掠著矣！

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Caught
• 影像來源 kah 版權：SpaceX
• 台文翻譯：An-Li Tsai (TARA)

[漢羅] 掠著矣！

火箭若是轉來發射台，而且去予掠著，會按怎？ 這是頭一擺發生 ê 代誌，就發生 tī 10 工前 SpaceX ê Starship 火箭 ùi 美國 德州 Boca Chica ê 發射台 出去了後。 照計畫，星艦火箭 分離，頂節降落 tī 太平洋。 上特別 ê 部份是下節火箭，超級重型推進器 12 號，tī 7 分鐘後 去予發射台掠著矣！ 掠著火箭通重複使用，是一款足新 ê 技術，按呢會當降低火箭 ê 飛行成本。 未來 NASA 可能 會送 星艦火箭 到 地球軌道、月球、甚至 其他行星。

[POJ] Lia̍h tio̍h--ah!

Hóe-chìⁿ nā-sī tńg-lâi hoat-siā tâi, jî-chhiáⁿ khì hō͘ lia̍h-tio̍h, ē án-chóaⁿ? Che-sī thâu-chi̍t-pái hoat-seng ê tāi-chì, to̍h hoat-seng tī 10 kang chêng SpaceX ê Starship hóe-chìⁿ ùi bí-kok Tek-chiu Boca Chica ê hoat-siā tâi chhut-khì liáu-āu. Chiàu kè-ōe, Seng-lām hóe-chìⁿ hun-lī, téng-chat kàng-lo̍h tī Thài-pêng-iûⁿ. Siōng te̍k-pa̍t ê pō͘-hūn sī ē-chat hóe-chìⁿ, chhiau-kip tāng-hêng thui-chìn-khì 12 hō, tī 7 hun-cheng āu khì hō͘ hoat-siā-tâi lia̍h tio̍h--ah! Lia̍h-tio̍h hóe-chìⁿ thang tiông-ho̍k sú-iōng, sī chi̍t-khoán chiok sin ê ki-su̍t, án-ne ē-tàng kàng-kē hóe-chìⁿ ê hui-hêng sêng-pún. Bī-lâi NASA khó-lêng ē sàng Seng-lām hóe-chìⁿ kàu Tē-kiû kúi-tō, Goe̍h-kiû, sīm-chì kî-thaⁿ kiâⁿ-chheⁿ.

[KIP] Lia̍h tio̍h--ah!

Hué-tsìnn nā-sī tńg-lâi huat-siā tâi, jî-tshiánn khì hōo lia̍h-tio̍h, ē án-tsuánn? Tse-sī thâu-tsi̍t-pái huat-sing ê tāi-tsì, to̍h huat-sing tī 10 kang tsîng SpaceX ê Starship hué-tsìnn uì bí-kok Tik-tsiu Boca Chica ê huat-siā tâi tshut-khì liáu-āu. Tsiàu kè-uē, Sing-lām hué-tsìnn hun-lī, tíng-tsat kàng-lo̍h tī Thài-pîng-iûnn. Siōng ti̍k-pa̍t ê pōo-hūn sī ē-tsat hué-tsìnn, tshiau-kip tāng-hîng thui-tsìn-khì 12 hō, tī 7 hun-tsing āu khì hōo huat-siā-tâi lia̍h tio̍h--ah! Lia̍h-tio̍h hué-tsìnn thang tiông-ho̍k sú-iōng, sī tsi̍t-khuán tsiok sin ê ki-su̍t, án-ne ē-tàng kàng-kē hué-tsìnn ê hui-hîng sîng-pún. Bī-lâi NASA khó-lîng ē sàng Seng-lām hué-tsìnn kàu Tē-kiû kuí-tō, Gue̍h-kiû, sīm-tsì kî-thann kiânn-tshenn.

[English] Caught

What if a rocket could return to its launch tower -- and be caught? This happened for the first time 10 days ago, after a SpaceX Starship rocket blasted off from its pad in Boca Chica, Texas, USA. Starship then split, as planned, with its upper stage landing in the Pacific Ocean. The big difference was the lower stage, Super Heavy Booster 12, was caught by its launch tower about 7 minutes later. Catching a rocket for reuse is a new and innovative way to help reduce the cost of rocket flight by making rockets more easily reusable. Starship rockets may be used by NASA in the future to send spacecraft to Earth orbit, the Moon, and even other planets.

詞彙學習