LEDA 1313424：箭靶星系

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：LEDA 1313424: The Bullseye Galaxy
• 影像來源 kah 版權：NASA, ESA, Imad Pasha (Yale), Pieter van Dokkum (Yale)
• 台文翻譯：An-Li Tsai (TARA)

[漢羅] LEDA 1313424: 箭靶星系

這粒大粒星系 ê 編號是 LEDA 1313424，差不多是咱銀河 ê 兩倍大。 這張是 Hubble 太空望遠鏡最近發表 ê 影像。 因為伊看起來敢若是射箭 ê 箭靶，所以嘛叫做 箭靶星系。 望遠鏡 ê 觀測表示講，伊是一个去予舂出 9 重環 ê 環形星系，就敢若是共石頭擲入去水池內底 產生 ê 水湧 仝款。 是講，這个落落去 箭靶星系 內底 ê 石頭，其實是另外一粒星系。 望遠鏡 ê 觀測閣講，這粒星系可能是倒爿彼粒藍色 ê 矮星系。 伊迵過這粒大粒星系 ê 中心，產生重力交互作用，造成大粒星系中心 ê 仝心環。 箭靶星系 是 tī 雙魚座方向 5 億 6700 光年遠 ê 所在。 照 這个距離 來算，這張精彩 ê Hubble 影像應該有 53 萬光年闊。

[POJ] LEDA 1313424: Chìⁿ-pé Seng-hē

Chit lia̍p tōa-lia̍p seng-hē ê pian-hō sī LEDA 1313424, chha-put-to sī lán Gîn-hô ê nn̄g pōe tōa. Chit-tiuⁿ sī Hubble Thài-khong Bōng-oán-kiàⁿ chòe-kīn hoat-piáu ê iáⁿ-siōng. In-ūi i khòaⁿ--khí-lâi káⁿ-ná sī siā-chìⁿ é chìⁿ-pé, só͘-í mā kiò-chò Chìⁿ-pé Seng-hē. Bōng-oán-kiàⁿ ê koan-chhek piáu-sī kóng, i sī chi̍t-ê khì hō͘ cheng-chhut 9 tîn khoân ê khoân-hêng seng-hē, tō káⁿ-ná sī kā chio̍h-thâu tàn ji̍p-khì chúi-tî lāi-té sán-seng ê chúi-éng kāng-khoán. Sī-kóng, chit-ê lak--loh-khì Chìⁿ-pé Seng-hē lāi-té ê chio̍h-thâu, kî-si̍t sī lēng-gōa chi̍t-lia̍p seng-hē. Bōng-oán-kiàⁿ ê koan-chhek koh kóng, chit lia̍p seng-hē khó-lêng sī tò-pêng hit lia̍p nâ-sek ê é-seng-hē. I thàng-kòe chit lia̍p tōa-lia̍p seng-hē ê tiong-sim, sán-seng tāng-le̍k kau-hō͘ chok-iōng, chō-sêng tōa-lia̍p seng-hē tiong-sim ê kāng-sim-khoân. Chìⁿ-pé Seng-hē sī tī Siang-hî-chō hong-hiòng 5 ek 6700 kng-nî hn̄g ê só͘-chāi. Chiàu chit-ê kī-lī lâi sǹg, chit-tiuⁿ cheng-chhái ê Hubble iáⁿ-siōng eng-kai ū 53 bān kng-nî khoah.

[KIP] LEDA 1313424: Tsìnn-pé Sing-hē

Tsit lia̍p tuā-lia̍p sing-hē ê pian-hō sī LEDA 1313424, tsha-put-to sī lán Gîn-hô ê nn̄g puē tuā. Tsit-tiunn sī Hubble Thài-khong Bōng-uán-kiànn tsuè-kīn huat-piáu ê iánn-siōng. In-uī i khuànn--khí-lâi kánn-ná sī siā-tsìnn é tsìnn-pé, sóo-í mā kiò-tsò Tsìnn-pé Sing-hē. Bōng-uán-kiànn ê kuan-tshik piáu-sī kóng, i sī tsi̍t-ê khì hōo tsing-tshut 9 tîn khuân ê khuân-hîng sing-hē, tō kánn-ná sī kā tsio̍h-thâu tàn ji̍p-khì tsuí-tî lāi-té sán-sing ê tsuí-íng kāng-khuán. Sī-kóng, tsit-ê lak--loh-khì Tsìnn-pé Sing-hē lāi-té ê tsio̍h-thâu, kî-si̍t sī līng-guā tsi̍t-lia̍p sing-hē. Bōng-uán-kiànn ê kuan-tshik koh kóng, tsit lia̍p sing-hē khó-lîng sī tò-pîng hit lia̍p nâ-sik ê é-sing-hē. I thàng-kuè tsit lia̍p tuā-lia̍p sing-hē ê tiong-sim, sán-sing tāng-li̍k kau-hōo tsok-iōng, tsō-sîng tuā-lia̍p sing-hē tiong-sim ê kāng-sim-khuân. Tsìnn-pé Sing-hē sī tī Siang-hî-tsō hong-hiòng 5 ik 6700 kng-nî hn̄g ê sóo-tsāi. Tsiàu tsit-ê kī-lī lâi sǹg, tsit-tiunn tsing-tshái ê Hubble iánn-siōng ing-kai ū 53 bān kng-nî khuah.

[English] LEDA 1313424: The Bullseye Galaxy

The giant galaxy cataloged as LEDA 1313424 is about two and a half times the size of our own Milky Way. Its remarkable appearance in this recently released Hubble Space Telescope image strongly suggests its nickname "The Bullseye Galaxy". Known as a collisional ring galaxy it has nine rings confirmed by telescopic observations, rippling from its center like waves from a pebble dropped into a pond. Of course, the pebble dropped into the Bullseye galaxy was a galaxy itself. Telescopic observations identify the blue dwarf galaxy at center-left as the likely collider, passing through the giant galaxy's center and forming concentric rings in the wake of their gravitational interaction. The Bullseye Galaxy lies some 567 million light-years away toward the constellation Pisces. At that distance, this stunning Hubble image would span about 530,000 light-years.

詞彙學習