草帽仔星系 ê Webb kah Hubble 影像

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：The Sombrero Galaxy from Webb and Hubble
• 影像來源：NASA, ESA, CSA, STScI, Hubble Heritage Project (STScI, AURA)
• 台文翻譯：An-Li Tsai (TARA)

[漢羅] 草帽仔星系 ê Webb kah Hubble 影像

這个浮 tī 空中 ê 環，其實 kah 星系平大。 實際上，伊是一个星系，上無嘛是星系 ê 一部份。 這个足媠 ê 草帽仔星系，是 室女座星系團 內底 上大粒 ê 星系。 Tī 下面彼張可見光影像內底，烏暗 塗粉帶 kā 草帽仔星系 中央閘去矣，毋過頂懸彼張紅外線影像煞光爍爍。 下面彼張 紅外線 相片，是 James Webb 太空望遠鏡 昨昏公佈 ê 假色藍色影像。 頂懸彼張是 NASA ê Hubble 太空望遠鏡 ê 可見光 影像。 影像經過數位處理了後有較清楚。 草帽仔星系 嘛 叫做 M104，差不多有 5 萬 光年 闊，就 tī 2800 萬光年遠 ê 所在。 M104 用細台望遠鏡就看會著，伊就 tī 室女座 ê 方向遐。

[POJ] Chháu-bō-á Seng-hē ê Webb kah Hubble Iáⁿ-siōng

Chit-ê phû tī khong-tiong ê khoân, kî-si̍t kah seng-hē pêⁿ tōa. Si̍t-chè-siōng, i sī chi̍t-ê seng-hē, siōng-bô mā-sī seng-hē ê chi̍t-pō͘-hūn. Chit-ê chiok súi ê Chháu-bō-á seng-hē, sī Sek-lú-chō seng-hē-thoân lāi-té siōng tōa-lia̍p ê seng-hē. Tī ē-bīn hit-tiuⁿ khó-kiàn-kng iáⁿ-siōng lāi-té, o͘-àm thô͘-hún-tòa kā Chháu-bō-á seng-hē tiong-ng cha̍h khì--ah, m̄-koh téng-koân hit-tiuⁿ âng-gōa-sòaⁿ soah iáⁿ-siōng kng-sih-sih. Ē-bīn hit-tiuⁿ âng-gōa-sòaⁿ siòng-phìⁿ, sī James Webb Thài-khong Bōng-oán-kiàⁿ cha-hng kong-pò͘ ê ká-sek nâ-sek iáⁿ-siōng. Téng-koân hit-tiuⁿ sī NASA ê Hubble Thài-khong Bōng-oán-kiàⁿ ê khó-kiàn-kng iáⁿ-siōng. Iáⁿ-siōng keng-kòe sò͘-ūi chhú-lí liáu-āu ū khah chheng-chhó. Chháu-bō-á seng-hē mā kiò-chò M104, chha-put-to ū 5 bān kng-nî khoah, to̍h tī 2800 bān kng-nî hn̄g ê só͘-chāi. M104 iōng sè-tâi bōng-oán-kiàⁿ tiō khòaⁿ-ē-tio̍h, i to̍h tī Sek-lú-chō ê hong-hiòng hia.

[KIP] Tsháu-bō-á Sing-hē ê Webb kah Hubble Iánn-siōng

Tsit-ê phû tī khong-tiong ê khuân, kî-si̍t kah sing-hē pênn tuā. Si̍t-tsè-siōng, i sī tsi̍t-ê sing-hē, siōng-bô mā-sī sing-hē ê tsi̍t-pōo-hūn. Tsit-ê tsiok suí ê Tsháu-bō-á sing-hē, sī Sik-lú-tsō sing-hē-thuân lāi-té siōng tuā-lia̍p ê sing-hē. Tī ē-bīn hit-tiuⁿ khó-kiàn-kng iánn-siōng lāi-té, oo-àm thôo-hún-tuà kā Tsháu-bō-á sing-hē tiong-ng tsa̍h khì--ah, m̄-koh tíng-kuân hit-tiunn âng-guā-suànn suah iánn-siōng kng-sih-sih. Ē-bīn hit-tiunn âng-guā-suànn siòng-phìnn, sī James Webb Thài-khong Bōng-uán-kiànn tsa-hng kong-pòo ê ká-sik nâ-sik iánn-siōng. Tíng-kuân hit-tiunn sī NASA ê Hubble Thài-khong Bōng-uán-kiànn ê khó-kiàn-kng iánn-siōng. Iánn-siōng king-kuè sòo-uī tshú-lí liáu-āu ū khah tshing-tshó. Tsháu-bō-á sing-hē mā kiò-tsò M104, tsha-put-to ū 5 bān kng-nî khuah, to̍h tī 2800 bān kng-nî hn̄g ê sóo-tsāi. M104 iōng sè-tâi bōng-uán-kiànn tiō khuànn-ē-tio̍h, i to̍h tī Sik-lú-tsō ê hong-hiòng hia.

[English] The Sombrero Galaxy from Webb and Hubble

This floating ring is the size of a galaxy. In fact, it is a galaxy -- or at least part of one: the photogenic Sombrero Galaxy is one of the largest galaxies in the nearby Virgo Cluster of Galaxies. The dark band of dust that obscures the mid-section of the Sombrero Galaxy in visible light (bottom panel) actually glows brightly in infrared light (top panel). The featured image shows the infrared glow in false blue, recorded recently by the space-based James Webb Space Telescope (JWST) and released yesterday, pictured above an archival image taken by NASA's Hubble Space Telescope in visible light. The Sombrero Galaxy, also known as M104, spans about 50,000 light years and lies 28 million light years away. M104 can be seen with a small telescope in the direction of the constellation Virgo.

詞彙學習