G3 ATLAS 彗星 ê 幾若條彗尾

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：The Many Tails of Comet G3 ATLAS
• 影像來源 kah 版權：Martin Mašek (FZU, Czech Academy of Sciences) & Jakub Kuřák
• 你 ê APOD 生日相片：What picture did APOD feature on your birthday? (post 1995)
• 台文翻譯：An-Li Tsai (TARA)

[漢羅] G3 ATLAS 彗星 ê 幾若條彗尾

是按怎這粒彗星有遮爾濟條尾溜？ Tī 過去 2 禮拜中，地球南半球天頂看會著 彗星 C/2024 G3 (ATLAS 彗星)。 伊有幾若條長長長閣足複雜 ê 尾溜。 有足濟觀測者報告講，日落了後 西方地平線附近 就看會著這粒 引人注意 ê 彗星矣，而且毋免 光學輔助 就看會著。 這張相片是 5 工前 tī 智利 Paranal 天文台 天頂翕--ê，內底上無有 6 條無仝 ê 彗尾。 有遮爾濟條尾溜 ê 其中一个原因，可能是 彗核 那 轉踅、那 kā 塗粉 kah 氣體 噴出來 造成--ê。 太陽 複雜 ê 太陽風 ê 推捒力，嘛有鬥相共。 ATLAS 彗星 ê 彗核 差不多有 冰山 ê 大細。 兩禮拜前，彗星 行到近日點 ê 時陣，彗核可能是 崩去 矣。 是講真不幸，ATLAS 彗星 kah 伊 ê 尾溜 tī 紲落來幾若禮拜，是愈來愈看無矣。

[POJ] G3 ATLAS Hūi-chheⁿ ê kúi-nā tiâu Hūi-bóe

Sī-án-chóaⁿ chit lia̍p hūi-chheⁿ ū chiah-nī chē tiâu bóe-liu? Tī kòe-khì 2 lé-pài tiong, Tē-kiû lâm-pòaⁿ-kiû thiⁿ-téng khòaⁿ-ē-tio̍h Hūi-chheⁿ C/2024 G3 (ATLAS Hūi-chheⁿ). I ū kúi-nā tiâu tn̂g-tn̂g-tn̂g koh chiok ho̍k-cha̍p ê bóe-liu. Ū chiok chē koan-chhek-chiá pò-kò kóng, ji̍t-lo̍h liáu-āu se-hong tē-pêng-sòaⁿ hù-kīn tō khòaⁿ-ē-tio̍h chit lia̍p ín-lâng-chù-ì ê hūi-chheⁿ--ah, jî-chhiáⁿ m̄-bián kng-ha̍k hú-chō͘ tō khòaⁿ-ē-tio̍h. Chit-tiuⁿ siòng-phìⁿ sī 5 kang chêng tī Tì-lī Paranal thian-bûn-tâi thiⁿ-téng hip--ê, lāi-té siōng-bô ū 6 tiâu bô-kâng ê hūi-bóe. Ū chiah-nī chē tiâu bóe-liu ê kî-tiong chi̍t-ê goân-in, khó-lêng sī hūi-he̍k ná tńg-se̍h, ná kā thô͘-hún kah khì-thé phùn--chhut-lâi chō-sêng--ê. Thài-iông ho̍k-cha̍p ê thài-iông-hong ê thui-sak-le̍k, mā ū tàu-saⁿ-kāng. ATLAS Hūi-chheⁿ ê hūi-he̍k chha-put-to ū peng-soaⁿ ê tōa-sè. Nn̄g lé-pài chêng, hūi-chheⁿ kiâⁿ kàu kīn-ji̍t-tiám ê sî-chūn, hūi-he̍k khó-lêng sī pang--khì--ah. Sī-kóng chin put-hēng, ATLAS Hūi-chheⁿ kah i ê bóe-liu tī sòa-lo̍h-lâi kúi-nā lé-pài, sī lú-lâi-lú khòaⁿ-bô--ah.

[KIP] G3 ATLAS Huī-tshenn ê kuí-nā tiâu Huī-bué

Sī-án-tsuánn tsit lia̍p huī-tshenn ū tsiah-nī tsē tiâu bué-liu? Tī kuè-khì 2 lé-pài tiong, Tē-kiû lâm-puànn-kiû thinn-tíng khuànn-ē-tio̍h Huī-tshenn C/2024 G3 (ATLAS Huī-tshenn). I ū kuí-nā tiâu tn̂g-tn̂g-tn̂g koh tsiok ho̍k-tsa̍p ê bué-liu. Ū tsiok tsē kuan-tshik-tsiá pò-kò kóng, ji̍t-lo̍h liáu-āu se-hong tē-pîng-suànn hù-kīn tō khuànn-ē-tio̍h tsit lia̍p ín-lâng-tsù-ì ê huī-tshenn--ah, jî-tshiánn m̄-bián kng-ha̍k hú-tsōo tō khuànn-ē-tio̍h. Tsit-tiunn siòng-phìnn sī 5 kang tsîng tī Tì-lī Paranal thian-bûn-tâi thinn-tíng hip--ê, lāi-té siōng-bô ū 6 tiâu bô-kâng ê huī-bué. Ū tsiah-nī tsē tiâu bué-liu ê kî-tiong tsi̍t-ê guân-in, khó-lîng sī huī-hi̍k ná tńg-se̍h, ná kā thôo-hún kah khì-thé phùn--tshut-lâi tsō-sîng--ê. Thài-iông ho̍k-tsa̍p ê thài-iông-hong ê thui-sak-li̍k, mā ū tàu-sann-kāng. ATLAS Huī-tshenn ê huī-hi̍k tsha-put-to ū ping-suann ê tuā-sè. Nn̄g lé-pài tsîng, huī-tshenn kiânn kàu kīn-ji̍t-tiám ê sî-tsūn, huī-hi̍k khó-lîng sī pang--khì--ah. Sī-kóng tsin put-hīng, ATLAS Huī-tshenn kah i ê bué-liu tī suà-lo̍h-lâi kuí-nā lé-pài, sī lú-lâi-lú khuànn-bô--ah.

[English] The Many Tails of Comet G3 ATLAS

Why does this comet have so many tails? C/2024 G3 (ATLAS) has developed several long and intricate tails visible from Earth's southern hemisphere over the past two weeks. Many observers reported seeing the impressive comet without any optical aid above the western horizon just after sunset. At least six different tails appear in the featured image captured five days ago from the dark skies above Paranal Observatory in Chile. One possible cause for the multiple tails is dust and gas being expelled from the comet's rotating nucleus. The outward push of the Sun's complex solar wind may also play a role. The huge iceberg-like nucleus of Comet ATLAS appears to have broken up near its closest approach to the Sun two weeks ago. Unfortunately, Comet ATLAS and its tails are expected to fade significantly over the coming weeks.

詞彙學習