足特別 ê 紫金山-ATLAS 彗星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：The Unusual Tails of Comet Tsuchinshan-Atlas
• 影像來源 kah 版權：Bray Falls
• 天文相簿：Comet Tsuchinshan-ATLAS in 2024
• 台文翻譯：An-Li Tsai (TARA)

[漢羅] 足特別 ê 紫金山-ATLAS 彗星

紫金山-ATLAS 彗星 ê 尾溜 內底 無四常 ê 烏暗線 是按怎來--ê？ 10 月中有翕著 ê 這粒足光 ê 彗星 相片，毋但翕著 予人印象足深 ê 長彗尾 kah 細細條 ê 倒反彗尾，嘛有一寡人 翕著 長 彗尾 內底 足特別 ê 烏暗 線。 這个烏暗線是按怎來--ê？ 到今猶 tī 咧討論。 有可能是 烏暗 塗粉 雲煙、無仝區 ê 彗尾 相疊、抑是 較厚 ê 彗鬚 內底一寡細粒塗粉粒產生 ê 烏影。 10 月 14 tī 美國德州翕著 ê 這張 相片 嘛有翕著這條烏暗線。 為著欲幫贊科學家分析這个現象，你若是有翕著有清楚烏暗線 ê 彗星相片，請 送來 APOD。 紫金山-ATLAS 彗星 這馬已經轉去 外太陽系 矣，所以伊 tī 天頂會 愈來愈暗。

[POJ] Chiok te̍k-pa̍t-ê Chí-kim-soaⁿ ATLAS Hūi-chheⁿ

Chí-kim-soaⁿ ATLAS Hūi-chheⁿ ê bóe-liu lāi-té bô sù-siông ê o͘-àm sòaⁿ sī-án-chóaⁿ lâi--ê? 10 goe̍h-tiong ū hip-tio̍h ê chit lia̍p chiok kng ê hūi-chheⁿ siòng-phìⁿ, m̄-nā hip-tio̍h hō͘ lâng ìn-siōng chiok chhim ê tn̂g hūi-bóe kah sè-sè-tiâu ê tò-péng hūi-bóe, mā ū chi̍t kóa lâng hip-tio̍h tn̂g hūi-bóe lāi-té chiok te̍k-pa̍t ê o͘-àm sòaⁿ. Chit-ê o͘-àm sòaⁿ sī-án-chóaⁿ lâi--ê? Kàu-taⁿ iáu tī-leh thó-lūn. Ū khó-lêng sī o͘-àm thô͘-hún hûn-ian, bô-kâng khu ê hūi-bóe sio-tha̍h, ia̍h-sī khah kāu ê hūi-chhiu lāi-té chi̍t-kóa sè-lia̍p thô͘-hún-lia̍p sán-seng ê o͘-iáⁿ. 10 goe̍h 14 tī Bí-kok Tek-chiu hip-tio̍h ê chit-tiuⁿ siòng-phìⁿ mā ū hip-tio̍h chit tiâu o͘-àm sòaⁿ. Ūi tio̍h beh pang-chān kho-ha̍k-ka hun-sek chit-ê hiān-siōng, lí nā-sī ū hip-tio̍h ū chheng-chhó o͘-àm sòaⁿ ê hūi-chheⁿ siòng-phìⁿ, chhiáⁿ sàng-lâi APOD. Chí-kim-soaⁿ ATLAS Hūi-chheⁿ chit-má í-keng tńg-khì Gōa Thài-iông-hē ah, só͘-í i tī thiⁿ-téng ē lú-lâi-lú àm.

[KIP] Tsiok ti̍k-pa̍t-ê Tsí-kim-suann ATLAS Huī-tshenn

Tsí-kim-suann ATLAS Huī-tshenn ê bué-liu lāi-té bô sù-siông ê oo-àm suànn sī-án-tsuánn lâi--ê? 10 gue̍h-tiong ū hip-tio̍h ê tsit lia̍p tsiok kng ê huī-tshenn siòng-phìnn, m̄-nā hip-tio̍h hōo lâng ìn-siōng tsiok tshim ê tn̂g huī-bué kah sè-sè-tiâu ê tò-píng huī-bué, mā ū tsi̍t kuá lâng hip-tio̍h tn̂g huī-bué lāi-té tsiok ti̍k-pa̍t ê oo-àm suànn. Tsit-ê oo-àm suànn sī-án-tsuánn lâi--ê? Kàu-tann iáu tī-leh thó-lūn. Ū khó-lîng sī oo-àm thôo-hún hûn-ian, bô-kâng khu ê huī-bué sio-tha̍h, ia̍h-sī khah kāu ê huī-tshiu lāi-té tsi̍t-kuá sè-lia̍p thôo-hún-lia̍p sán-sing ê oo-iánn. 10 gue̍h 14 tī Bí-kok Tik-tsiu hip-tio̍h ê tsit-tiunn siòng-phìnn mā ū hip-tio̍h tsit tiâu oo-àm suànn. Uī tio̍h beh pang-tsān kho-ha̍k-ka hun-sik tsit-ê hiān-siōng, lí nā-sī ū hip-tio̍h ū tshing-tshó oo-àm suànn ê huī-tshenn siòng-phìnn, tshiánn sàng-lâi APOD. Tsí-kim-suann ATLAS Huī-tshenn tsit-má í-king tńg-khì Guā Thài-iông-hē ah, sóo-í i tī thinn-tíng ē lú-lâi-lú àm.

[English] The Unusual Tails of Comet Tsuchinshan-Atlas

What created an unusual dark streak in Comet Tsuchinshan-Atlas's tail? Some images of the bright comet during mid-October not only caught its impressively long tail and its thin anti-tail, but a rather unexpected feature: a dark streak in the long tail. The reason for the dark streak is currently unclear and a topic of some debate. Possible reasons include a plume of dark dust, different parts of the bright tail being unusually superposed, and a shadow of a dense part of the coma on smaller dust particles. The streak is visible in the featured image taken on October 14 from Texas, USA. To help future analyses, if you have taken a good image of the comet that clearly shows this dark streak, please send it in to APOD. Comet Tsuchinshan–ATLAS has now faded considerably and is returning to the outer Solar System.

詞彙學習