G3 ATLAS 彗星 崩去矣！

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：Comet G3 ATLAS Disintegrates
• 影像來源：Lionel Majzik
• 天文相簿：Comet G3 ATLAS
• 台文翻譯：An-Li Tsai (TARA)

[漢羅] G3 ATLAS 彗星 崩去矣！

G3 ATLAS 彗星 是發生啥物代誌？ 這粒彗星 tī 一月中彼陣 經過近日點 了後，彗星頭就愈來愈暗矣。 到一月尾 ê 時陣，彗星 C/2024 G3 (ATLAS 彗星) ê 頭 就看袂著矣。 毋過伊 ê 彗尾 猶是 tī 地球 南半球 天頂 光 iàⁿ-iàⁿ。 相片是 一月 ê 時陣 連紲幾若暗 tī 智利 Río Hurtado 翕--ê G3 ATLAS 彗星。 倒爿是較早 ê 時陣翕--ê，咱會當著較光、較集中 ê 彗星頭，正爿是較晏規工翕--ê。 主要 ê 理由可能是 彗星頭 中央部份 組成 彗核 ê 冰 kah 岩石 崩去 矣。 G3 ATLAS 彗星 行到近日點 ê 時陣 是 tī 水星 軌道 內底，這个距離溫度傷懸，過去捌 kā 幾若粒 彗星 毀滅 去。 雖罔講是按呢，G3 ATLAS 彗星 賰 ê 部份 猶是會繼續 踅太陽行。

[POJ] G3 ATLAS Hūi-chheⁿ pang--khì--ah!

G3 ATLAS Hūi-chheⁿ sī hoat-seng siáⁿ-mih tāi-chì? Chit lia̍p hūi-chheⁿ tī it goe̍h-tiong hit-chūn keng-kòe kīn-ji̍t-tiám liáu-āu, hūi-chheⁿ-thâu tō lú-lâi-lú àm--ah. Kàu chi̍t goe̍h-bóe ê sî-chūn, Hūi-chheⁿ C/2024 G3 (ATLAS Hūi-chheⁿ) ê thâu tō khòaⁿ bē tio̍h--ah. M̄-koh i ê hūi-bóe iáu-sī tī Tē-kiû lâm-pòaⁿ-kiû thiⁿ-téng kng-iàⁿ-iàⁿ. Siòng-phìⁿ sī it-goe̍h ê sî-chūn liân-sòa kúi-nā àm tī Tì-lī Río Hurtado hip--ê G3 ATLAS Hūi-chheⁿ. Tò-pêng sī khah-chá ê sî-chūn hip--ê, lán ē-tàng tio̍h khah kng, khah chi̍p-tiong ê hūi-chheⁿ-thâu, chiàⁿ-pêng sī khah òaⁿ kui-kang hip--ê. Chú-iàu ê lí-iû khó-lêng sī hūi-chheⁿ-thâu tiong-ng pō͘-hūn cho͘-sêng hūi-he̍k ê peng kah giâm-chio̍h pang--khì--ah. G3 ATLAS Hūi-chheⁿ kiâⁿ kàu kīn-ji̍t-tiám ê sî-chūn sī tī Chúi-chheⁿ kúi-tō lāi-té, chit-ê kī-lī un-tō͘ siuⁿ koân, kòe-khì bat kā kúi-nā lia̍p hūi-chheⁿ húi-bia̍t khì. Sui-bóng kóng sī án-ne, G3 ATLAS Hūi-chheⁿ chhun ê pō͘-hūn iáu-sī ē kè-sio̍k se̍h Thài-iông kiâⁿ.

[KIP] G3 ATLAS Huī-tshenn pang--khì--ah!

G3 ATLAS Huī-tshenn sī huat-sing siánn-mih tāi-tsì? Tsit lia̍p huī-tshenn tī it gue̍h-tiong hit-tsūn king-kuè kīn-ji̍t-tiám liáu-āu, huī-tshenn-thâu tō lú-lâi-lú àm--ah. Kàu tsi̍t gue̍h-bué ê sî-tsūn, Huī-tshenn C/2024 G3 (ATLAS Huī-tshenn) ê thâu tō khuànn bē tio̍h--ah. M̄-koh i ê huī-bué iáu-sī tī Tē-kiû lâm-puànn-kiû thinn-tíng kng-iànn-iànn. Siòng-phìnn sī it-gue̍h ê sî-tsūn liân-suà kuí-nā àm tī Tì-lī Río Hurtado hip--ê G3 ATLAS Huī-tshenn. Tò-pîng sī khah-tsá ê sî-tsūn hip--ê, lán ē-tàng tio̍h khah kng, khah tsi̍p-tiong ê huī-tshenn-thâu, tsiànn-pîng sī khah uànn kui-kang hip--ê. Tsú-iàu ê lí-iû khó-lîng sī huī-tshenn-thâu tiong-ng pōo-hūn tsoo-sîng huī-hi̍k ê ping kah giâm-tsio̍h pang--khì--ah. G3 ATLAS Huī-tshenn kiânn kàu kīn-ji̍t-tiám ê sî-tsūn sī tī Tsuí-tshenn kuí-tō lāi-té, tsit-ê kī-lī un-tōo siunn kuân, kuè-khì bat kā kuí-nā lia̍p huī-tshenn huí-bia̍t khì. Sui-bóng kóng sī án-ne, G3 ATLAS Huī-tshenn tshun ê pōo-hūn iáu-sī ē kè-sio̍k se̍h Thài-iông kiânn.

[English] Comet G3 ATLAS Disintegrates

What's happening to Comet G3 ATLAS? After passing near the Sun in mid-January, the head of the comet has become dimmer and dimmer. By late January, Comet C/2024 G3 (ATLAS) had become a headless wonder -- even though it continued to show impressive tails after sunset in the skies of Earth's Southern Hemisphere. Pictured are images of Comet G3 ATLAS on successive January nights taken from Río Hurtado, Chile. Clearly, the comet's head is brighter and more centrally condensed on the earlier days (left) than on later days (right). A key reason is likely that the comet's nucleus of ice and rock, at the head's center, has fragmented. Comet G3 ATLAS passed well inside the orbit of planet Mercury when at its solar closest, a distance that where heat destroys many comets. Some of comet G3 ATLAS' scattering remains will continue to orbit the Sun.

詞彙學習