Dolomites 山脈 kah 天頂 ê 紫金山-ATLAS 彗星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Comet Tsuchinshan-Atlas over the Dolomites
• 影像來源 kah 版權：Alessandra Masi
• 天文相簿：2024 年 ê 紫金山-ATLAS 彗星
• 台文翻譯：An-Li Tsai (TARA)

[漢羅] Dolomites 山脈 kah 天頂 ê 紫金山-ATLAS 彗星

紫金山-ATLAS 彗星 這馬欲轉去 外太陽系 矣。 這粒大粒垃圾雪球 tī 地球 10 月份 行到 太陽附近 ê 時陣，變做是夜空中予人 印象足深 ê 天體，逐家嘛翕著足濟足媠 ê 相片。 這張相片 是 10 月中翕--ê，有一條顯目 ê 倒反彗尾。 這張相片有翕著 彗星 C/2023 A3 (紫金山-ATLAS 彗星) 長長 ê 塗粉 尾溜 kah 離子 尾溜，方向是指向離開日頭 ê 方向。 毋過 內底有較大粒塗粉粒 ê 倒反彗尾，方向是指向 日頭 落去 ê 方向。 前景是 意大利 ê Tai di Cadore 庄頭，背景是 足懸 ê Dolomite 山脈。 另外一粒 彗星 C/2024 S1 (ATLAS 彗星) 進前去予人認為 kah 紫金山-ATLAS 彗星 有通比並，毋過伊頂禮拜接近太陽 ê 時陣 煞 散去 矣。

[POJ] Dolomites Soaⁿ-me̍h kah thiⁿ-téng ê Chí-kim-soaⁿ ATLAS hūi-chheⁿ

Chí-kim-soaⁿ ATLAS hūi-chheⁿ chit-má beh tńg-khì gōa thài-iông-hē--ah. Chit lia̍p tōa-lia̍p lah-sap soat-kiû tī Tē-kiû 10 goe̍h-hūn kiâⁿ kàu thài-iông hù-kīn ê sî-chūn, piàn-chò sī iā-khong tiong hō͘ lâng ìn-siōng chiok chhim ê thian-thé, ta̍k-ke mā hip-tio̍h chiok chē chiok súi ê siòng-phìⁿ. Chit-tiuⁿ siòng-phìⁿ sī 10 ge̍h-tiong hip--ê, ū chi̍t tiâu hiáⁿ-ba̍k ê tò-péng hūi-bóe. Chit-tiuⁿ siòng-phìⁿ ū hip-tio̍h hūi-chheⁿ C/2023 À (Chí-kim-soaⁿ ATLAS hūi-chheⁿ) tn̂g-tn̂g ê thô͘-hún bóe-liu kah lī-chú bóe-liu, hong-hiòng sī chí-hiòng lī-khui ji̍t-thâu ê hong-hiòng. M̄-koh lāi-té ū khah tōa-lia̍p thô͘-hún-lia̍p ê tò-péng hūi-bóe, hong-hiòng sī chí-hiòng ji̍t-thâu lo̍h-khì ê hong-hiòng. Chiân-kéng sī I-tá-lī ê Tai di Cadore chng-thâu, pōe-kéng sī chiok koân ê Dolomite soaⁿ-me̍h. Lēng-gōa chi̍t-lia̍p hūi-chheⁿ C/2024 S1 (ATLAS hūi-chheⁿ) chìn-chêng khì hō͘ lâng jīn-ûi kah Chí-kim-soaⁿ ATLAS hūi-chheⁿ ū-thang pí-phēng, m̄-koh i téng-lé-pài chiap-kīn thài-iông ê sî-chūn soah suànnn--khì--ah.

[KIP] Dolomites Suann-me̍h kah thinn-tíng ê Tsí-kim-suann ATLAS huī-tshenn

Tsí-kim-suann ATLAS huī-tshenn tsit-má beh tńg-khì guā thài-iông-hē--ah. Tsit lia̍p tuā-lia̍p lah-sap suat-kiû tī Tē-kiû 10 gue̍h-hūn kiânn kàu thài-iông hù-kīn ê sî-tsūn, piàn-tsò sī iā-khong tiong hōo lâng ìn-siōng tsiok tshim ê thian-thé, ta̍k-ke mā hip-tio̍h tsiok tsē tsiok suí ê siòng-phìnn. Tsit-tiunn siòng-phìnn sī 10 ge̍h-tiong hip--ê, ū tsi̍t tiâu hiánn-ba̍k ê tò-píng huī-bué. Tsit-tiunn siòng-phìnn ū hip-tio̍h huī-tshenn C/2023 A3 (Tsí-kim-suann ATLAS huī-tshenn) tn̂g-tn̂g ê thôo-hún bué-liu kah lī-tsú bué-liu, hong-hiòng sī tsí-hiòng lī-khui ji̍t-thâu ê hong-hiòng. M̄-koh lāi-té ū khah tuā-lia̍p thôo-hún-lia̍p ê tò-píng huī-bué, hong-hiòng sī tsí-hiòng ji̍t-thâu lo̍h-khì ê hong-hiòng. Tsiân-kíng sī I-tá-lī ê Tai di Cadore tsng-thâu, puē-kíng sī tsiok kuân ê Dolomite suann-me̍h. Līng-guā tsi̍t-lia̍p huī-tshenn C/2024 S1 (ATLAS huī-tshenn) tsìn-tsîng khì hōo lâng jīn-uî kah Tsí-kim-suann ATLAS huī-tshenn ū-thang pí-phīng, m̄-koh i tíng-lé-pài tsiap-kīn thài-iông ê sî-tsūn suah suànnn--khì--ah.

[English] Comet Tsuchinshan-Atlas over the Dolomites

Comet Tsuchinshan-Atlas is now headed back to the outer Solar System. The massive dusty snowball put on quite a show during its trip near the Sun, resulting in many impressive pictures from planet Earth during October. The featured image was taken in mid-October and shows a defining visual feature of the comet -- its impressive anti-tail. The image captures Comet C/2023 A3 (Tsuchinshan–ATLAS) with impressively long dust and ion tails pointing up and away from the Sun, while the strong anti-tail -- composed of more massive dust particles -- trails the comet and points down and (nearly) toward the recently-set Sun. In the foreground is village of Tai di Cadore, Italy, with the tremendous Dolomite Mountains in the background. Another comet, C/2024 S1 (ATLAS), once a candidate to rival Comet Tsuchinshan-Atlas in brightness, broke up last week during its close approach to our Sun.

詞彙學習