-un siàu-liân ê o hêng-chhiⁿ, nî-hòe chiah kúi-nā pah bān-sòe niā-niā. Mûi-kùi Seng-hûn tiong-ng hûn-khang ê ti̍t-kèng chha-put-to sī 50 kng-nî khoah. Lán ē-tàng tī Kî-lîn-chō, mā ē-sái kiò-chò To̍k-kak-siù-chō ia̍h-sī Teng-á-bé-chō hong-hiòng, iōng sè-tâi thian-bûn bōng-oán-kiàⁿ chhōe-tio̍h chit-ê seng-hûn. Chit pak sek-chúi chok chū-jiân ê bōng-oán-kiàⁿ iáⁿ-siōng, sī iōng khoah-pîn lī-kiàⁿ hip--ê. Sī-kóng, mûi-kùi mā bô-it-tēng lóng sī âng--ê.

[KIP] Ú-tiū Muî-kuì: Kî-lîn-tsō ê NGC 2237

Muî-kuì Sing-hûn NGC 2237 m̄-sī ú-tiū tiong uî-it ē liân-sióng tio̍h hue ê khì-thé thôo-hún hûn, m̄-koh i sī siōng ū-miâ ê hit-ê. Tsit luí ú-tiū muî-kuì tō tī Kî-lîn-tsō tuā hun-tsú-hûn pinn-á 5000 kng-nî hn̄g ê sóo-tsāi, i ê hue-hio̍h si̍t-tsè-siōng sī hîng-tshinn ê iô-kô. Muî-kuì Sing-hûn bí-lē tuì-tshing ê guā-kuan sī NGC 2244 sing-thuân lāi-té ê hîng-tshinn-hong kah hok-siā tiau tshut-lâi--ê. Tsit-ê lîng-liōng tsiok kuân ê sing-thuân lāi-té, ū tsiok tsē ko-un siàu-liân ê o hîng-tshinn, nî-huè tsiah kuí-nā pah bān-suè niā-niā. Muî-kuì Sing-hûn tiong-ng hûn-khang ê ti̍t-kìng tsha-put-to sī 50 kng-nî khuah. Lán ē-tàng tī Kî-lîn-tsō, mā ē-sái kiò-tsò To̍k-kak-siù-tsō ia̍h-sī Ting-á-bé-tsō hong-hiòng, iōng sè-tâi thian-bûn bōng-uán-kiànn tshuē-tio̍h tsit-ê sing-hûn. Tsit pak sik-tsuí tsok tsū-jiân ê bōng-uán-kiànn iánn-siōng, sī iōng khuah-pîn lī-kiànn hip--ê. Sī-kóng, muî-kuì mā bô-it-tīng lóng sī âng--ê.

[English] A Cosmic Rose: NGC 2237 in Monoceros

The Rosette Nebula, NGC 2237, is not the only cosmic cloud of gas and dust to evoke the imagery of flowers, but it is probably the most famous. At the edge of a large molecular cloud in Monoceros some 5,000 light years away, the petals of this cosmic rose are actually a stellar nursery. The lovely, symmetric shape is sculpted by the winds and radiation from its central cluster of hot young, O-type stars. Stars in the energetic cluster, cataloged as NGC 2244, are only a few million years young, while the central cavity in the Rosette Nebula, is about 50 light-years in diameter. The nebula can be seen with a small telescope toward the constellation of Monoceros, the Unicorn. This natural appearing telescopic portrait of the Rosette Nebula was made using broadband color filters, but sometimes roses aren't red.

詞彙學習