阿波羅 12 號 kah 測量員 3 號

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Apollo 12 and Surveyor 3
• 影像來源：NASA, Apollo 12, Alan Bean ； 立體影像版權：Kevin Frank
• 台文翻譯：An-Li Tsai (TARA)

[漢羅] 阿波羅 12 號 kah 測量員 3 號

Kā 你 ê 3D 目鏡 提來，來欣賞這張月球表面 ê 風暴洋。 這幅 3D 影像是 1969 年 11 月 ê 時陣，阿波羅 12 號 ê 太空人 Pete Conrad 去 拜訪 測量員 3 號 太空船 ê 相片。 Tī 這進前 2 冬半 ê 1967 年 4 月，測量員 3 號降落 tī 較細个窟仔邊 ê 內面。 阿波羅 12 號 登月艙 無畏號 降落 ê 所在 才離 測量員太空船 200 公尺爾爾，毋是蓋遠。 這張立體影像是 kā 2 張 月球表面 無仝張相片 (編號 AS12-48-7133 kah AS12-48-7134) 組合起來--ê。 2 張 ê 視角干焦有小可仔無仝，kah 咱人目睭看著--ê 差不多。

[POJ] A-pho-lô 12 hō kah Chhek-liông-oân 3 hō

Kā lí ê 3D ba̍k-kiàⁿ the̍h--lâi, lâi him-sióng chit-tiuⁿ Goe̍h-kiû piáu-bīn ê hong-pō-iûⁿ. Chit pak 3D iáⁿ-siōng sī 1969 nî 11 goe̍h ê sî-chūn, A-pho-lô 12 hō ê thài-khong-jîn Pete Conrad khì pài-hóng Chhek-liông-oân 3 hō thài-khong-chûn ê siòng-phìⁿ. Tī chit chìn-chêng 2 tang-pòaⁿ ê 1967 nî 4 goe̍h, Chhek-liông-oân 3 hō kàng-lo̍h tī khah sè ê khut-á-piⁿ ê lāi-bīn. A-pho-lô 12 hō teng-goe̍h-chhng Bô-ùi-hō kàng-lo̍h ê só͘-chāi chiah lī Chhek-liông-oân thài-khong-chûn 200 kong-chhioh niā-niā, m̄-sī kài hn̄g. Chit-tiuⁿ li̍p-thé iáⁿ-siōng sī kā 2 tiuⁿ Goe̍h-kiû piáu-bīn bô-kâng tiuⁿ siòng-phìⁿ (pian-hō AS12-48-7133 kah AS12-48-7134) cho͘-ha̍p khí lâi--ê. 2 tiuⁿ ê sī-kak kan-na ū sió-khóa-á bô-kâng, kah lán lâng ba̍k-chiu khòaⁿ--tio̍h--ê chha-put-to.

[KIP] A-pho-lô 12 hō kah Tshik-liông-uân 3 hō

Kā lí ê 3D ba̍k-kiànn the̍h--lâi, lâi him-sióng tsit-tiunn Gue̍h-kiû piáu-bīn ê hong-pō-iûnn. Tsit pak 3D iánn-siōng sī 1969 nî 11 gue̍h ê sî-tsūn, A-pho-lô 12 hō ê thài-khong-jîn Pete Conrad khì pài-hóng Tshik-liông-uân 3 hō thài-khong-tsûn ê siòng-phìnn. Tī tsit tsìn-tsîng 2 tang-puànn ê 1967 nî 4 gue̍h, Tshik-liông-uân 3 hō kàng-lo̍h tī khah sè ê khut-á-pinn ê lāi-bīn. A-pho-lô 12 hō ting-gue̍h-tshng Bô-uì-hō kàng-lo̍h ê sóo-tsāi tsiah lī Tshik-liông-uân thài-khong-tsûn 200 kong-tshioh niā-niā, m̄-sī kài hn̄g. Tsit-tiunn li̍p-thé iánn-siōng sī kā 2 tiunn Gue̍h-kiû piáu-bīn bô-kâng tiunn siòng-phìnn (pian-hō AS12-48-7133 kah AS12-48-7134) tsoo-ha̍p khí lâi--ê. 2 tiunn ê sī-kak kan-na ū sió-khuá-á bô-kâng, kah lán lâng ba̍k-tsiu khuànn--tio̍h--ê tsha-put-to.

[English] Apollo 12 and Surveyor 3

Put on your red/blue glasses and gaze across the western Ocean of Storms on the surface of the Moon. The 3D anaglyph features Apollo 12 astronaut Pete Conrad visiting the Surveyor 3 spacecraft in November of 1969. Surveyor 3 had landed at the site on the inside slope of a small crater about 2 1/2 years earlier in April of 1967. Visible on the horizon beyond the far crater wall, Apollo 12's Lunar Module Intrepid touched down less than 200 meters (650 feet) away, easy moonwalking distance from the robotic Surveyor spacecraft. This stereo image was carefully created from two separate pictures (AS12-48-7133, AS12-48-7134) captured on the lunar surface. They depict the scene from only slightly different viewpoints, approximating the separation between human eyes.

詞彙學習