NGC 602：Webb 太空望遠鏡 翕著 ê 恆星 kah 雲柱

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：NGC 602: Stars Versus Pillars from Webb
• 影像來源：ESA/Webb, NASA & CSA, P. Zeidler, E. Sabbi, A. Nota, M. Zamani (ESA/Webb)
• 台文翻譯：An-Li Tsai (TARA)

[漢羅] NGC 602：Webb 太空望遠鏡 翕著 ê 恆星 kah 雲柱

這寡恆星當咧毀滅雲柱。 講較詳細咧，圖中央 有一寡新形成 ê 恆星 發出 ê 光是遮爾強，強甲會 kā 伊邊仔 ê 雲柱 內底 ê 氣體 kah 塗粉 蒸發 去。 仝一个時間，這寡 雲柱 嘛想欲形成 新 ê 恆星。 這規張圖攏是 星團 NGC 602。 這張新 ê 景色是 Webb 太空望遠鏡 tī 幾若个 紅外線 波段翕--ê。 咱會當 kah Hubble 太空望遠鏡 翕--ê 可見光 影像做比較。 NGC 602 就 tī 小麥哲倫星雲 (SMC) 附近，SMC 是咱銀河系 ê 一个細粒衛星星系。 照 SMC 估計 ê 距離來看，這張圖 應該有 200 光年闊。 圖 ê 邊仔有一寡足 引人注意 ê 背景星系，in 大部份攏 tī 幾若億 光年 之外。

[POJ] NGC 602: Webb Thài-khong Bōng-oán-kiàⁿ hip-tio̍h ê hêng-chheⁿ kah Hûn-thiāu

Chit kóa hêng-chheⁿ tng-leh húi-bia̍t hûn-thiāu. Kóng khah siông-sè leh, tô͘ tiong-ng ū chi̍t-kóa sin hêng-sêng ê hêng-chheⁿ hoat-chhut ê kng sī chiah-nī kiông,kiông kah ē kā i piⁿ-á ê hûn-thiāu lāi-té ê khì-thé kah thô͘-hún chin hoat khì. Kāng chi̍t-ê sî-kan,chit kóa hûn-thiāu mā siūⁿ-beh hêng-sêng sin ê hêng-chheⁿ. Che kui tiuⁿ tô͘ lóng sī seng-thoân NGC 602. Chit-tiuⁿ sin ê kéng-sek sī Webb Thài-khong Bōng-oán-kiàⁿ tī kúi-nā ê âng-gōa-sòaⁿ pho-tōaⁿ hip--ê. Lán ē-tàng kah Hubble Thài-khong Bōng-oán-kiàⁿ hip--ê khó-kiàn-kng iáⁿ-siōng chò pí-kàu. NGC 602 to̍h tī Sió Be̍h-tiat-lûn Seng-hûn (SMC) hù-kīn, SMC sī lán Gîn-hô-hē ê chi̍t-ê sè-lia̍p ūi-chheⁿ seng-hē. Chiàu SMC kó͘-kè ê kī-lî lâi-khòaⁿ, chit-tiuⁿ tô͘ eng-kai ū 200 kng-nî khoah. Tô͘ ê piⁿ-á ū chi̍t-kóa chiok ín-lâng-chù-ì ê pōe-kéng seng-hē, in tōa-pō͘-hūn lóng tī kúi-nā ek kng-nî chi-gōa.

[KIP] NGC 602: Webb Thài-khong Bōng-uán-kiànn hip-tio̍h ê hîng-tshenn kah Hûn-thiāu

Tsit kuá hîng-tshenn tng-leh huí-bia̍t hûn-thiāu. Kóng khah siông-sè leh, tôo tiong-ng ū tsi̍t-kuá sin hîng-sîng ê hîng-tshenn huat-tshut ê kng sī tsiah-nī kiông,kiông kah ē kā i pinn-á ê hûn-thiāu lāi-té ê khì-thé kah thôo-hún tsin huat khì. Kāng tsi̍t-ê sî-kan,tsit kuá hûn-thiāu mā siūnn-beh hîng-sîng sin ê hîng-tshenn. Tse kui tiunn tôo lóng sī sing-thuân NGC 602. Tsit-tiunn sin ê kíng-sik sī Webb Thài-khong Bōng-uán-kiànn tī kuí-nā ê âng-guā-suànn pho-tuānn hip--ê. Lán ē-tàng kah Hubble Thài-khong Bōng-uán-kiànn hip--ê khó-kìan-kng iánn-siōng tsò pí-kàu. NGC 602 to̍h tī Sió Be̍h-tiat-lûn Sing-hûn (SMC) hù-kīn, SMC sī lán Gîn-hô-hē ê tsi̍t-ê sè-lia̍p uī-tshenn sing-hē. Tsiàu SMC kóo-kè ê kī-lî lâi-khuànn, tsit-tiunn tôo ing-kai ū 200 kng-nî khuah. Tôo ê pinn-á ū tsi̍t-kuá tsiok ín-lâng-tsù-ì ê puē-kíng sing-hē, in tuā-pōo-hūn lóng tī kuí-nā ik kng-nî tsi-guā.

[English] NGC 602: Stars Versus Pillars from Webb

The stars are destroying the pillars. More specifically, some of the newly formed stars in the image center are emitting light so energetic that is evaporating the gas and dust in the surrounding pillars. Simultaneously, the pillars themselves are still trying to form new stars. The whole setting is the star cluster NGC 602, and this new vista was taken by the Webb Space Telescope in multiple infrared colors. In comparison, a roll-over image shows the same star cluster in visible light, taken previously by the Hubble Space Telescope. NGC 602 is located near the perimeter of the Small Magellanic Cloud (SMC), a small satellite galaxy of our Milky Way galaxy. At the estimated distance of the SMC, the featured picture spans about 200 light-years. A tantalizing assortment of background galaxies are also visible -- mostly around the edges -- that are at least hundreds of millions of light-years beyond.