Webb 翕--ê 棍螺仔星系 NGC 1365

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Barred Spiral Galaxy NGC 1365 from Webb
• 影像來源：NASA, ESA, CSA, Janice Lee (NOIRLab) ; 資料處理：Alyssa Pagan (STScI)
• 台文翻譯：An-Li Tsai (TARA)

[漢羅] Webb 翕--ê 棍螺仔星系 NGC 1365

南半球 天爐座方向 干焦 5600 光年遠 ê NGC 1365，是 一个直徑 20 萬光年 ê 大粒棍螺仔星系，是咱銀河 ê 2 倍大。 這是 James Webb 太空望遠鏡 ê 中紅外線相機 MIRI 翕--ê 紅外線 影像，有翕著捲螺仔星系 足清楚 ê 細節。 Webb 翕--ê NGC 1365 有 6 萬光年闊 ê 範圍，是欲看星系 ê 核心 kah 新誕生 ê 星團。 影像內底 ê 塗粉絲 kah 氣泡 組成 ê 網路是 星系中心棍仔 伸出來 ê 捲螺仔手骨 頂懸 ê 少年恆星 產生--ê。 天文學家 懷疑講，NGC 1365 星系棍仔 ê 重力場，應該是 星系演化過程中足重要 ê 角色。 伊 kā 氣體 kah 塗粉 送去 生恆星 ê 所在，落尾這寡物質 會攏飼予星系中心 ê 超大質量烏洞 食。

[POJ] Webb hip--ê Kùn-lê-á Seng-hē NGC 1365

Lâm-pòaⁿ-kiû Thian-lô͘-chō hong-hiòng kan-na 5600 kng-nî hn̄g ê NGC 1365, sī chi̍t-ê ti̍t-kèng 20 bān kng-nî ê tōa-lia̍p kùn-lê-á seng-hē, sī lán Gîn-hô ê 2 pōe tōa. Che-sī James Webb thài-khong bōng-oán-kiàⁿ ê tiong âng-gōa-sòaⁿ siòng-ki MIRI hip--ê âng-gōa-sòaⁿ iáⁿ-siōng, ū hip-tio̍h kńg-lê-á seng-hē chiok chheng-chhó ê sè-chiat. Webb hip--ê NGC 1365 ū 6 bān kng-nî khoah ê hoān-ûi, sī beh khòaⁿ seng-hē ê he̍k-sim kah sin tàn-seng ê seng-thoân. Iáⁿ-siōng lāi-té ê thô͘-hún-si kah khì-phàu cho͘-sêng ê bāng-lō͘ sī seng-hē tiong-sim kùn-á chhun chhut-lâi ê kńg-lê-á chhiú-kut téng-koân ê siàu-liân hêng-chhiⁿ sán-seⁿ--ê. Thian-bûn ha̍k-ka hoâi-gî kóng, NGC 1365 seng-hē kùn-á ê tāng-le̍k-tiûⁿ, eng-kai sī seng-hē ián-hòa kòe-têng-tiong chiok tiōng-iàu ê kak-sek. I kā khì-thé kah thô͘-hún sàng-khì seⁿ hêng-chhiⁿ ê só͘-chāi, lo̍h-bóe chit kóa bu̍t-chit ē lóng chhī hō͘ seng-hē tiong-sim ê chhiau-tōa chit-liōng o͘-tōng chia̍h.

[KIP] Webb hip--ê Kùn-lê-á Sing-hē NGC 1365

Lâm-puànn-kiû Thian-lôo-tsō hong-hiòng kan-na 5600 kng-nî hn̄g ê NGC 1365, sī tsi̍t-ê ti̍t-kìng 20 bān kng-nî ê tuā-lia̍p kùn-lê-á sing-hē, sī lán Gîn-hô ê 2 puē tuā. Tse-sī James Webb thài-khong bōng-uán-kiànn ê tiong âng-guā-suànn siòng-ki MIRI hip--ê âng-guā-suànn iánn-siōng, ū hip-tio̍h kńg-lê-á sing-hē tsiok tshing-tshó ê sè-tsiat. Webb hip--ê NGC 1365 ū 6 bān kng-nî khuah ê huān-uî, sī beh khuànn sing-hē ê hi̍k-sim kah sin tàn-sing ê sing-thuân. Iánn-siōng lāi-té ê thôo-hún-si kah khì-phàu tsoo-sîng ê bāng-lōo sī sing-hē tiong-sim kùn-á tshun tshut-lâi ê kńg-lê-á tshiú-kut tíng-kuân ê siàu-liân hîng-tshinn sán-senn--ê. Thian-bûn ha̍k-ka huâi-gî kóng, NGC 1365 sing-hē kùn-á ê tāng-li̍k-tiûnn, ing-kai sī sing-hē ián-huà kuè-tîng-tiong tsiok tiōng-iàu ê kak-sik. I kā khì-thé kah thôo-hún sàng-khì senn hîng-tshinn ê sóo-tsāi, lo̍h-bué tsit kuá bu̍t-tsit ē lóng tshī hōo sing-hē tiong-sim ê tshiau-tuā tsit-liōng oo-tōng tsia̍h.

[English] Barred Spiral Galaxy NGC 1365 from Webb

A mere 56 million light-years distant toward the southern constellation Fornax, NGC 1365 is an enormous barred spiral galaxy about 200,000 light-years in diameter. That's twice the size of our own barred spiral Milky Way. This sharp image from the James Webb Space Telescope's Mid-Infrared Instrument (MIRI) reveals stunning details of this magnificent spiral in infrared light. Webb's field of view stretches about 60,000 light-years across NGC 1365, exploring the galaxy's core and bright newborn star clusters. The intricate network of dusty filaments and bubbles is created by young stars along spiral arms winding from the galaxy's central bar. Astronomers suspect the gravity field of NGC 1365's bar plays a crucial role in the galaxy's evolution, funneling gas and dust into a star-forming maelstrom and ultimately feeding material into the active galaxy's central, supermassive black hole.

詞彙學習