水手谷：火星 ê 大山谷

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Valles Marineris: The Grand Canyon of Mars
• 影像來源：NASA, USGS, Viking Project
• 台文翻譯：An-Li Tsai (TARA)

[漢羅] 水手谷：火星 ê 大峽谷

火星 頂懸有一巡足深 ê 痕跡，是 太陽系 內底上大 ê 峽谷。 伊就叫做 水手谷，是一个 3000 公里長、600 公里闊，8 公里深 ê 大山谷。 地球 美國 Arizona 州 ê 大峽谷 嘛才 800 公里長，30 公里闊、1.8 公里深爾爾。 水手谷 ê 起源到今 猶毋是蓋清楚。 目前上主要 ê 假說是講，伊是幾若十億年前 火星冷卻 ê 時陣，一條細條 ê 必巡 演變做這馬 ê 峽谷。 科學家已經 ùi 這个 峽谷內底揣著幾若款地質演變 ê 過程。 這張 拼鬥圖 是 1970 年代 海賊號 軌道太空船 翕 ê 火星 相片 合成--ê。

[POJ] Chúi-siú-kok: Hóe-chheⁿ ê Tōa-kiap-kok

Hóe-chheⁿ téng-koân ū chi̍t sûn chiok chhim ê hûn-jiah, sī Thài-iông-hē lāi-té siōng-tōa ê kiap-kok. I tō kiò-chò Chúi-siú-kok, sī chi̍t-ê 3000 kong-lí tn̂g, 600 kong-lí khoah, 8 kong-lí chhim ê tōa-soaⁿ-kok. Tē-kiû Bí-kok Arizona chiu ê Tōa-kiap-kok mā chiah 800 kong-lí tn̂g, 30 kong-lí khoah, 1.8 kong-lí chhim niā-niā. Chúi-siú-kok ê khí-goân kàu-taⁿ iáu m̄-sī kài chheng-chhó. Bo̍k-chiân siōng chú-iàu ê ká-soat sī-kóng, i sī kúi-nā cha̍p-ek nî-chêng Hóe-chheⁿ léng-khiok ê sî-chūn, chi̍t tiâu sè-tiâu ê pit-sûn ián-piàn-chò chit-má ê kiap-kok. Kho-ha̍k-ka í-keng ùi chit-ê kiap-kok lāi-té chhōe-tio̍h kúi-nā khoán tē-chit ián-piàn ê kòe-têng. Chit-tiuⁿ pheng-tàu-tô͘ sī 1970 nî-tāi Hái-chha̍t-hō Kúi-tō Thài-khong-chûn hip ê Hóe-chheⁿ siòng-phìⁿ ha̍p-chiâⁿ--ê.

[KIP] Tsuí-siú-kok: Hué-tshenn ê Tuā-kiap-kok

Hué-tshenn tíng-kuân ū tsi̍t sûn tsiok tshim ê hûn-jiah, sī Thài-iông-hē lāi-té siōng-tuā ê kiap-kok. I tō kiò-tsò Tsuí-siú-kok, sī tsi̍t-ê 3000 kong-lí tn̂g, 600 kong-lí khuah, 8 kong-lí tshim ê tuā-suann-kok. Tē-kiû Bí-kok Arizona tsiu ê Tuā-kiap-kok mā tsiah 800 kong-lí tn̂g, 30 kong-lí khuah, 1.8 kong-lí tshim niā-niā. Tsuí-siú-kok ê khí-guân kàu-tann iáu m̄-sī kài tshing-tshó. Bo̍k-tsiân siōng tsú-iàu ê ká-suat sī-kóng, i sī kuí-nā tsa̍p-ik nî-tsîng Hué-tshenn líng-khiok ê sî-tsūn, tsi̍t tiâu sè-tiâu ê pit-sûn ián-piàn-tsò tsit-má ê kiap-kok. Kho-ha̍k-ka í-king uì tsit-ê kiap-kok lāi-té tshuē-tio̍h kuí-nā khuán tē-tsit ián-piàn ê kuè-tîng. Tsit-tiunn phing-tàu-tôo sī 1970 nî-tāi Hái-tsha̍t-hō Kuí-tō Thài-khong-tsûn hip ê Hué-tshenn siòng-phìnn ha̍p-tsiânn--ê.

[English] Valles Marineris: The Grand Canyon of Mars

The largest canyon in the Solar System cuts a wide swath across the face of Mars. Named Valles Marineris, the grand valley extends over 3,000 kilometers long, spans as much as 600 kilometers across, and delves as much as 8 kilometers deep. By comparison, the Earth's Grand Canyon in Arizona, USA is 800 kilometers long, 30 kilometers across, and 1.8 kilometers deep. The origin of the Valles Marineris remains unknown, although a leading hypothesis holds that it started as a crack billions of years ago as the planet cooled. Several geologic processes have been identified in the canyon. The featured mosaic was created from over 100 images of Mars taken by Viking Orbiters in the 1970s.

詞彙學習