ATLAS 彗星 ùi 太陽邊仔踅過

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：Comet ATLAS Rounds the Sun
• 影像來源：NASA, SOHO Spacecraft, LASCO C3; 資料處理：Rolando Ligustri
• 天文相簿：Comet ATLAS (G3)
• 台文翻譯：An-Li Tsai (TARA)

[漢羅] ATLAS 彗星 ùi 太陽邊仔踅過

是按怎 ATLAS 彗星 有遮爾多彩 ê 尾溜？ 頂禮拜 彗星 C/2024 G3 (ATLAS 彗星) 行到 太陽 近日點，來到 水星 軌道內底，變甲 足光--ê。 是講真不幸，彗星 kah 太陽 ê 視角度傷倚矣，人類 ê 目睭真歹看著。 毋過 NASA ê SOHO 太陽太空船 有看著。 相片是 SOHO 太陽太空船 ê LASCO C3 日冕儀 翕--ê ATLAS 彗星，是幾若塊無仝色 ê 濾鏡翕出來 ê 組合相片。 咱會當看著幾若條彗尾，中央彼條白色尾溜是 反射日光 ê 塗粉尾溜。 紅色、藍色、kah 青色尾溜 應該是 離子尾溜，in ê 色光是 彗星 內底 ê 特定氣體 去予太陽能量激發、發光、噴出來--ê。 目前 ATLAS 彗星 ê 長尾溜 出現 tī 南半球天頂，毋過等伊沓沓仔飛離開 內太陽系 了後，就會愈來愈暗矣。

[POJ] ATLAS Hūi-chheⁿ ùi Thài-iông piⁿ-á se̍h--kòe

Sī-án-chóaⁿ ATLAS Hūi-chheⁿ ū chiah-nī to-chhái ê bóe-liu? Téng-lé-pài Hūi-chheⁿ C/2024 G3 (ATLAS Hūi-chheⁿ) kiâⁿ kàu Thài-iông kīn-ji̍t-tiám, lâi-kàu Chúi-chheⁿ kúi-tō lāi-té, piàn-kah chiok kng--ê. Sī-kóng chin put-hēng, hūi-chheⁿ kah Thài-iông ê sī-kak-tō͘ siuⁿ óa--ah, jîn-lūi ê ba̍k-chiu chin pháiⁿ khòaⁿ-tio̍h. M̄-koh NASA ê SOHO Thài-iông Thài-khong-chûn ū khòaⁿ--tio̍h. Siòng-phìⁿ sī SOHO Thài-iông Thài-khong-chûn ê LASCO C3 ji̍t-bián-gî hip--ê ATLAS Hūi-chheⁿ, sī kúi-nā tè bô-kâng sek ê lū-kiàⁿ hip--chhut-lâi ê cho͘-ha̍p siòng-phìⁿ. Lán ē-tàng khòaⁿ-tio̍h kúi-nā tiâu hūi bóe, tiong-ng hit tiâu pe̍h-sek bóe-liu sī hoán-siā ji̍t-kng ê thô͘-hún bóe-liu. Âng-sek, nâ-sek, kah chheⁿ-sek bóe-liu èng-kai sī lī-chú bóe-liu, in ê sek-kng sī hūi-chheⁿ lāi-té ê te̍k-tēng khì-thé khì hō͘ Thài-iông lêng-liōng kek-hoat, hoat-kng, phùn--chhut-lâi--ê. Bo̍k-chiân ATLAS Hūi-chheⁿ ê tn̂g bóe-liu chhut-hiān tī lâm-pòaⁿ-kiû thiⁿ-téng, m̄-koh tán i tau̍h-tau̍h-á poe lī-khui Lōe Thài-iông-hē liáu-āu, tō ē lú-lâi-lú àm--ah.

[KIP] ATLAS Huī-tshenn uì Thài-iông pinn-á se̍h--kuè

Sī-án-tsuánn ATLAS Huī-tshenn ū tsiah-nī to-tshái ê bué-liu? Tíng-lé-pài Huī-tshenn C/2024 G3 (ATLAS Huī-tshenn) kiânn kàu Thài-iông kīn-ji̍t-tiám, lâi-kàu Tsuí-tshenn kuí-tō lāi-té, piàn-kah tsiok kng--ê. Sī-kóng tsin put-hīng, huī-tshenn kah Thài-iông ê sī-kak-tōo siunn uá--ah, jîn-luī ê ba̍k-tsiu tsin pháiⁿ khuànn-tio̍h. M̄-koh NASA ê SOHO Thài-iông Thài-khong-tsûn ū khuànn--tio̍h. Siòng-phìnn sī SOHO Thài-iông Thài-khong-tsûn ê LASCO C3 ji̍t-bián-gî hip--ê ATLAS Huī-tshenn, sī kuí-nā tè bô-kâng sik ê lū-kiànn hip--tshut-lâi ê tsoo-ha̍p siòng-phìnn. Lán ē-tàng khuànn-tio̍h kuí-nā tiâu huī bué, tiong-ng hit tiâu pe̍h-sik bué-liu sī huán-siā ji̍t-kng ê thôo-hún bué-liu. Âng-sik, nâ-sik, kah tshenn-sik bué-liu ìng-kai sī lī-tsú bué-liu, in ê sik-kng sī huī-tshenn lāi-té ê ti̍k-tīng khì-thé khì hōo Thài-iông lîng-liōng kik-huat, huat-kng, phùn--tshut-lâi--ê. Bo̍k-tsiân ATLAS Huī-tshenn ê tn̂g bué-liu tshut-hiān tī lâm-puànn-kiû thinn-tíng, m̄-koh tán i ta̍uh-ta̍uh-á pue lī-khui Luē Thài-iông-hē liáu-āu, tō ē lú-lâi-lú àm--ah.

[English] Comet ATLAS Rounds the Sun

Why does Comet ATLAS have such colorful tails? Last week Comet C/2024 G3 (ATLAS) passed its closest to the Sun -- well inside the orbit of Mercury -- and brightened dramatically. Unfortunately, the comet was then so angularly near the Sun that it was very hard for humans to see. But NASA's SOHO spacecraft saw it. Pictured is a SOHO (LASCO C3) image of Comet ATLAS that is a composite of several different color filters. Of the several tails visible, the central white tails are likely made of dust and just reflecting back sunlight. The red, blue, and green tails are likely ion tails with their colors dominated by light emitted by specific gases that were ejected from the comet and energized by the Sun. Currently, Comet ATLAS is showing long tails in southern skies but fading as it moves out of the inner Solar System.

詞彙學習