NGC 6888：月眉星雲

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：NGC 6888: The Crescent Nebula
• 影像來源 kah 版權：Team ARO
• Jigsaw Challenge: Astronomy Puzzle of the Day
• 台文翻譯：An-Li Tsai (TARA)

[漢羅] NGC 6888: 月眉星雲

月眉星雲是按怎形成--ê？ 相片 中央這幅 月眉星雲，看起來就親像是一粒太空 蟲包，這是中央彼粒足光 ê 恆星造成--ê。 一款逐家較相信 ê 假說是講，這个 月眉星雲 是 25 萬年前形成--ê。 彼个時陣，中央彼粒大質量恆星已經演化變做 Wolf-Rayet 星 (WR 136) 矣。 而且伊 ê 恆星風 強甲 kā 外層氣體擲出去，差不多 1 萬年擲 1 个太陽質量 出去。 這个恆星風 kā 進前演化階段 留落來 ê 氣體捒出去，形成 一重一重足複雜 ê 發光 氣體殼。 月眉星雲 ê 編號是 NGC 6888，就 tī 天鵝座 方向 4700 光年 遠 ê 所在。 WR 136 星 可能會 tī 紲落來 100 萬年內，演化變做 超新星 爆炸。

[POJ] NGC 6888: Goe̍h-bâi Seng-hûn

Goe̍h-bâi Seng-hûn sī-án-nóa hêng-sêng--ê? Siòng-phìⁿ tiong-ng chit pak Goe̍h-bâi Seng-hûn, khòaⁿ--khí-lâi tō chhin-chhiūⁿ sī chi̍t-lia̍p thài-khong thâng-pau, che-sī tiong-ng hit lia̍p chiok kng ê hêng-chhiⁿ chō-sêng--ê. Chi̍t-khoán ta̍k-ke khah siong-sìn ê ká-soat sī-kóng, chit-ê Goe̍h-bâi Seng-hûn sī 25 bān nî-chêng hêng-sêng--ê. Hit-ê sî-chūn, tiong-ng hit lia̍p tōa chit-liōng hêng-chhiⁿ í-keng ián-hòa piàn-chò Wolf-Rayet chhiⁿ (WR 136) --ah. Jî-chhiáⁿ i ê hêng-chhiⁿ-hong kiông kah kā gōa-chân khì-thé tàn--chhut-khì, chha-put-to 1 bān-nî tàn 1 ê thài-iông chit-liōng chhut-khì. Chit-ê hêng-chhiⁿ hong kā chìn-chêng ián-hòa kai-tōaⁿ lâu--lo̍h-lâi ê khì-thé sak--chhut-khì, hêng-sêng chi̍t têng chi̍t têng chiok ho̍k-cha̍p ê hoat-kng khì-thé-khak. Goe̍h-bâi Seng-hûn ê pian-hō sī NGC 6888, tō tī Thian-gô-chō hong-hiòng 4700 kng-nî hn̄g ê só͘-chāi. WR 136 chhiⁿ khó-lêng ē tī sòa--lo̍h-lâi 100 bān-nî lāi, ián-hòa piàn-chò chhiau-sin-seng po̍k-chà.

[KIP] NGC 6888: Gue̍h-bâi Sing-hûn

Gue̍h-bâi Sing-hûn sī-án-nuá hîng-sîng--ê? Siòng-phìnn tiong-ng tsit pak Gue̍h-bâi Sing-hûn, khuànn--khí-lâi tō tshin-tshiūnn sī tsi̍t-lia̍p thài-khong thâng-pau, tse-sī tiong-ng hit lia̍p tsiok kng ê hîng-tshinn tsō-sîng--ê. Tsi̍t-khuán ta̍k-ke khah siong-sìn ê ká-suat sī-kóng, tsit-ê Gue̍h-bâi Sing-hûn sī 25 bān nî-tsîng hîng-sîng--ê. Hit-ê sî-tsūn, tiong-ng hit lia̍p tuā tsit-liōng hîng-tshinn í-king ián-huà piàn-tsò Wolf-Rayet tshinn (WR 136) --ah. Jî-tshiánn i ê hîng-tshinn-hong kiông kah kā guā-tsân khì-thé tàn--tshut-khì, tsha-put-to 1 bān-nî tàn 1 ê thài-iông tsit-liōng tshut-khì. Tsit-ê hîng-tshinn hong kā tsìn-tsîng ián-huà kai-tuānn lâu--lo̍h-lâi ê khì-thé sak--tshut-khì, hîng-sîng tsi̍t tîng tsi̍t tîng tsiok ho̍k-tsa̍p ê huat-kng khì-thé-khak. Gue̍h-bâi Sing-hûn ê pian-hō sī NGC 6888, tō tī Thian-gô-tsō hong-hiòng 4700 kng-nî hn̄g ê sóo-tsāi. WR 136 tshinn khó-lîng ē tī suà--lo̍h-lâi 100 bān-nî lāi, ián-huà piàn-tsò tshiau-sin-sing po̍k-tsà.

[English] NGC 6888: The Crescent Nebula

How was the Crescent Nebula created? Looking like an emerging space cocoon, the Crescent Nebula, visible in the center of the featured image, was created by the brightest star in its center. A leading progenitor hypothesis has the Crescent Nebula beginning to form about 250,000 years ago. At that time, the massive central star had evolved to become a Wolf-Rayet star (WR 136), shedding its outer envelope in a strong stellar wind, ejecting the equivalent of our Sun's mass every 10,000 years. This wind impacted surrounding gas left over from a previous phase, compacting it into a series of complex shells, and lighting it up. The Crescent Nebula, also known as NGC 6888, lies about 4,700 light-years away in the constellation of Cygnus. Star WR 136 will probably undergo a supernova explosion sometime in the next million years.

詞彙學習