Ùi 智利 山頭 落去 ê G3 ATLAS 彗星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：Comet G3 ATLAS Setting over a Chilean Hill
• 影像來源 kah 版權：Gabriel Muñoz
• 台文翻譯：An-Li Tsai (TARA)

[漢羅] Ùi 智利 山頭 落去 ê G3 ATLAS 彗星

ATLAS 彗星是欲去佗位？ Tī 這支 縮時攝影影片 內底，毋是彗星行遮爾緊，是 地球自轉 予伊看起來敢若是 ùi 山頭 落去。 彗星 C/2024 G3 (ATLAS 彗星) ê 系列相片是 1 月 22 tī 智利 Araucanía 區 用普通 ê kha-mé-lah 翕--ê。 ATLAS 彗星 是過去幾若禮拜 tī 地球 南半球 足顯目 ê 天體。 伊光甲可能會變做 2025 年上出名 ê 大彗星。 是講真不幸，G3 ATLAS 彗星 袂繼續伊 ê 旅行矣。 因為伊 ê 中心彗核，tī 頂個月行倚 太陽 ê 時陣已經 崩去矣。 賰落來 ê 彗星屑仔，主要 ê 成份是 岩石 kah 冰，有一寡仔會繼續 踅太陽行，有一寡仔會綴彗核本底欲行 ê 軌道繼續行。

[POJ] Ùi Tì-lī soaⁿ-thâu lo̍h-khì ê G3 ATLAS Hūi-chheⁿ

ATLAS Hūi-chheⁿ sī beh khì tó-ūi? Tī chit-ki sok-sî-liap-iáⁿ iáⁿ-phìⁿ lāi-té, m̄-sī hūi-chheⁿ kiâⁿ chiah-nī kín, sī Tē-kiû chū-choán hō͘ i khòaⁿ--khí-lâi káⁿ-ná sī ùi soaⁿ-thâu lo̍h-khì. Hūi-chheⁿ C/2024 G3 (ATLAS Hūi-chheⁿ) ê hē-lia̍t siòng-phìⁿ sī 1 goe̍h 22 tī Tì-lī Araucanía khu iōng phó͘-thong ê kha-mé-lah hip--ê. ATLAS Hūi-chheⁿ sī kòe-khì kúi-nā lé-pài tī Tē-kiû lâm-pòaⁿ-kiû chiok hiáⁿ-ba̍k ê thian-thé. I kng kah khó-lêng ē piàn-chò 2025 nî siōng chhut-miâ ê tōa hūi-chheⁿ. Sī-kóng chin put-hēng, G3 ATLAS Hūi-chheⁿ bē kè-sio̍k i ê lí-hêng--ah. In-ūi i ê tiong-sim hūi-he̍k, tī téng kò goe̍h kiâⁿ-óa Thài-iông ê sî-chūn í-keng pang--khì--ah. Chhun lo̍h-lâi ê hūi-chheⁿ sap-á, chú-iàu ê sêng-hūn sī giâm-chio̍h kah peng, ū chi̍t-kóa-á ē kè-sio̍k se̍h Thài-iông kiâⁿ, ū chi̍t-kóa-á ē tòe hūi-he̍k pún-té beh kiâⁿ ê kúi-tō kè-sio̍k kiâⁿ.

[KIP] Uì Tì-lī suann-thâu lo̍h-khì ê G3 ATLAS Huī-tshenn

ATLAS Huī-tshenn sī beh khì tó-uī? Tī tsit-ki sok-sî-liap-iánn iánn-phìnn lāi-té, m̄-sī huī-tshenn kiânn tsiah-nī kín, sī Tē-kiû tsū-tsuán hōo i khuànn--khí-lâi kánn-ná sī uì suann-thâu lo̍h-khì. Huī-tshenn C/2024 G3 (ATLAS Huī-tshenn) ê hē-lia̍t siòng-phìnn sī 1 gue̍h 22 tī Tì-lī Araucanía khu iōng phóo-thong ê kha-mé-lah hip--ê. ATLAS Huī-tshenn sī kuè-khì kuí-nā lé-pài tī Tē-kiû lâm-puànn-kiû tsiok hiánn-ba̍k ê thian-thé. I kng kah khó-lîng ē piàn-tsò 2025 nî siōng tshut-miâ ê tuā huī-tshenn. Sī-kóng tsin put-hīng, G3 ATLAS Huī-tshenn bē kè-sio̍k i ê lí-hîng--ah. In-uī i ê tiong-sim huī-hi̍k, tī tíng kò gue̍h kiânn-uá Thài-iông ê sî-tsūn í-king pang--khì--ah. Tshun lo̍h-lâi ê huī-tshenn sap-á, tsú-iàu ê sîng-hūn sī giâm-tsio̍h kah ping, ū tsi̍t-kuá-á ē kè-sio̍k se̍h Thài-iông kiânn, ū tsi̍t-kuá-á ē tuè huī-hi̍k pún-té beh kiânn ê kuí-tō kè-sio̍k kiânn.

[English] Comet G3 ATLAS Setting over a Chilean Hill

Where is Comet ATLAS going? In the featured time-lapse video, the comet is not itself moving very much, but the Earth's rotation makes it appear to be setting over a hill. The Comet C/2024 G3 (ATLAS) sequence was captured with an ordinary camera on January 22 from the Araucanía Region in central Chile. Comet ATLAS has been an impressive site in the evening skies of Earth's Southern Hemisphere over the past few weeks, so bright and awe-inspiring that it may eventually become known as the Great Comet of 2025. Unfortunately, Comet G3 ATLAS is not going anywhere anymore because its central nucleus broke up during its close pass to the Sun last month. Some of the comet's scattered remains of rocks and ice will continue to orbit the Sun, some in nearly the same outward section of the orbit that the comet's nucleus would have taken.

詞彙學習