仙后座內底有一支來鬥相共 ê 手

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Helping Hand in Cassiopeia
• 影像來源 kah 版權：Francesco Radici
• 台文翻譯：An-Li Tsai (TARA)

[漢羅] 仙后座內底有一支來鬥相共 ê 手

浮 tī 咱銀河盤附近 ê 厚塗粉分子雲，看起來敢若是宇宙尺度 ê 一支來鬥相共 ê 手。 In 是恆星形成星際雲 複合體 ê 一部份，包括 LDN 1358, 1357, kah 1355。 這是美國天文學家 Beverly Lynds tī 1962 年編 ê 烏暗星雲目錄 內底 ê 天體。 這寡 3000 光年遠、袂透光 ê 烏暗星雲是 tī 有足濟 恆星 ê 北方星座 仙后座 內底。 對天文攝影師來講，翕著 in 是 足困難毋過足值得驕傲 ê 一項代誌。 這个距離翕著 ê 這張望遠鏡深空影像，差不多是 80 光年闊。

[POJ] Sian-hiō-chō lāi-té ū chi̍t-ki lâi tàu-saⁿ-kāng ê chhiú

Phû tī lán Gîn-hô-pôaⁿ hù-kīn ê kāu thô͘-hún hun-chú-hûn, khòaⁿ--khí-lâi káⁿ-ná sī ú-tiū chhioh-tō͘ ê chi̍t-ki lâi tàu-saⁿ-kāng ê chhiú. In sī hêng-chheⁿ hêng-sêng seng-chè-hûn ho̍k-ha̍p-thé ê chi̍t-pō͘-hūn, pau-koah LDN 1358, 1357, kah 1355. Che-sī Bí-kok thian-bûn ha̍k-ka Beverly Lynds tī 1962 nî pian ê o͘-àm seng-hûn bo̍k-lio̍k lāi-té ê thian-thé. Chit kóa 3000 kng-nî hn̄g, bē thàu-kng ê o͘-àm seng-hûn sī tī ū chiok chē hêng-chheⁿ ê pak-hong seng-chō Sian-hiō-chō lāi-té. Tùi thian-bûn liap-iáⁿ-su lâi-kóng, hip-tio̍h in sī chiok khùn-lân m̄-koh chiok ta̍t-tit kiau-ngō͘ ê chi̍t-hāng tāi-chì. Chit-ê kū-lī hip-tio̍h ê chit-tiuⁿ bōng-oán-kiàⁿ chhim-khong iáⁿ-siōng, chha-put-to sī 80 kng-nî khoah.

[KIP] Sian-hiō-tsō lāi-té ū tsi̍t-ki lâi tàu-sann-kāng ê tshiú

Phû tī lán Gîn-hô-puânn hù-kīn ê kāu thôo-hún hun-tsú-hûn, khuànn--khí-lâi kánn-ná sī ú-tiū tshioh-tōo ê tsi̍t-ki lâi tàu-sann-kāng ê tshiú. In sī hîng-tshenn hîng-sîng sing-tsè-hûn ho̍k-ha̍p-thé ê tsi̍t-pōo-hūn, pau-kuah LDN 1358, 1357, kah 1355. Tse-sī Bí-kok thian-bûn ha̍k-ka Beverly Lynds tī 1962 nî pian ê oo-àm sing-hûn bo̍k-lio̍k lāi-té ê thian-thé. Tsit kuá 3000 kng-nî hn̄g, bē thàu-kng ê oo-àm sing-hûn sī tī ū tsiok tsē hîng-tshenn ê pak-hong sing-tsō Sian-hiō-tsō lāi-té. Tuì thian-bûn liap-iánn-su lâi-kóng, hip-tio̍h in sī tsiok khùn-lân m̄-koh tsiok ta̍t-tit kiau-ngōo ê tsi̍t-hāng tāi-tsì. Tsit-ê kū-lī hip-tio̍h ê tsit-tiunn bōng-uán-kiànn tshim-khong iánn-siōng, tsha-put-to sī 80 kng-nî khuah.

[English] Helping Hand in Cassiopeia

Drifting near the plane of our Milky Way galaxy these dusty molecular clouds seem to extend a helping hand on a cosmic scale. Part of a local complex of star-forming interstellar clouds they include LDN 1358, 1357, and 1355 from American astronomer Beverly Lynds' 1962 Catalog of Dark Nebulae. Presenting a challenging target for astro-imagers, the obscuring dark nebulae are nearly 3,000 light-years away, toward rich starfields in the northern constellation Cassiopeia. At that distance, this deep, telescopic field of view would span about 80 light-years.

詞彙學習