NGC 7635：氣泡星雲

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：NGC 7635: The Bubble Nebula
• 影像來源 kah 版權：Chad Leader
• 天頂予你 ê 禮物：你 ê APOD 生日相片 (post 1995)
• 台文翻譯：An-Li Tsai (TARA)

[漢羅] NGC 7635：氣泡星雲

這个太空氣泡是按怎做出來的？ 是 ùi 恆星風 kā 歕出來的。 這个 唌--人 ê 星雲 就親像是一粒頭，伊 ê 編號是 NGC 7635，一般攏 kā 伊叫做 氣泡星雲.。 這个遮爾媠 ê 景色，是愛長時間感光才有法度翕出這粒 宇宙氣泡 kah 伊邊仔 ê 複雜細節。 雖罔講伊看起來敢若是會隨破去，毋過這粒直徑 10 光年 ê 氣泡其實會當證明講，進前捌發生過 激烈 ê 活動。 氣泡 中心 ê 正爿頂懸有一粒足光 ê 高溫 恆星，就藏 tī 星雲 ê 反射 塗粉內底。 一粒差不多是 10 到 20 倍 太陽 質量 ê 恆星，發出 足猛 ê 恆星風 kah 足強 ê 輻射，kā 邊仔 較厚 ê 分子雲 歕開，形成這个 發光 ê 氣體結構。 這个 趣味 ê 氣泡星雲 就 tī 仙后座 方向 1 萬 1000 光年 遠 ê 所在。

[POJ] NGC 7635: Khì-phàu Seng-hûn

Chit-ê thài-khong khì-phàu sī-án-chóaⁿ chò--chhut-lâi--ê? Sī ùi hêng-chhiⁿ hong kā pûn chhut-lâi--ê. Chit-ê siâⁿ--lâng ê seng-hûn tō chhin-chhiūⁿ sī chi̍t-lia̍p thâu, i ê pian-hō sī NGC 7635, it-poaⁿ lóng kā i kiò-chò Khì-phàu Seng-hûn. Chit-ê chiah-nī súi ê kéng-sek, sī ài tn̂g sî-kan kám-kng chiah ū-hoat-tō͘ hip chhut chit lia̍p ú-tiū khì-phàu kah i piⁿ-á ê ho̍k-cha̍p sè-chiat. Sui-bóng kóng i khòaⁿ--khí-lâi káⁿ-ná sī ē sûi phòa--khì, m̄-koh chit lia̍p ti̍t-kèng 10 kng-nî ê khì-phàu kî-si̍t ē-tàng chèng-bêng kóng, chìn-chêng bat hoat-seng kòe kek-lia̍t ê oa̍h-tāng. Khì-phàu tiong-sim ê chiàⁿ-pêng téng-koân ū chi̍t-lia̍p chiok kng ê ko-un hêng-chheⁿ, tō chhàng tī seng-hûn ê hoán-siā thô͘-hún lāi-té. Chi̍t-lia̍p chha-put-to sī 10 kàu 20 pōe thài-iông chit-liōng ê hêng-chheⁿ, hoat-chhut chiok mé ê hêng-chheⁿ-hong kah chiok kiông ê hok-siā, kā piⁿ-á khah kāu ê hun-chú-hûn pûn--khui, hêng-sêng chit-ê hoat-kng ê khì-thé kiat-kò͘. Chit-ê chhù-bī ê Khì-phàu Seng-hûn tō tī Sian-hiō-chō hong-hiòng 1 bān 1000 kng-nî hn̄g ê só͘-chāi.

[KIP] NGC 7635: Khì-phàu Sing-hûn

Tsit-ê thài-khong khì-phàu sī-án-tsuánn tsò--tshut-lâi--ê? Sī uì hîng-tshinn hong kā pûn tshut-lâi--ê. Tsit-ê siânn--lâng ê sing-hûn tō tshin-tshiūnn sī tsi̍t-lia̍p thâu, i ê pian-hō sī NGC 7635, it-puann lóng kā i kiò-tsò Khì-phàu Sing-hûn. Tsit-ê tsiah-nī suí ê kíng-sik, sī ài tn̂g sî-kan kám-kng tsiah ū-huat-tōo hip tshut tsit lia̍p ú-tiū khì-phàu kah i pinn-á ê ho̍k-tsa̍p sè-tsiat. Sui-bóng kóng i khuànn--khí-lâi kánn-ná sī ē suî phuà--khì, m̄-koh tsit lia̍p ti̍t-kìng 10 kng-nî ê khì-phàu kî-si̍t ē-tàng tsìng-bîng kóng, tsìn-tsîng bat huat-sing kuè kik-lia̍t ê ua̍h-tāng. Khì-phàu tiong-sim ê tsiànn-pîng tíng-kuân ū tsi̍t-lia̍p tsiok kng ê ko-un hîng-tshenn, tō tshàng tī sing-hûn ê huán-siā thôo-hún lāi-té. Tsi̍t-lia̍p tsha-put-to sī 10 kàu 20 puē thài-iông tsit-liōng ê hîng-tshenn, huat-tshut tsiok mé ê hîng-tshenn-hong kah tsiok kiông ê hok-siā, kā pinn-á khah kāu ê hun-tsú-hûn pûn--khui, hîng-sîng tsit-ê huat-kng ê khì-thé kiat-kòo. Tsit-ê tshù-bī ê Khì-phàu Sing-hûn tō tī Sian-hiō-tsō hong-hiòng 1 bān 1000 kng-nî hn̄g ê sóo-tsāi.

[English] NGC 7635: The Bubble Nebula

What created this huge space bubble? Blown by the wind from a star, this tantalizing, head-like apparition is cataloged as NGC 7635, but known simply as the Bubble Nebula. The featured striking view utilizes a long exposure to reveal the intricate details of this cosmic bubble and its environment. Although it looks delicate, the 10 light-year diameter bubble offers evidence of violent processes at work. Seen here above and right of the Bubble's center, a bright hot star is embedded in the nebula's reflecting dust. A fierce stellar wind and intense radiation from the star, which likely has a mass 10 to 20 times that of the Sun, has blasted out the structure of glowing gas against denser material in a surrounding molecular cloud. The intriguing Bubble Nebula lies a mere 11,000 light-years away toward the boastful constellation Cassiopeia.

詞彙學習