登陸土衛六泰坦：Huygens 探測船 ê 降落影片

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：Titan Touchdown: Huygens Descent Movie
• 影片來源：ESA, NASA, JPL, U. Arizona, E. Karkoschka
• 台文翻譯：An-Li Tsai (TARA)

[漢羅] 登陸土衛六泰坦：Huygens 探測船 ê 降落影片

降落 tī 土衛六泰坦 會是啥物景色？ 這支 縮時攝影影片 是 歐洲太空總署 (ESA) ê Huygens 探測船 tī 2005 年降落 tī 太陽系內底 雲上厚 ê 衛星 ê 時陣拍--ê。 2004 年 Cassini 機器人太空船 飛到 踅土星行 ê 軌道了後，Huygens 探測船 就隨 kah Cassini 太空船 分離，飛倚 泰坦 去。 等 Huygens 探測船 降落 了後 2 點鐘，伊干焦翕著 這粒衛星 袂透光 ê 大氣層。 這个 電腦控制、tho͘-lá-kuh 大細 ê 探測船 就隨 拍開伊 ê la̍k-ká-sáng，予伊降落速度變較慢咧。 伊迵過衛星 ê 厚雲 ê 時陣，就開始 kā 進前 可見光 毋捌看過 ê 奇怪地景 傳轉來。 Huygens 探測船 落尾降落 tī 焦燥 ê 海洋，活了 90 分鐘久，kā 衛星表面 一寡特別 ê 景色翕轉來，包括烏色沙土 形成 ê 平原，頂懸閣有 光滑、金光閃閃、拳頭拇大細 ê 大冰角。

[POJ] Teng-lio̍k Thó͘-ōe la̍k Thài-thán: Huygens Thàm-chhek-chûn ê kàng-lo̍h iáⁿ-phìⁿ

Kàng-lo̍h tī Thó͘-ōe la̍k Thài-thán ē sī siáⁿ-mih kéng-sek? Chit-ki sok-sî-liap-iáⁿ iáⁿ-phìⁿ sī Au-chiu Thài-khong Chóng-sú ESA ê Huygens Thàm-chhek-chûn tī 2005 nî kàng-lo̍h tī thài-iông-hē lāi-té hûn sióng kāu ê ūi-chheⁿ ê sî-chūn phah--ê. 2004 nî Cassini Ki-khì-lâng Thài-khong-chûn poe-kàu se̍h Thó͘-chheⁿ kiâⁿ ê kúi-tō liáu-āu, Huygens Thàm-chhek-chûn tō sûi kah Cassini Thài-khong-chûn hun-lī, poe óa Thài-thán khì. Tán Huygens Thàm-chhek-chûn kàng-lo̍h liáu-āu 2 tiám-cheng, i kan-na hip-tio̍h chit lia̍p ūi-chheⁿ bē thàu-kng ê tāi-khì-chân. Chit-ê tiān-náu khòng-chè, tho͘-lá-kuh tōa-sè ê thàm-chhek-chûn tō sûi phah-khui i ê la̍k-ká-sáng, hō͘ i kàng-lo̍h sok-tō͘ piàn khah bān leh. I thàng-kòe ūi-chheⁿ ê kāu hûn ê sî-chūn, tō khai-sí kā chìn-chêng khó kìⁿ-kng M̄-bat khòaⁿ-kòe ê kî-koài tē-kéng thoân--tńg-lâi. Huygens Thàm-chhek-chûn lo̍h-bóe kàng-lo̍h tī ta-sò ê hái-iûⁿ, oa̍h-liáu 90 hun-cheng kú, kā ūi-chheⁿ piáu-bīn chi̍t-kóa te̍k-pa̍t ê kéng-sek hip tńg-lâi, pau-koah o͘-sek soa-thó͘ hêng-sêng ê pêng-goân, téng-koân koh-ū kng-ku̍t, kim-kong-siám-siám, kûn-thâu-bú tōa-sè ê tōa peng-kak.

[KIP] Ting-lio̍k Thóo-uē la̍k Thài-thán: Huygens Thàm-tshik-tsûn ê kàng-lo̍h iánn-phìnn

Kàng-lo̍h tī Thóo-uē la̍k Thài-thán ē sī siánn-mih kíng-sik? Tsit-ki sok-sî-liap-iánn iánn-phìnn sī Au-tsiu Thài-khong Tsóng-sú ESA ê Huygens Thàm-tshik-tsûn tī 2005 nî kàng-lo̍h tī thài-iông-hē lāi-té hûn sióng kāu ê uī-tshenn ê sî-tsūn phah--ê. 2004 nî Cassini Ki-khì-lâng Thài-khong-tsûn pue-kàu se̍h Thóo-tshenn kiânn ê kuí-tō liáu-āu, Huygens Thàm-tshik-tsûn tō suî kah Cassini Thài-khong-tsûn hun-lī, pue uá Thài-thán khì. Tán Huygens Thàm-tshik-tsûn kàng-lo̍h liáu-āu 2 tiám-tsing, i kan-na hip-tio̍h tsit lia̍p uī-tshenn bē thàu-kng ê tāi-khì-tsân. Tsit-ê tiān-náu khòng-tsè, thoo-lá-kuh tuā-sè ê thàm-tshik-tsûn tō suî phah-khui i ê la̍k-ká-sáng, hōo i kàng-lo̍h sok-tōo piàn khah bān leh. I thàng-kuè uī-tshenn ê kāu hûn ê sî-tsūn, tō khai-sí kā tsìn-tsîng khó kìnn-kng M̄-bat khuànn-kuè ê kî-kuài tē-kíng thuân--tńg-lâi. Huygens Thàm-tshik-tsûn lo̍h-bué kàng-lo̍h tī ta-sò ê hái-iûnn, ua̍h-liáu 90 hun-tsing kú, kā uī-tshenn piáu-bīn tsi̍t-kuá ti̍k-pa̍t ê kíng-sik hip tńg-lâi, pau-kuah oo-sik sua-thóo hîng-sîng ê pîng-guân, tíng-kuân koh-ū kng-ku̍t, kim-kong-siám-siám, kûn-thâu-bú tuā-sè ê tuā ping-kak.

[English] Titan Touchdown: Huygens Descent Movie

What would it look like to land on Saturn's moon Titan? The European Space Agency's Huygens probe set down on the Solar System's cloudiest moon in 2005, and a time-lapse video of its descent images was created. Huygens separated from the robotic Cassini spacecraft soon after it achieved orbit around Saturn in late 2004 and began approaching Titan. For two hours after arriving, Huygens plummeted toward Titan's surface, recording at first only the shrouded moon's opaque atmosphere. The computerized truck-tire sized probe soon deployed a parachute to slow its descent, pierced the thick clouds, and began transmitting images of a strange surface far below never before seen in visible light. Landing in a dried sea and surviving for 90 minutes, Huygen's returned unique images of a strange plain of dark sandy soil strewn with smooth, bright, fist-sized rocks of ice.

詞彙學習