G3 ATLAS 彗星：彗尾 kah 螺仔殼形 ê 圓厝頂

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：Comet G3 ATLAS: a Tail and a Telescope
• 影像來源 kah 版權：Yuri Beletsky (Carnegie Las Campanas Observatory, TWAN)
• 天文相簿：Comet ATLAS (G3)
• 台文翻譯：An-Li Tsai (TARA)

[漢羅] G3 ATLAS 彗星：彗尾 kah 螺仔殼形 ê 圓厝頂

彗星 C/2024 G3 (ATLAS 彗星) 出現 tī 地球天頂矣。 伊是 ùi 遙遠 ê Oort 雲 來--ê 人客，會 tī 1 月 13 行到近日點。 1 月 19 ê 時陣，智利 Atacama 沙漠 ê ESO Paranal 天文台 翕著 這粒光爍爍 ê 彗星。 ATLAS 彗星 美麗 ê 塗粉尾溜，tī 南半球 ê 暗頭仔天頂 是 遮爾清楚，直接用目睭就看會著。 前景是天文台一台 有名 ê 螺仔殼形 ê 輔助望遠鏡。 ATLAS 彗星 tī 南半球 猶是逐家關注 ê 天體，毋過伊這馬是 愈來愈倚近太陽，伊 光 iàⁿ-iàⁿ 彗鬚 已經變甲小可仔霧霧，伊 ê 冰彗核 嘛已經崩去。

[POJ] G3 ATLAS Hūi-chheⁿ: Hūi-bóe kah Lê-á-khak hêng ê Îⁿ-chhù-téng

Hūi-chheⁿ C/2024 G3 (ATLAS Hūi-chheⁿ) chhut-hiān tī Tē-kiû thiⁿ-téng--ah. I sī ùi iâu-oán ê Oort hûn lâi--ê lâng-kheh, ē tī 1 goe̍h 13 kiâⁿ kàu kīn-ji̍t-tiám. 1 goe̍h 19 ê sî-chūn, Tì-lī Atacama soa-bo̍k ê ESO Paranal Thian-bûn-tâi hip-tio̍h chit lia̍p kng-sih-sih ê hūi-chheⁿ. ATLAS Hūi-chheⁿ bí-lē ê thô͘-hún bóe-liu, tī lâm-pòaⁿ-kiû ê àm-thâu-á thiⁿ-téng sī chiah-nī chheng-chhó, ti̍t-chiap iōng ba̍k-chiu tō khòaⁿ-ē-tio̍h. Chiân-kéng sī thian-bûn-tâi chi̍t tâi ū-miâ ê lê-á-khak hêng ê hú-chō͘ bōng-oán-kiàⁿ. ATLAS Hūi-chheⁿ tī lâm-pòaⁿ-kiû iáu-sī ta̍k-ke koan-chù ê thian-thé, m̄-koh i chit-má sī lú-lâi-lú óa-kīn Thài-iông, i kng-iàⁿ-iàⁿ hūi-chhiu í-keng piàn-kah sió-khóa-á bū-bū, i ê peng hūi-he̍k mā í-keng pang--khì.

[KIP] G3 ATLAS Huī-tshenn: Huī-bué kah Lê-á-khak hîng ê Înn-tshù-tíng

Huī-tshenn C/2024 G3 (ATLAS Huī-tshenn) tshut-hiān tī Tē-kiû thinn-tíng--ah. I sī uì iâu-uán ê Oort hûn lâi--ê lâng-kheh, ē tī 1 gue̍h 13 kiânn kàu kīn-ji̍t-tiám. 1 gue̍h 19 ê sî-tsūn, Tì-lī Atacama sua-bo̍k ê ESO Paranal Thian-bûn-tâi hip-tio̍h tsit lia̍p kng-sih-sih ê huī-tshenn. ATLAS Huī-tshenn bí-lē ê thôo-hún bué-liu, tī lâm-puànn-kiû ê àm-thâu-á thinn-tíng sī tsiah-nī tshing-tshó, ti̍t-tsiap iōng ba̍k-tsiu tō khuànn-ē-tio̍h. Tsiân-kíng sī thian-bûn-tâi tsi̍t tâi ū-miâ ê lê-á-khak hîng ê hú-tsōo bōng-uán-kiànn. ATLAS Huī-tshenn tī lâm-puànn-kiû iáu-sī ta̍k-ke kuan-tsù ê thian-thé, m̄-koh i tsit-má sī lú-lâi-lú uá-kīn Thài-iông, i kng-iànn-iànn huī-tshiu í-king piàn-kah sió-khuá-á bū-bū, i ê ping huī-hi̍k mā í-king pang--khì.

[English] Comet G3 ATLAS: a Tail and a Telescope

Comet C/2024 G3 ATLAS has made a dramatic appearance in planet Earth's skies. A visitor from the distant Oort Cloud, the comet reached its perihelion on January 13. On January 19, the bright comet was captured here from ESO Paranal Observatory in the Atacama desert in Chile. Sporting spectacular sweeping dust tails, this comet ATLAS is setting in the southern hemisphere twilight and was clearly visible to the unaided eye. In the foreground is the closed shell of one of the observatory's famous auxiliary telescopes. Still wowing southern hemisphere observers, the comet's bright coma has become diffuse, its icy nucleus apparently disintegrating following its close approach to the Sun.

詞彙學習