STEVE 極光：發光 ê 河川

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：STEVE: A Glowing River over France
• 影像來源 kah 版權：Louis LEROUX-GÉRÉ
• 台文翻譯：An-Li Tsai (TARA)

[漢羅] STEVE 極光：發光 ê 河川

有當時仔，天頂會出現一條燒熱 ê 河。 這條河會製造 速度增加的強熱輻射，抑是叫做 STEVE 極光，會發出紅色、白色、kah 粉紅仔色 ê 光。 STEVE 極光 是 按怎出現欸？ 這到今猶是一个研究主題。 毋過最近 ê 證據表示講，in 是 ùi 地球大氣 100 公里懸 ê 電離層 內底 高速運動 ê 熱離子河 發光 造成--ê。 較闊 ê 紅光河川，可能 kah STEVE 極光 有關，毋過嘛有可能是 穩定極光紅弧 SAR，這是一款 較捷 看著 ê 光。 這張相片 是這個月 tī 法國 Côte d'Opale 翕--ê 闊幅數位合成相片，變做天頂 ê STEVE 極光弧。 雖罔講這个 幻影 才出現幾若分鐘久，毋過 tùi 頭腦動足緊 ê 天文攝影師來講，已經有夠矣！ 毋知你有揣著伊無？

[POJ] STEVE Ke̍k-kng: Hoat-kng ê Hô-chhoan

Ū-tang-sî-á, thiⁿ-téng ē chhut-hiān chi̍t tiâu sio-joa̍h ê hô. Chit tiâu hô ē chè-chō Sok-tō͘ Cheng-ka ê Kiông Jia̍t-hok-siā, ia̍h-sī kiò-chò STEVE ke̍k-kng, ē hoat-chhut âng-sek, pe̍h-sek, kah hún-âng-á-sek ê kng. STEVE ke̍k-kng sī-án-nóa chhut-hiān eh? Che kàu-taⁿ iáu-sī chi̍t-ê gián-kiù chú-tê. M̄-koh chòe-kīn ê chèng-kù piáu-sī kóng, in sī ùi Tē-kiû tāi-khì 100 kong-lí koân ê tiān-lī-chân lāi-té ko-sok ūn-tōng ê jia̍t lī-chí hô hoat-kng chō-sêng--ê. Khah khoah ê âng-kng hô-chhoan, khó-lêng kah STEVE ke̍k-kng ū-koan, m̄-koh mā ū khó-lêng sī Ún-tēng Ke̍k-kng Âng-hô͘ SAR, che-sī chi̍t-khoán khah chia̍p khòaⁿ--tio̍h ê kng. Chit-tiuⁿ siòng-phìⁿ sī chit kò goe̍h tī Hoat-kok Côte d'Opale hip--ê khoah-pak sò͘-ūi ha̍p-sêng siòng-phìⁿ, piàn-chò thiⁿ-téng ê STEVE ke̍k-kng-hô͘. Sui-bóng kóng chit-ê hoàn-iáⁿ chiah chhut-hiān kúi-nā hun-cheng kú, m̄-koh tùi thâu-náu tāng chiok kín ê thian-bûn liap-iáⁿ-su lâi-kóng, í-keng ū-kàu ah! M̄-chai lí ū chhōe-tio̍h i bô?

[KIP] STEVE Ki̍k-kng: Huat-kng ê Hô-tshuan

Ū-tang-sî-á, thinn-tíng ē tshut-hiān tsi̍t tiâu sio-jua̍h ê hô. Tsit tiâu hô ē tsè-tsō Sok-tōo Tsing-ka ê Kiông Jia̍t-hok-siā, ia̍h-sī kiò-tsò STEVE ki̍k-kng, ē huat-tshut âng-sik, pe̍h-sik, kah hún-âng-á-sik ê kng. STEVE ki̍k-kng sī-án-nuá tshut-hiān eh? Tse kàu-tann iáu-sī tsi̍t-ê gián-kiù tsú-tê. M̄-koh tsuè-kīn ê tsìng-kù piáu-sī kóng, in sī uì Tē-kiû tāi-khì 100 kong-lí kuân ê tiān-lī-tsân lāi-té ko-sok ūn-tōng ê jia̍t lī-tsí hô huat-kng tsō-sîng--ê. Khah khuah ê âng-kng hô-tshuan, khó-lîng kah STEVE ki̍k-kng ū-kuan, m̄-koh mā ū khó-lîng sī Ún-tīng Ki̍k-kng Âng-hôo SAR, tse-sī tsi̍t-khuán khah tsia̍p khuànn--tio̍h ê kng. Tsit-tiunn siòng-phìnn sī tsit kò gue̍h tī Huat-kok Côte d'Opale hip--ê khuah-pak sòo-uī ha̍p-sîng siòng-phìnn, piàn-tsò thinn-tíng ê STEVE ki̍k-kng-hôo. Sui-bóng kóng tsit-ê huàn-iánn tsiah tshut-hiān kuí-nā hun-tsing kú, m̄-koh tuì thâu-náu tāng tsiok kín ê thian-bûn liap-iánn-su lâi-kóng, í-king ū-kàu ah! M̄-tsai lí ū tshuē-tio̍h i bô?

[English] STEVE: A Glowing River over France

Sometimes a river of hot gas flows over your head. In this case the river created a Strong Thermal Emission Velocity Enhancement STEVE that glowed bright red, white, and pink. Details of how STEVEs work remain a topic of research, but recent evidence holds that their glow results from a fast-moving river of hot ions flowing over a hundred kilometers up in the Earth's atmosphere: the ionosphere. The more expansive dull red glow might be related to the flowing STEVE, but alternatively might be a Stable Auroral Red (SAR) arc, a more general heat-related glow. The featured picture, taken earlier this month in Côte d'Opale, France, is a wide-angle digital composite made as the STEVE arc formed nearly overhead. Although the apparition lasted only a few minutes, this was long enough for the quick-thinking astrophotographer to get in the picture -- can you find him?

詞彙學習