狼月 掩 火星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：Wolf Moon Engulfs Mars
• 影像來源 kah 版權：Imran Sultan
• Growing Gallery: Moon-Mars Occultation in January 2025
• 台文翻譯：An-Li Tsai (TARA)

[漢羅] 狼月掩火星

月娘敢會 kā 火星食去？ 會喔！ 這是因為伊 ùi 火星面頭前行過，才會看起來干焦是 kā 火星食去 ê 款。 這是 真罕得看著 ê 現象，昨昏 tī 北美洲 kah 非洲西部 一寡所在有出現。 西方 kā 新曆正月 ê 月圓叫做 狼月。 這款 kā 星食去 ê 現象，較正式來講，叫做 掩星。 這會按呢引人注意，毋但是因為去拄著狼月，而且火星嘛行到 衝 ê 相位，就是火星行到 kah 地球上倚 ê 時陣。 這个時陣，火星看起來上大粒、上光。 這款 掩星現象 就發生 tī 明仔載，差不多會擋一點鐘久。 這張相片 是 tī 美國 Inninois 州 芝加哥 附近翕--ê。 這个時陣，地球 ê 上大粒衛星，月球，沓沓仔紲離開遠方 ê 紅色行星。 咱 ê 月球 有當時仔就會親像這擺仝款，行到 太陽系 行星 ê 頭前。 後一擺 月球 kā 火星 食去 ê 時陣，會是 2 月 9 號。

[POJ] Lông-goe̍h iám Hóe-chheⁿ

Goe̍h-niû kám-ē kā Hóe-chheⁿ chia̍h khì? Ē o͘h! Che-sī in-ūi i ùi Hóe-chheⁿ bīn-thâu-chêng kiâⁿ-kòe, chiah-ē khòaⁿ--khí-lâi kan-na sī kā Hóe-chheⁿ chia̍h khì ê khoán. Che-sī chin hán-tit khòaⁿ-tio̍h ê hiān-siōng, cha-hng tī Pak-bí-chiu kah Hui-chiu se-pō͘ chi̍t-kóa só͘-chāi ū chhut-hiān. Se-hong kā sin-le̍k chiaⁿ-goe̍h ê goe̍h-îⁿ kiò-chò Lông-goe̍h. Chit-khoán kā chheⁿ chia̍h khì ê hiān-siōng, khah chèng-sek lâi-kóng, kiò-chò iám-chheⁿ. Che ē án-ne ín-lâng chù-ì, m̄-nā sī in-ūi khì tú-tio̍h Lông-goe̍h, jî-chhiáⁿ Hóe-chheⁿ mā kiâⁿ kàu Chhiong ê siòng-ūi, tio̍h-sī Hóe-chheⁿ kiâⁿ kàu kah Tē-kiû siōng óa ê sî-chūn. Chit-ê sî-chūn, Hóe-chheⁿ khòaⁿ--khí-lâi siōng tōa-lia̍p, siōng kng. Chit-khoán iám-chheⁿ hiān-siōng tō hoat-seng tī bîn-á-chài, chha-put-to ē tòng chi̍t tiám-cheng kú. Chit-tiuⁿ siòng-phìⁿ sī tī Bí-kok Inninois chiu Chi-ka-ko hù-kīn hip--ê. Chit-ê sî-chūn, Tē kiû-ê siōng tōa-lia̍p ūi-chheⁿ, Goe̍h-kiû, tau̍h-tau̍h-á sòa lī-khui oán-hong ê âng-sek kiâⁿ-chheⁿ. Lán ê Goe̍h-kiû ū-tang-sî-á tō ē chhin-chhiūⁿ chit pái kāng-khoán, kiâⁿ kàu Thài-iông-hē kiâⁿ-chheⁿ ê thâu-chêng. Āu chi̍t-pái Goe̍h-kiû kā Hóe-chheⁿ chia̍h khì ê sî-chūn, ē sī 2 goe̍h 9 hō.

[KIP] Lông-gue̍h iám Hué-tshenn

Gue̍h-niû kám-ē kā Hué-tshenn tsia̍h khì? Ē ooh! Tse-sī in-uī i uì Hué-tshenn bīn-thâu-tsîng kiânn-kuè, tsiah-ē khuànn--khí-lâi kan-na sī kā Hué-tshenn tsia̍h khì ê khuán. Tse-sī tsin hán-tit khuànn-tio̍h ê hiān-siōng, tsa-hng tī Pak-bí-tsiu kah Hui-tsiu se-pōo tsi̍t-kuá sóo-tsāi ū tshut-hiān. Se-hong kā sin-li̍k tsiann-gue̍h ê gue̍h-înn kiò-tsò Lông-gue̍h. Tsit-khuán kā tshenn tsia̍h khì ê hiān-siōng, khah tsìng-sik lâi-kóng, kiò-tsò iám-tshenn. Tse ē án-ne ín-lâng tsù-ì, m̄-nā sī in-uī khì tú-tio̍h Lông-gue̍h, jî-tshiánn Hué-tshenn mā kiânn kàu Tshiong ê siòng-uī, tio̍h-sī Hué-tshenn kiânn kàu kah Tē-kiû siōng uá ê sî-tsūn. Tsit-ê sî-tsūn, Hué-tshenn khuànn--khí-lâi siōng tuā-lia̍p, siōng kng. Tsit-khuán iám-tshenn hiān-siōng tō huat-sing tī bîn-á-tsài, tsha-put-to ē tòng tsi̍t tiám-tsing kú. Tsit-tiunn siòng-phìnn sī tī Bí-kok Inninois tsiu Chi-ka-ko hù-kīn hip--ê. Tsit-ê sî-tsūn, Tē kiû-ê siōng tuā-lia̍p uī-tshenn, Gue̍h-kiû, ta̍uh-ta̍uh-á suà lī-khui uán-hong ê âng-sik kiânn-tshenn. Lán ê Gue̍h-kiû ū-tang-sî-á tō ē tshin-tshiūnn tsit pái kāng-khuán, kiânn kàu Thài-iông-hē kiânn-tshenn ê thâu-tsîng. Āu tsi̍t-pái Gue̍h-kiû kā Hué-tshenn tsia̍h khì ê sî-tsūn, ē sī 2 gue̍h 9 hō.

[English] Wolf Moon Engulfs Mars

Does the Moon ever engulf Mars? Yes, but only in the sense that it moves in front, which happens on rare occasions. This happened just yesterday, though, as seen from some locations in North America and western Africa. This occultation was notable not only because the Moon was a fully lit Wolf Moon, but because Mars was near its largest and brightest, moving to opposition -- the closest to the Earth in its orbit -- only tomorrow. The engulfing, more formally called an occultation, typically lasts about an hour. The featured image was taken from near Chicago, Illinois, USA just as Earth's largest satellite was angularly moving away from the much more distant red planet. Our Moon occasionally moves in front of all of the Solar System's planets. Given the temporary alignment of orbital planes, the next time our Moon eclipses Mars will be a relatively soon February 9.

詞彙學習