烏拉圭 天頂 ê G3 ATLAS 彗星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：Comet G3 ATLAS over Uruguay
• 影像來源 kah 版權：Mauricio Salazar
• 天文相簿：Comet ATLAS (G3)
• 台文翻譯：An-Li Tsai (TARA)

[漢羅] 烏拉圭 天頂 ê G3 ATLAS 彗星

彗星有當時仔會變大粒。 彗星離太陽較遠 ê 時陣，伊 ê 大細就是 彗核 ê 大細，主要 ê 成份是 冰 kah 岩石，大細差不多是 幾若公里，比 細粒衛星 閣較細。 毋過等伊 倚近太陽 ê 時陣，彗核 就會 噴出薄薄 ê 彗尾，主要 ê 成份 是 塗粉 kah 氣體，長度可能會 拖甲足長--ê，甚至超過 地球 到 太陽 ê 距離。 相片內底 ê 彗星 C/2024 G3 (ATLAS 彗星) 有一條 反射日光 ê 塗粉尾溜 kah 拖甲足長 ê 發光氣體尾溜，長度是比 月娘 ê 直徑大幾若倍。 Kha-mé-lah 長時間感光翕出來 ê 相片 是比目睭直接看 猶閣較壯觀。 這張相片 是一个禮拜前 tī 烏拉圭 San Jose ê Sierras de Mahoma 翕--ê ATLAS 彗星。 G3 ATLAS 彗星 捌 tī 地球南半球天頂足引人注意--ê，毋過伊這馬離太陽愈來愈遠，已經 愈來愈暗 矣，伊 ê 彗尾嘛愈來愈看袂著矣。

[POJ] O͘-la-kui thiⁿ-téng ê G3 ATLAS Hūi-chheⁿ

Hūi-chheⁿ ū-tang-sî-á ē piàn tōa-lia̍p. Hūi-chheⁿ lī Thài-iông khah hn̄g ê sî-chūn, i ê tōa-sè tio̍h-sī hūi-he̍k ê tōa-sè, chú-iàu ê sêng-hūn sī peng kah gâm-chio̍h, tōa-sè chha-put-to sī kúi-nā kong-lí, pí sè-lia̍p ūi-chheⁿ koh-khah sè. M̄-koh tán i óa-kīn Thài-iông ê sî-chūn, hūi-he̍k tō ē phùn-chhut po̍h-po̍h ê hūi-bóe, chú-iàu ê sêng-hūn sī thô͘-hún kah khì-thé, tn̂g-tō͘ khó-lêng ē thoa kah chiok tn̂g--ê, sīm-chì chhiau-kòe Tē-kiû kàu Thài-iông ê kī-lî. Siòng-phìⁿ lāi-té ê Hūi-chheⁿ C/2024 G3 (ATLAS Hūi-chheⁿ) ū chi̍t tiâu hoán-siā ji̍t-kng ê thô͘-hún bóe-liu kah thoa kah chiok tn̂g ê hoat-kng khì-thé bóe-liu, tn̂g-tō͘ sī pí goe̍h-niû ê ti̍t-kèng tōa kúi-lō pōe. Kha-mé-lah tn̂g sî-kan kám-kng hip--chhut-lâi ê siòng-phìⁿ sī pí ba̍k-chiu ti̍t-chiap khòaⁿ iah koh-khah chòng-koan. Chit-tiuⁿ siòng-phìⁿ sī chi̍t-ê lé-pài chêng tī O͘-la-kui San Jose ê Sierras de Mahoma hip--ê ATLAS Hūi-chheⁿ. G3 ATLAS Hūi-chheⁿ bat tī Tē-kiû lâm-pòaⁿ kiû thiⁿ-téng chiok ín-lâng chù-ì--ê, m̄-koh i chit-má lī Thài-iông lú-lâi-lú hn̄g, í-keng lú-lâi-lú àm--ah, i ê hūi-bóe mā lú-lâi-lú khòaⁿ bē tio̍h--ah.

[KIP] Oo-la-kui thinn-tíng ê G3 ATLAS Huī-tshenn

Huī-tshenn ū-tang-sî-á ē piàn tuā-lia̍p. Huī-tshenn lī Thài-iông khah hn̄g ê sî-tsūn, i ê tuā-sè tio̍h-sī huī-hi̍k ê tuā-sè, tsú-iàu ê sîng-hūn sī ping kah gâm-tsio̍h, tuā-sè tsha-put-to sī kuí-nā kong-lí, pí sè-lia̍p uī-tshenn koh-khah sè. M̄-koh tán i uá-kīn Thài-iông ê sî-tsūn, huī-hi̍k tō ē phùn-tshut po̍h-po̍h ê huī-bué, tsú-iàu ê sîng-hūn sī thôo-hún kah khì-thé, tn̂g-tōo khó-lîng ē thua kah tsiok tn̂g--ê, sīm-tsì tshiau-kuè Tē-kiû kàu Thài-iông ê kī-lî. Siòng-phìnn lāi-té ê Huī-tshenn C/2024 G3 (ATLAS Huī-tshenn) ū tsi̍t tiâu huán-siā ji̍t-kng ê thôo-hún bué-liu kah thua kah tsiok tn̂g ê huat-kng khì-thé bué-liu, tn̂g-tōo sī pí gue̍h-niû ê ti̍t-kìng tuā kuí-lō puē. Kha-mé-lah tn̂g sî-kan kám-kng hip--tshut-lâi ê siòng-phìnn sī pí ba̍k-tsiu ti̍t-tsiap khuànn iah koh-khah tsòng-kuan. Tsit-tiunn siòng-phìnn sī tsi̍t-ê lé-pài tsîng tī Oo-la-kui San Jose ê Sierras de Mahoma hip--ê ATLAS Huī-tshenn. G3 ATLAS Huī-tshenn bat tī Tē-kiû lâm-puànn kiû thinn-tíng tsiok ín-lâng tsù-ì--ê, m̄-koh i tsit-má lī Thài-iông lú-lâi-lú hn̄g, í-king lú-lâi-lú àm--ah, i ê huī-bué mā lú-lâi-lú khuànn bē tio̍h--ah.

[English] Comet G3 ATLAS over Uruguay

Comets can be huge. When far from the Sun, a comet's size usually refers to its hard nucleus of ice and rock, which typically spans a few kilometers -- smaller than even a small moon. When nearing the Sun, however, this nucleus can eject dust and gas and leave a thin tail that can spread to an enormous length -- even greater than the distance between the Earth and the Sun. Pictured, C/2024 G3 (ATLAS) sports a tail of sunlight-reflecting dust and glowing gas that spans several times the apparent size of a full moon, appearing even larger on long duration camera images than to the unaided eye. The featured image shows impressive Comet ATLAS over trees and a grass field in Sierras de Mahoma, San Jose, Uruguay about a week ago. After being prominent in the sunset skies of Earth's southern hemisphere, Comet G3 ATLAS is now fading as it moves away from the Sun, making its impressive tails increasingly hard to see.

詞彙學習